২ রাজাবলী 12 - Chakma Bibleতবনা-ঘরান্ ঠিগ্ গরানা 1 যেহূর রাজাগিরির সাত বজরত্ যোয়াশে রাজা ওইয়্যে আর তে যিরূশালেমত্ চোল্লিশ বজর রাজাগিরি গোজ্যে। তা মাবোর্ নাঙান্ এলদে সিবিয়া; তে এলদে বের্-শেবা শঅর ঝি। 2 ধর্মগুরু যিহোয়াদা যেদকদিন যোয়াশর সল্লা দিয়্যে এলঅ সেদকদিন যোয়াশে লগেপ্রভুর চোগোত্ যিয়েনি গম্ সিয়েনি গোজ্যে। 3 মাত্তর্ তবনা ঘরর্ অজল জাগায়ানি ভস্ত গরা ন-অয়; মানুচ্চুনে সেক্কেয়ো সিদু য়েমান্ উৎসর্ব গুরিদাক্ আর পৌইরেগ্ জ্বালেদাক্। 4 যোয়াশে ধর্মগুরুগুনোরে কলঅ, “লগেপ্রভুর ঘরত্ পবিত্র দান ইজেবে যিদুক্কুন্ টেঙা আনা অয় তুমি সিগুন্ জমা গরঅ। সিগুন্ অলঅ-মানুচ্ গুণিবার সময়োত্ আন্যে টেঙা, মান্যে-ছিড়েবাত্তে আন্যে টেঙা আর তবনা-ঘরত্ নিজোর্ আওজে আন্যে টেঙা। 5 পত্তি ধর্মগুরুয়্যে যেনে তা মানুচ্চুনোত্তুন্ টেঙা নেযান্ আর তবনা-ঘরর্ ভাঙা জাগায়ানি ঠিগ্ গুরিবার্ কামত্ সিগুন্ বেবহার গরন্।” 6 মাত্তর্ যোয়াশর রাজাগিরির তেইশ বজরত্ দেগা গেলদে ধর্মগুরুগুনে সেক্কেয়ো তবনা-ঘরর্ ঠিগ্ গুরিবার কামানি ন-গরন্। 7 সেনত্তে রাজা যোয়াশে ধর্মগুরু যিহোয়াদা আর অন্য ধর্মগুরুগুনোরে ডাগিনে পাদেল আর পুযোর্ গুরিলো, “তুমি উবোসনা-ঘরর ভাঙা জাগানি ঠিগ্ ন-গরঅ কিত্তে? তুমি তমার্ মানুচ্চুনোত্তুন্ টেঙা লোইনে আর নিজো ইদু ন-রাগেবা বরং তবনা-ঘরর্ ঠিগ্ গরেদে কামত্ সিয়েনি দি দিবা।” 8 ধর্মগুরুগুনে রাজী অলাক্, তারা মানুচ্চুনোত্তুন্ টেঙা লোইনে আর নিজো ইদু ন-রাগেবাক্ আর নিজেই তবনা-ঘরর্ ঠিগ্ গরেদে কামঅ ন-গুরিবাক্। 9 ধর্মগুরু যিহোয়াদা সেক্কে এক্কো বাক্সু লোইনে সিবের্ ঢাগনিগানত্ এক্কো কানা গুরিলো। তে সিবে পূজোবোর্ কায়কুরে লগেপ্রভুর ঘরত্ সুমিবার জাগানত্ ডেনেন্দি রাগেল। যে ধর্মগুরুগুনে তবনা-ঘরত্ সুমিবার্ দোরানত্ চুগি দিদাক্ তারা লগেপ্রভুর ঘরত্ আন্যে বেক্ টেঙাগুন্ সে বাক্সুবোত্ রাগেদাক্। 10 এধোক্ক্যেন্ গুরিনে যেক্কে তারা দেগিদাক্ সে বাক্সুবোত্ বালুক্কুন্ টেঙা জমা ওইয়োন্ সেক্কে রাজার মানুচ্চুনে আর ধর্মগুরুগুনে এইনে লগেপ্রভুর ঘরত্ আন্যে টেঙাগুন্ গুণিনে ঝলাত্ রাগেদাক্। 