২ রাজাবলী 14 - Chakma Bibleযিহূদার রাজা অমৎসিয় 1 ইস্রায়েলর রাজা যিহোয়াহসর পুয়ো যিহোয়াশর রাজাগিরির্ দ্বিবজরত্ যিহূদার রাজা যোয়াশর পুয়ো অমৎসিয় রাজাগিরি গরানা আরাম্ভ গুরিলো। 2 রাজা অবার্ সময়োত্ তা বয়সছান্ এলদে পোজোচ্ বজর্। তে যিরূশালেমত্ ঊনত্রিশ বজর রাজাগিরি গোজ্যে। তা মাবো নাঙান্ এলদে যিহোয়দ্দিন; তে অলদে যিরূশালেম শঅরর্ মিলে। 3 লগেপ্রভুর চোগেন্দি যিয়েনি গম্ অমৎসিয় সিয়েনি গুরিদো, মাত্তর্ তা পূরোণি মানুচ্ দায়ূদো ধোক্ক্যেন নয়। তে তা বাপ্পো যোয়াশর ধোক্ক্যেন বেক্ কামানি গুরিদো। 4 মাত্তর্ উপোসনার অজল জাগায়ানি তে ভস্ত ন-গরে; মানুচ্চুনে সিদু য়েমান্ উৎসর্ব গরানা আর আগর্বাট্টি জ্বালা ধুরিলাক্। 5 রেজ্যগান্ তা আঢত্ এজানার্ পরেন্দি যে কাম্গুরিয়্যেগুনে রাজারে, অত্তাৎ তা বাপ্পোরে মারে ফেল্যন্ তারারে তে মারে ফেলেয়্যে। 6 মাত্তর্ মোশির রীদি-সুদোম বোইবোত্ যিয়েনি লেগা আঘে সেধোক্ক্যেন গুরিনে তে তারা পুয়োগুনোরে মারে ন-ফেলেল। সে বোইবোত্ লগেপ্রভুর এ উগুমান্ লেগা এলঅ, “পুয়ো-ঝিগুনোর্ পাপত্তে বাপ্পোরে বা বাপ্পো পাপত্তে পুয়ো-ঝিগুনোরে মারে ফেলেই ন-পারিবো, মাত্তর্ পত্তিজনত্তুন্ তা নিজো পাপত্তে মরা পুরিবো।” 7 অমৎসিয় নুন-কলগত্ দশ আজার ইদোমীয়রে মারে ফেলেল আর যুদ্ধো গুরিনে সেলা গজক্ গুরিনে তা নাঙান্ রাগেল যক্তেল; সে নাঙান্ এজঅ আঘে। 8 সে পরেন্দি তে যেহূর নাদিন্, অত্তাৎ যিহোয়াহসর পুয়ো ইস্রায়েলর রাজা যিহোয়াশরে কোই পাদেল, “এজঅ, আমি যুদ্ধোত্তে মুজুঙো-মুজুঙি ওই।” 9 মাত্তর্ ইস্রায়েলর রাজা জোবত্ যিহূদার রাজারে কোই পাদেল, “লেবাননর এক্কো লাজুরিকাদা লেবাননরঅ এরস গাজ ইদু কোই পাদেল, ‘মঅ পুয়োবো লগে তঅ ঝিবোরে বৌ দে।’ সে পরেন্দি লেবাননর এক্কো ঝার্বো য়েমান্ এইনে সে লাজুরিকাদাবোরে টেঙোই উরি দিলো। 10 ইদোমরে ওদেই দিইনে ঘেচ্চেকগুরি তর্ দেমাক্ ওইয়্যে। জিদেনার বাড়্ গর্, মাত্তর্ নিজো ঘরত্ থাগ্। কিত্তে দযাগান্ ডাগি আনিবে আর সিয়েন লগে ডাগি আনিবে নিজোর্ আর যিহূদার ভস্ত অনাগান্?” 11 মাত্তর্ অমৎসিয় সে কধাগান্দোই কান ন-পাদিলো। সেনত্তে ইস্রায়েলর রাজা যিহোয়াশে তারে আক্রমণ গুরিলো। তে আর যিহূদার রাজা অমৎসিয় যিহূদার বৈৎ-শেমশত্ একজন আরেকজনর মুজুঙো-মুজুঙি অলাক্। 12 ইস্রায়েলর আঢত্ যিহূদা পুরোপুরিভাবে উদিই গেলঅ আর পত্তিজনে নিজোর্ নিজোর্ ঘরত্ ধেই গেলাক্। 13 ইস্রায়েলর রাজা যিহোয়াশে বৈৎ-শেমশত্ অহসিয়োর নাদিন্, অত্তাৎ যোয়াশর পুয়ো যিহূদার রাজা অমৎসিয়রে বন্দী গুরিলো। সে পরেন্দি যিহোয়াশে যিরূশালেমত্ যেইনে সে জাগার দেবাল ইফ্রয়িম-গেদোত্তুন্ কোণাবোর্ গেট্টো সং পেরায় চেরশ আত্ লাম্বা এক ভাগ ভাঙি দিলাক্। 14 লগেপ্রভুর ঘরত্ আর রাজঘরর্ ধনভান্ডালত্ যেদক্কানি সোনা, রূবো আর অন্য পযাপিরা এলঅ তে সিয়েনি বেক্কানি নেযেল। ইয়েনিবাদে তে বন্ধক্ ইজেবে কয়েক্কো মান্জ্যরে লোইনে শমরিয়াত্ ফিরি গেলঅ। 