২ রাজাবলী 18 - Chakma Bibleযিহূদার রাজা হিষ্কিয় 1 এলার্ পুয়ো ইস্রায়েলর রাজা হোশেয়র রাজাগিরি তিন বজরত্ যিহূদার রাজা আহসর পুয়ো হিষ্কিয় রাজাগিরি গরানা আরাম্ভ গুরিলো। 2 তে পোজোশ্ বজর্ বয়জত্ রাজা ওইয়্যে আর ঊনত্রিশ বজর যিরূশালেমত্ রাজাগিরি গোজ্যে। তা মাবো নাঙান্ অলদে অবী তে অলদে সখরিয়োর্ ঝি। 3 হিষ্কিয় তা পূরোণিমানুচ্ দায়ূদো ধোক্ক্যেন লগেপ্রভু চোগেন্দি যিয়েনি গম্ সিয়েনি গুরিদো। 4 তে পূজো অজল্ জাগায়ানি ভস্ত গুরিলো, পূজো পাত্তরুন্ ভাঙিলো আর আশেরা-খুদোগুন্ কাবি ফেলেল। মোশির বানেয়্যে পিদোল সাপ্পো তে ভাঙিনে কট্টা কট্টা গুরিলো, কিত্তে ইস্রায়েলীয়গুনে সে সময় সং সে সাপ্পুনো নাঙে আগর্বাট্টি জ্বালাদন্। পিদোলর সাপ্পো নাঙান্ অলদে নহুষ্টন। 5 হিষ্কিয় ইস্রায়েলর গোজেন লগেপ্রভুর উগুরে বিশ্বেজ্ গুরিদো। তা আগেন্দি বা পরেন্দি যিহূদার রাজাগুনো ভিদিরে তা ধোক্ক্যেন আর কনজন ন-এলাক্। 6 লগেপ্রভুরে তে আজাবোদে ধুরি রাগেয়্যে আর নিত্য তা পধেন্দি চলিদো। লগেপ্রভু মোশিরে যেদক্কানি উগুম দিয়্যে সিয়েনি তে পালেদ। 7 লগেপ্রভু তা সমারে থেদঅ। তে যে কনঅ কাম্ গুরিলে ফোলেদ। আসিরিয়ার রাজা বিরুদ্ধে উল্লোমি গুরিনে তে তার তলেন্দি অস্বীগের্ গুরিলো। 8 গাজা আর তার বেক্ চাগালানি ভিদিরে যেদক্কানি জাগাত্ পলেষ্টীয়গুনে বজত্তি গুরিদাক্ তে তারারে আক্রমণ গুরিনে ওদেই দিলো। 9 রাজা হিষ্কিয়োর রাজাগিরির চের্ বজরত্, অত্তাৎ এলার্ পুয়ো ইস্রায়েল রাজা হোশেয়র রাজাগিরির সাত বজরত্ আসিরিয়ার রাজা শল্মনেষর শমরিয়ার বিরুদ্ধে যুদ্ধো গুরিবাত্তে এইনে শঅরান্ ঘিরি রাগেল। 10 তিন বজর ঘিরি রাগানার্ পরেন্দি হিষ্কিয়োর রাজাগিরির ছয় বজরত্ আর ইস্রায়েলর রাজা হোশেয়র রাজাগিরির নয় বজরত্ আসিরিয়োগুনে শমরিয়াগান গজক গুরি নিলাক্। 11 আসিরিয়ার রাজা ইস্রায়েলর মানুচ্চুনোরে বন্দী গুরিনে আসিরিয়াত্ নেযেল আর হলহে, হাবোর গাঙ পারত্ গোষণ চাগালাত্ আর মাদীয়গুনো শঅরানিত্ তারারে বজত্তি গুরিবাত্তে দিলো। 12 ইয়েনি ঘুদি যেইয়্যে, কিত্তে তারার গোজেন লগেপ্রভু কধানি তারা ন-পালান্, বরং তা সুদোমানি, অত্তাৎ লগেপ্রভুর চাগর্ মোশির বেক্ উগুমানি তারা অমান্য গোজ্যন্। সে উগুমানি তারা কান্ ন-পাদন্ আর সিয়েনি পালনঅ ন-গরন্। 13 রাজা হিষ্কিয়োর রাজাগিরির চৌদ্দো বজরত্ আসিরিয়ার রাজা সন্হেরীব যিহূদার বেক্ দেবাল-ঘিজ্যে শঅরানি আক্রমণ গুরিনে সিয়েনি গজক গুরি নেযেল। 