11 কয় টেঙা ওইয়োন্ সিগুন্ গুণিবার্ পরেন্দি তারা সে টেঙাগুন্ লগেপ্রভুর ঘরর কামানি চেইদিয়্যে মানুচ্চুনো আঢত্ দিদাক্। সে টেঙাগুন্দোই তারা লগেপ্রভুর ঘর সোর্গুরিয়্যে মানুচ্চুনোরে, অত্তাৎ গাজঅ মিস্ত্রি, ঘর বানাইদে মিস্ত্রি, 12 রাজমিস্ত্রি আর পাত্তর্ কাবিবার মিস্ত্রিগুনোরে বেতন্ দিদো। ইগুন্বাদে লগেপ্রভুর ঘর সোর্ গরেদে কামত্তে তারা তক্তা আর সং গুরি কাপ্যে পাত্তরুন্ কিনিদাক্ আর সে কামত্তে আর যিয়েনি যিয়েনি লাগিদো সিয়েনিত্তে খরচ্ গুরিদাক্। 13 তবনা-ঘরত্ যে টেঙাগুন্ আনা অদঅ সিগুন্দোই রূবোর্ কাপ, চেরাগ বুদ্ধি কাজেবার্ চিম্টিগান, চেরাক্কো, তূরী বা লগেপ্রভুর ঘর সোনা-রূবোর অন্য কনঅ পিলে বানা ন-অয়। 14 চেইদিয়্যেগুনে সে টেঙাগুন্ মিস্ত্রিগুনোরে দিদাক্ যেনে তারা তবনা-ঘর সোর্গরেদে কামত্ বেবহার গুরি পারন্। 15 সে চেইদিয়্যেগুনোর্ ইত্তুন্ ইজেব নেযেবার্ দরকার ন-অদঅ, কিত্তে তারা পুরোপুরি বিশ্বেজ্ গুরিনে কাম্ গুরিদাক্। 16 দুষ-উৎসর্বর আর পাপ-উৎসর্বর টেঙাগুন্ লগেপ্রভুর ঘর বাক্সুবোত্ ন-রাগেদাক; সিগুন্ অদঅ ধর্মগুরুগুনোর ভাগ। 17 এ সময়োত্ অরামর রাজা হসায়েলে যেইনে গাৎ আক্রমণ গুরিনে সিয়েন্ গজক গুরি নেযেল। সে পরেন্দি তে যিরূশালেমান্ আক্রমণ গুরিবাত্তে উজেই গেলঅ। 18 সেক্কে যিহূদার রাজা যোয়াশে তার্ নিজোর্ আর তা পূরোণি মানুচ্চুনোর, অত্তাৎ যিহূদার রাজা যিহোশাফট, যিহোরাম আর অহসিয়োর দিয়্যে লগেপ্রভুর নাঙে যুদো গোজ্যে বেক্ পযাপিরানি অরামর রাজা হসায়েল ইদু পাধেই দিলো। ইয়েনিবাদে সে সমারে তে লগেপ্রভুর ঘর ধনভান্ডালত আর রাজঘর বেক্ সোনাগানিয়ো তাইদু পাধেই দিলো। সেক্কে হসায়েলে যিরূশালেমান্ ছাড়ি গেলগোই। 19 যোয়াশর অন্য বেক্ কাম কধানি “যিহূদার রাজাগুনোর বিজগ” নাঙে বোইবোত্ লেগা আঘে। 20 তা কামগুরিয়্যেগুনে তা বিরুদ্ধে কুজুরোমি গুরিনে সিল্লা যেবার্ পথ্তানত্ বৈৎ-মিল্লোদত তারে মারে ফেলেলাক্। 21 যে কামগুরিয়্যেগুনে তারে মারে ফেল্যন্ তারা অলাক্ শিমিয়তর পুয়ো যোষাখর আর শোমরর পুয়ো যিহোষাবদ। যোয়াশে মুরি যানার্ পরেন্দি দায়ূদ-শঅরত্ তা পূরোণি মানুচ্চুনোর্ লগে তারে গোর্ দিয়্যে অলঅ। তা জাগানত্ তা পুয়োবো অমৎসিয় রাজা অলঅ। |
Copyright © 2021 Bangladesh Bible Society
Bangladesh Bible Society