২ রাজাবলী 5 - Chakma Bibleনামানে গম্ অলঅ 1 নামানে এলদে অরামর রাজার সৈন্যদলর সেনাপতি। তা গিরোজ্সোর্ চোগোত্ তে এলদে এক্কো দাঙর্ আর সর্মানিত মানুচ্, কিত্তে তারে দিইনে লগেপ্রভু অরামরে জিদেই দিয়্যে। তে এলদে এক্কো বীর যোদ্ধা, মাত্তর্ তা কিয়্যেত্ এলদে ফারাঙিরুগ্। 2 অরামীয় হানাদারুনে দলে দলে ইস্রায়েল দেজত্ যেদাক্। একপল্লা তারা এক্কো চিগোন্ মিলেরে বন্দী গুরিনে আন্ন্যন। তে নামান মোক্কোর্ চাগরানী ওইয়্যে। 3 একদিন্যে মিলেবো তা গিরোজ্সোর্ মোক্কোরে কলঅ, “মঅ গিরোজ্সো যুনি বানা একপল্লা শমরিয়ার ভাববাদীগুনোর্ লগে দেগা গুরি পারিদো, সালে তে তার্ ফারাঙিগান্ গম্ গুরি দিদো।” 4 ইস্রায়েলত্তুন্ আন্যে সে মিলেবো যিয়েনি কোইয়্যে সিয়েনি নামানে যেইনে তা গিরোজ্সো ইদু কলগোই। 5 জোবত্ অরামর্ রাজা কলঅ, “ঠিগ্ আঘে, তুই যাহ্। ইস্রায়েল রাজার্ ইদু মুই এক্কান্ চিদি দিম্।” সেনত্তে নামানে তিনশঅ নব্বই কেজি রূবো, আদাত্তোর্ কেজি সোনা আর দশ তান্ কাবড়্ লোইনে নিগিলিলো। 6 যে চিদিগান তে ইস্রায়েল রাজার ইদু নেযেল সিয়েনত্ লেগা এলদে, “মুই মর্ সেনাপতি নামানরে এ চিদিগান্দোই তইদু পাদেলুং যেনে তুই তারে তার্ ফারাঙিগানত্তুন্ গম্ গুরি দোচ্।” 7 ইস্রায়েলর রাজা সে চিদিগান পুরিপারাই তা কাবড়ান্ ফাদিনে কলঅ, “মুই কি গোজেন? মুই কি মারে ফেলেইনে আরঅ জিংকানিগান্ দি পারং? ফারাঙিত্তুন্ গম্ অবাত্তে কিত্তে এ মানুচ্চো মইদু একজনরে পাদেয়্যে? চঅ, কিঙিরিনে তে মঅ লগে কোল্-কোজ্যে বাজেবাত্তে চেট্ট্যা গরের্।” 8 গোজেন মানুচ্ ইলীশায় যেক্কে শুনিলো, ইস্রায়েলর রাজাবো কাবড়ান্ ফাদি ফেলেয়্যে সেক্কে তে তারে এ হবরান্ পাদেল, “কিত্তেই তুই তঅ কাবড়ান্ ফাদি ফেলেয়োচ্? মানুচ্চোরে মইদু পাধেই দে। সেক্কে তে জানি পারিবো, ইস্রায়েলত্ এক্কো ভাববাদী আঘে।” 9 সেনত্তেই নামানে তার্ বেক্ রথ্তানি আর ঘোড়াগুন্ লোইনে ইলীশায়র ঘরর্ দোরোর্ ইদু যেইনে থামেল। 10 ইলীশায় এক্কো মানুচ্ দিইনে তারে কোই পাদেল, “তুই যেইনে সাতপল্লা যর্দন গাঙত্ গাত্তোই। সেক্কে তুই গম্ আর সিজি অবে।” 