15 যিহোয়াশর অন্য বেক্ কামর্ কধানি, যুদ্ধোত্ তার্ জিদেনার্ কধানি আর যিহূদার রাজা অমৎসিয়োর্ বিরুদ্ধে তার্ যুদ্ধোর্ কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। 16 যেরেন্দি যিহোয়াশে তার্ পূরোণিমানুচ্চুনোর্ ইদু গেলগোই আর তারে শমরিয়াত্ ইস্রায়েলর রাজাগুনো লগে গারা অলঅ। তা পুয়োবো যারবিয়ামে তা জাগানত্ রাজা অলঅ। 17 ইস্রায়েলর রাজা যিহোয়াহসর পুয়ো যিহোয়াশর মরাণার পরেন্দি যিহূদার রাজা যোয়াশর পুয়ো অমৎসিয় আরঅ পনর বজর বাঁজি এলঅ। 18 অমৎসিয়োর্ অন্য বেক্ কামর্ কধানি “যিহূদার রাজাগুনোর বিজগ” নাঙে বোইবোত্ লেগা আঘে। 19 যিরূশালেমত্ অমৎসিয়োর্ বিরুদ্ধে কুজুরোমি গরানার্ পরেন্দি তে লাখীশোত্ ধেই গেলঅ, মাত্তর্ মানুচ্চুনে লাখীশোত্ মানুচ্ পাদেইনে তারে সিদু মারে ফেলেলাক্। 20 তার্ কিয়্যেগান ঘোড়া পিদিত্ গুরিনে যিরূশালেমত্ ফিরেই আনা অলঅ আর দায়ূদ-শঅরত্ তার্ পূরোণি মানুচ্চুনোর লগে তারে গোর্ দিয়্যে অলঅ। 21 সে পরেন্দি যিহূদার বেক্ মানুচ্চুনে অসরিয়রে তা বাপ্পো অমৎসিয়োর্ জাগানত্ রাজা বানেলাক্। সেক্কে তার্ বয়জচান্ এলদে ষুলো বজর। 22 অমৎসিয় তা পূরোণি মানুচ্চুনোর ইদু যানার্ পরেন্দি অসরিয় এলৎ শঅরান্ আরঅ বানেল আর যিহূদার অধীনোত্ আনিলো। ইস্রায়েলর রাজা দ্বিলম্বর যারবিয়াম 23 যিহূদার রাজা যোয়াশর পুয়ো অমৎসিয়োর্ রাজাগিরির্ পন্দর্ বজরত্ ইস্রায়েলর রাজা যিহোয়াশর পুয়ো যারবিয়ামে শমরিয়াত্ রাজা অলঅ আর তে একচোল্লিশ বজর্ রাজাগিরি গোজ্যে। 24 লগেপ্রভুর চোগেন্দি যিয়েনি গম্ নয় তে সিয়েনি গুরিদো আর নবাটর পুয়ো যারবিয়ামে ইস্রায়েলরে দিইনে যেদক্কানি পাপ গোরেয়্যে তে সে পাপ্পানি গরা ধুরিলো। 25 ইস্রায়েলর গোজেন লগেপ্রভু তা চাগর্ গাৎ-হেফরর্ অমিত্তয়র পুয়ো ভাববাদী যোনার মাধ্যমে যে কধাগান কোইয়্যে সে কধা মজিম্ যারবিয়ামে হমাৎ চাগালাত্তুন্ অরাবার দোজ্যে সাগর্ সং আগেন্দি ইস্রায়েলর রেজ্যর্ যে দুযিগান্ এলঅ সিয়েন্ আরঅ নিজোর্ গজকত্ ফিরেই আনিলো। 26 ইয়েন কারণান্ অলঅ, লগেপ্রভু দেখ্যেদে ইস্রায়েল গিরোজ্ বা চাগর্ বেক্কুনে অমকদ দুখ্ পাদন্; কনজনে তারারে বল্ দিবাত্তে ন-এলাক্। 27 লগেপ্রভুর আওজ ন-এলঅ, আগাজ তলেত্তুন্ ইস্রায়েলর নাঙান্ তে পুজি ফেলেব। সেনত্তে তে যিহোয়াশর পুয়ো যারবিয়ামর মাধ্যমে তারারে উদ্ধোর্ গুরিলো। 28 যারবিয়ামর অন্য বেক্ কাম কধানি, যুদ্ধোত্ তার্ জিদেনার্ কধানি আর এক সময়োত্ যিহূদার গজগত্ থেইয়্যে দামেস্ক আর হমাৎ কেধোক্ক্যেনগুরি তে ইস্রায়েলত্তে আরঅ গজক্ গুরি নেযেয়্যে সে কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। 29 পরেন্দি তে তা পূরোণি মানুচ্চুনোর্ ইদু, অত্তাৎ ইস্রায়েলর রাজাগুনো ইদু গেলগোই আর তা জাগানত্ তার্ পুয়ো সখরিয় রাজা অলঅ। |
Copyright © 2021 Bangladesh Bible Society
Bangladesh Bible Society