14 সেক্কে যিহূদার রাজা হিষ্কিয় লাখীশোত্ আসিরিয়ার রাজারে এ কধাগান কোই পাদেল, “মুই অন্যেয় গোজ্যং। তুই ফিরি যাহ্। তুই মইদু যিয়েনি দাবি গুরিবে মুই সিয়েনি দিম্।” সেক্কে আসিরিয়ার রাজা যিহূদার রাজা হিষ্কিয়োত্তুন্ পেরায় বার টন রূবো আর এক টনত্তুন্ কিজু বেশ্ সোনা দাবি গুরিলো। 15 সেনত্তে হিষ্কিয় লগেপ্রভুর ঘরত্ আর রাজঘর ভান্ডালত্ যেদক্কানি রূবো এলঅ বেক্কানি তারে দিলো। 16 যিহূদার রাজা হিষ্কিয় লগেপ্রভুর ঘর দোরান্ আর দোরোর্ ফ্রেমান্ যে সোনালোই বেড়েইয়্যে এ সময়োত্ তে সিয়েন্ খুলি নেযেইনে আসিরিয়ার রাজারে দিলো। সন্হেরীবে যিরূশালেমরে দর্ লাগেল 17 আসিরিয়ার রাজা লাখীশত্তুন্ তর্তনরে, রব্সারীসরে আর রব্শাকিরে বিরাট একদল সৈন্যলোই যিরূশালেমত্ রাজা হিষ্কিয়ো ইদু পাধেই দিলো। তারা যিরূশালেমত্ এইনে কাবড় কাজেইয়্যে মাদ পধ পারত্ অজল্ জাগাত্ পুয়োরবো লগে বাস্যে পানি নাল ইদু থামেলাক্। 18 তারা রাজারে ডাগানার্ পরেন্দি রাজঘর নেতা হিল্কিয়োর পুয়ো ইলিয়াকীম, রাজার লিগিয়্যে শিব্ন আর বিজগ লিগিয়্যে আসফের পুয়ো যোয়াহ নিগিলিনে তারা সমারে গেলঅ। 19 সেক্কে রব্শাকি তারারে কলঅ, তুমি হিষ্কিয়রে এ কধাগান্ কঅ, সে মহান রাজাবো, অত্তাৎ আসিরিয়ার রাজা কোইয়্যেদে, তুই কুয়ন উগুরে বিশ্বেজ্ গরর্? 20 তুই কত্তে তর্ যুদ্ধো গুরিবার বুদ্ধি আর বল্ আঘে, মাত্তর্ সিয়েনি তর্ মুয়ো কধা। কঅদে চাং, তুই কা বলে মর্ বিরুদ্ধে উল্লোমি গরর্? 21 তুই দঅ বিশ্বেজ্ গোজ্যস্ সেই বুদি যেইয়্যে নল, অর্থাৎ মিসর উগুরে। যে সেই নল্লো উগুরে বিশ্বেজ্ গুরিবো সিবেই তা আত্তান্ কানা গুরি দিবো। মিসর রাজা ফরৌণ উগুরে যিগুনে বিশ্বেজ্ গরন্ তারা উগুরে তে সেধোক্ক্যেন গরে। 22 মাত্তর্ তুমি যুনি মরে কঅ, তুমি তমা গোজেন লগেপ্রভু উগুরে বিশ্বেজ্ গোজ্য, সালে তে কি সে গোজেন নয় যিবে পূজো অজল্ জাগানি আর ডালিপূজোগুন্ হিষ্কিয় ভস্ত গোজ্যে আর যিহূদা আর যিরূশালেমর মানুচ্চুনোরে কোইয়্যেদে যিরূশালেমর এ পূজোবো মুজুঙোত্ তারাত্তুন্ তবনা গরা পুরিবো? 23 “তুমি মর্ ওইনে তমা রাজাবোরে আরঅ কঅ, ‘তুই যুনি পারচ্ সালে মঅ গিরোজ্ আসিরিয়া রাজার লগে এ চুক্তিবো গর্, মুই তরে দ্বি’আজার ঘোড়া দিম্ যুনি তুই সেক্কে চোরেবাত্তে মানুচ্ দি পারচ্। 24 যুনি সিয়েন ন-পারচ্ সালে মঅ গিরোজ্সো কাম্গুরিয়্যেগুনো ভিদিরে বেগত্তুন্ যে চিগোন্ তারে বা তুই কেধোক্ক্যেন গুরিনে মানা গুরিবে, যুনিয়ো তুই মিসর রথ আর ঘোড়া সৈন্যগুনো উগুরে বিশ্বেজ্ গরর্? 25 সিয়েন্ বাদে মুই কি লগেপ্রভুত্তুন্ অনুমতি ন-নিইনে এ জাগায়ান্ আক্রমণ আর ভস্ত গুরিবাত্তে এচ্চ্যং? এ দেজ বিরুদ্ধে যুদ্ধো গুরিনে সিয়েন্ ভস্ত গুরি ফেলেবাত্তে লগেপ্রভু নিজেই মরে কোইয়্যে। ” 26 সেক্কে হিল্কিয়োর পুয়ো ইলীয়াকীম, শিব্ন আর যোয়াহ রব্শাকিরে কলাক্, “তঅ চাগরুনো ইদু তুই দোয়্যে গুরিনে অরামীয় কধালোই কধা কঅ, কিত্তে আমি সিয়েন্ বুঝিই। দেবাল উগুরে মানুচ্চুনো ইদু তুই আমা লগে ইব্রীয় কধালোই কধা ন-কোচ্।” 