11 মাত্তর্ নামানে অমকদ রাগ গুরিনে সিয়োত্তুন্ আঢি গেলগোই আর কলঅ, “মুই মনে গোজ্যংগে তে হামাক্কাই নিগিলি এইনে মইদু এবঅ আর থিয়্যেইনে তার্ গোজেন লগেপ্রভুরে ডাগিবো আর ফারাঙিগানর্ উগুরে তা আঢ্তান্ বাজেইনে মর্ ফারাঙিগান্ গম্ গুরি দিবো। 12 দামেস্কর অবানা আর পর্পর গাঙান্ কি ইস্রায়েলর গাঙর্ পানিগানিত্তুন্ গম্ নয়? সিদু গাদিনে কি মুই সিজি ওই ন-পারিদুং?” ইয়েন্ কোইনে তে রাগ গুরিনে ফিরি গেলঅ। 13 নামানর চাগরুনে সেক্কে তাইদু যেইনে কলাক্, “বাবু, সে ভাববাদীবো যুনি তরে কনঅ গম কাম গুরিবাত্তে কদঅ সালে কি তুই সিয়েন্ ন-গুরিদে? মাত্তর্ তে যেক্কে তরে গাদিনে সিজি অবাত্তে কোইয়্যে সিয়েন্ কি তর্ আরঅ গমেডালে গরানা উজিত্ নয়?” 14 সেক্কে নামানে গোজেন মানুচ্চোর্ কধামজিম্ যেইনে যর্দনত্ সাতপল্লা বুর্ দিলো। সেক্কে তা কিয়্যেগান গম্ অলঅ আর চিগোন্ গুরো কিয়্যের্ চামঅ ধোক্ক্যেন তা চামান্ দোল্ অলঅ। 15 সেক্কে নামানে আর তা লগে যেইয়্যে বেক্ মানুচ্চুনে গোজেনর মানুচ্চুনোর্ ইদু ফিরি গেলাক্। নামানে তা মুজুঙোত্ থিয়্যেইনে কলদে, “মুই ইক্কিনে হবর্ পেলুং, বানা ইস্রায়েলর গোজেন বাদে গোদা দুনিয়েগানত্ আর কনঅ গোজেন নেই। ইক্কিনে তুই তঅ চাগের্বোত্তুন্ বক্শিস্ছান গুজি লঅ।” 16 জোবত্ ভাববাদীবো কলঅ, “মুই যিবের্ সেবা গরঙ্ সে জেদা লগেপ্রভুর দিব্য, মুই এক্কান্ জিনিসঅ গুজি ন-লোম্।” নামানে জোর্ গুরিলেয়ো তে রাজী ন-অলঅ। 17 নামানে কলঅ, “তুই যুনি কিজু নঅ নেযাচ্ সালে দোয়্যে গুরিনে দ্বিবে গাধায় বুয়োই নেযেই পারন্ এধোক্ক্যেন মাদি তঅ চাগর্বোরে দে, কিত্তে তর্ এ চাগর্বো লগেপ্রভু বাদে আর কনদিন্অ কনঅ দেবেদার ইদু পূজ্যে আর অন্য উৎসর্ব ন-গরে। 18 মাত্তর্ এ এক্কান পৌইদ্যেনে যেনে লগেপ্রভু তার্ চাগর্ মরে ক্ষেমা গরে। মর্ গিরোজ্সো যেক্কে রিম্মোণ দেবেদার মন্দিরোত্ সুমিনে মর্ বল্লোই রিম্মোনর নাঙে মাদিত্ মাধা নিগিরে সেক্কে মত্তুনঅ সিদু মাদিত্ মাধা নিগিরে পড়ে। এ পৌইদ্যেনে যেনে লগেপ্রভু মরে ক্ষেমা গরে।” 19-20 ইলীশায় কলঅ, “তুই মনর্ সুগে আদি যাহ্।” নামানে তার্ কায়-কুরেত্তুন্ কিজু দূরোত্ যানার্ পরেন্দি গোজেন মানুচ্ ইলীশায়র চাগর্ গেহসি মনে মনে কলঅ, “সে অরামীয় নামানে যিয়েন্ আন্যে সিয়েন্ গুজি ন-লোইনে মঅ গিরোজ্সো এমনেই তারে ইরি দিয়্যে। জেদা লগেপ্রভুর দিব্য, মুই তা পিজেন্দি ধাবা যেইনে তাত্তুন্ কিজু চেম্বোই।” 21 ইয়েন্ কোইনে গেহসি নামানর পিজেন্দি দাবা দিলো। তারে তান্দি দাবা এত্তে দেগিনে নামানে তা লগে দেগা গুরিবাত্তে রথ্তানত্তুন্ লামিলো। তে তারে পুযোর্ গুরিলো, “বেক্কানি ঠিগ্ আঘে দঅ?” 22 জোবত্ গেহসি কলঅ, “বেক্কানি ঠিগ্ আঘে। মাত্তর্ মঅ গিরোজ্সো তরে এ কধাগান কবাত্তে মরে পাদেয়্যে, ইফ্রয়িমর মুড়ো-মুড়ি চাগালাত্তুন্ শিচ্চ্য-ভাববাদীগুনোর্ দ্বিজন গাবুজ্যে ইক্কিনে তাইদু এচ্ছোন্। সেনত্তেই তুই যেনে দোয়্যে গুরিনে তারাত্তে ঊনচোল্লিশ কেজি রূবো আর দ্বিতান কাবড় দুয়োচ্।” 23 নামানে কলঅ, “ঊনচোল্লিশ কেজি কিত্তেই? তুই আদাত্তোর্ কেজি নেযা।” তে সিয়েনি নিবাত্তে গেহসিরে বার্ বার্ কোজোলি গরা ধুরিলো আর আদাত্তোর্ কেজি রূবো দ্বিবে থৈল্যেত্ বানি দিলো আর দ্বিতান কাবড়্ দিলো। সিয়েনি তে তার্ দ্বিবে চাগরর্ আঢত্ দিলো আর তারা গেহসির আগে আগে সিয়েনি বুয়োই নেযা ধুরিলাক্। 24 তাম্বুলোর্ মুড়োবো ইদু এইনে গেহসি সে চাগরুনোত্তুন্ সিয়েনি নেযেইনে ঘরঅ ভিদিরে রাগেল। সে পরেন্দি তে তারারে বিদেয় দিলে তারা গেলাক্। 25 ইয়েন পরেন্দি তে ভিদিরে যেইনে তার্ গিরোজ্ ইলীশায় মুজুঙোত্ থিয়্যেল। ইলীশায় পুযোর্ গুরিলো, “গেহসি, তুই কুদু যেইয়োচ্?” গেহসি কলঅ, “তঅ চাগর্বো কনজাগাত্ ন-যায়।” 26 মাত্তর্ ইলীশায় তারে কলঅ, “সে মানুচ্চো যেক্কে তঅ লগে দেগা গুরিবাত্তে রথ্তানত্তুন্ লাম্মে সেক্কে মর্ মনানে কি তঅ লগে ন-যায়? টেঙা-পোইজ্যে, কাবড়্-চুগোড়্, জলপাইয়োর্ বাগান, আংগুর-ক্ষেত, গোরু-ছাগল-ভেড়া আর চাগর্-চাগরানী নেযেবার্ ইবে কি সময়? 27 সেনত্তে নামানর্ ফারাঙিগান্ তর্ আর তর্ বংশধরুনোর্ ভিদিরে জিংকানিবর্ লাগি থেবঅ।” সেক্কে গেহসি ইলীশায়র মুজুঙেত্তুন্ আদি গেলঅ আর তা কিয়্যেগান্ ফারাঙিয়্যে দুব্ ওই গেলঅ। |
Copyright © 2021 Bangladesh Bible Society
Bangladesh Bible Society