27 মাত্তর্ রব্শাকি জোবত্ কলঅ, “মঅ গিরোজ্সো কি বানা তমা গিরোজ্ আর তমা ইদু এ কধানি কবাত্তে মরে পাদেয়্যে? দেবাল উগুরে বোস্যে সে মানুচ্চুন, যিগুনে তমা ধোক্ক্যেন যার্ যার্ ঘুগানি আর মুদ্তানি হা পুরিবো তারা ইদুয়ো কি কোই ন-পাদান?” 28 সে পরেন্দি রব্শাকি থিয়্যেইনে রঅ ছাড়ি ইব্রীয় কধায় কলঅ, তুমি মহান রাজার, অত্তাৎ আসিরিয়ার রাজার কধানি শুনো। 29 রাজা কোইয়্যেদে, হিষ্কিয় যেনে তমারে ন-ঠগায়। তে তা আঢত্তুন্ তমারে রোক্ষ্যে গুরি ন-পারিবো। 30 হিষ্কিয় যেনে এ কধাগান কোইনে লগেপ্রভু উগুরে তমা বিশ্বেজ্ছান্ ন-জর্মায়, লগেপ্রভু হামাক্কাই আমারে উদ্ধোর্ গুরিবো; এ শঅরান্ আসিরিয়ার্ রাজা আঢত্ তুলি দিয়্যে ন-অবঅ। 31 তুমি হিষ্কিয়ো কধানি ন-শুন্য। আসিরিয়ার রাজা কোইয়্যেদে, তুমি মঅ লগে মিলো আর নিগিলিনে মইদু এজঅ। সালে তুমি পত্তিজনে তা নিজোর্ আংগুর আর ডুমুর গাজত্তুন্ ফল আর নিজো কূয়োত্তুন্ পানি হেই পারিবা। 32 সে পরেন্দি মুই এইনে তমা নিজোর্ দেজঅ ধোক্ক্যেন আর এক্কান্ দেজত্ তমারে নেযেম্। সে দেজ্ছান অলঅ সোজ্য আর নূয়ো আংগুর-রসর দেজ্, রুটি আর আংগুর ক্ষেদর দেজ্, জলপাই আর মধু দেজ্। তুমি যুনি মঅ কধামজিম্ কাম্ গরঅ সালে তুমি ন-মুরিবা বরং বাঁজিবা। “ ‘হিষ্কিয় যেক্কে কলঅ, লগেপ্রভু তমারে রোক্ষ্যে গুরিবো, সেক্কে তা কধানি তুমি ন-শুনো, কিত্তে সে কধাগান কোইনে তে তমারে বজং পধেন্দি চালার্। 33 অন্য জাদর্ কনঅ দেবেদা কি আসিরিয়ার রাজা আঢত্তুন্ তা দেজ্চান রোক্ষ্যে গুরি পাজ্যে? 34 হমাৎ আর অর্পদর দেবেদাগুনে কুদু? সফর্বয়িম, হেনা আর ইব্বার দেবেদাগুনে কুদু? তারা কি মঅ আঢত্তুন্ শমরিয়াগানরে রোক্ষ্যে গুরি পাজ্যন্? 35 এদক্কানি দেজর্ বেক্ দেব-দেবেদাগুনো ভিদিরেত্তুন্ কন্না মঅ আঢত্তুন্ নিজো দেজ্ছানরে রোক্ষ্যে গোজ্যে? সালে লগেপ্রভু কেধোক্ক্যেন গুরি মঅ আঢত্তুন্ যিরূশালেমরে রোক্ষ্যে গুরিবো?’ ” 36 মাত্তর্ মানুচ্চুনে অলর্ গুরি থেলাক্, কনঅ জোব্ ন-দিলাক্, কিত্তে রাজা হিষ্কিয় কনঅ জোব্ ন-দিবাত্তে তারারে মানা গোজ্যে। 37 ইয়েন পরেন্দি রাজঘর নেতা হিল্কিয়োর পুয়ো ইলীয়াকীম, রাজার লিগিয়্যে শিব্ন আর বিজগ লিগিয়্যে আসফর পুয়ো যোয়াহ তারার্ কাবড়ানি ফাদিনে হিষ্কিয়ো ইদু গেলাক্ আর রব্শাকির বেক্ কধানি তারে জানেলাক্। |
Copyright © 2021 Bangladesh Bible Society
Bangladesh Bible Society