২ করিন্হীয় 8 - Chakma Bibleদান পৌইদ্যেনে 1 ভেইলগ্, ম্যাসিডোনিয়া মন্ডলীগুন্ গোজেনত্তুন্ যে বিশেষ দোয়্যে পেইয়োন সে পৌইদ্যেনে আমি তমারে জানের্। 2 বোউত্ দুঘোত্ তারার্ জদবদে পোরোক্ষ্যে চোল্ল্যে আর যুনিয়ো তারা অমকদ নাঢা মানুচ্ এলাক্, তো তারার্ মনত্ এদক হুজী এলঅ যে, তারা খুলো আঢে দান গোজ্জ্যন্। 3 মুই তারার্ পক্ষে এ সাক্ষ্যগান্ দোঙত্তে, তারা আওজ্ গুরিনে নিজোর্ সাধ্য মজিম্, এন্ কি, সাধ্যর্ বারেদিয়ো দান গোজ্জ্যন্। 4 তারা অমকদ আওজ্ গুরিনে আমা ইধু কোজোলী গোজ্জ্যন্ যেন গোজেনর্ যে মানুচ্চুনে অভাবত্ আঘন্ তারার্ অভাব্পান দূর্ গুরিবার কামত্ তারা মিজেবার্ জু পান্। 5 আমার্ আজাত্তুন্-অ বেচ্ তারা দান গোজ্জ্যন্-তারা নিজোরে পত্তমে প্রভু ইধু আর পরেদি গোজেনর্ আওজ্ মজিম আমা ইধু দি দুয়োন্। 6 ইয়েন দেগিনে আমি তীতরে বিশেষ গুরিনে কোজোলি গোজ্জ্যেই, দান গুরিবার যে কামান্ তে তমা ইধু আরাম্ভ গোজ্জ্যে সিয়েন যেন তে থুম্ গরে। 7 বেক্কানি, অত্তাৎ বিশ্বেজ্, গোজেন পৌইদ্যেনে কবার্ খেমতা, জ্ঞান, আওজ্ আর আমা উগুরে কোচ্পানা যেবাবোত্যে তমার্ জদবদে আঘে ঠিগ্ সেবাবোত্যে দান গুরিবার্ গুণ্অ যেন তমার্ পেলেং বেঈ পড়ে। 8 এ কধাগান যে মুই উগুম্ ইজেবে কঙর্ সিয়েন নয়, মাত্তর্ অন্যগুনোর্ আয়োজর্ কধা তমারে জানেইনে মুই পোরোক্ষ্যে গুরিবার চাং তমার্ কোচ্পানাগান্ কত্তমান্ খাটি। 9 তুমি দঅ আমার্ প্রভু যীশু খ্রীষ্টর্ দোয়্যের্ কধানি কোই পারঅ, তে নিজে থাগোইয়্যে ওইনেয়ো তমাত্যে নাঢা অলঅ, যেন তার্ নাঢা অনার্ মাধ্যমে তুমি থাগোইয়্যে ওই পারঅ। 10 তমার্ পক্ষে যিয়েন গম্ সে পৌইদ্যেনে মুই মর্ মতামত্তান্ জানাঙর্। তুমি গেলদে বজর্ এ চান্দাগুন্ তুলিবাত্যে আরাম্ভ গোজ্জ্য আর সে কামত্ ভারী আওজ্ দেগেয়ো। 11 ইক্কিনে সেই কামান্ থুম্ গরঅ। তুমি যে আওজ্ নিইনে সেই কামানি গুরিবাত্যে আওজ্ গোজ্জ্য সেই একই আওজ্সোই তমার্ সাধ্যমজিম সিয়েন থুম্ গরঅ। 12 যুনি কার্অ দিবার্ আওজ্ থায় সালে তার্ যিয়েন আঘে সেই ইজেবে তার্ দানুন্ গোজেনে মানি লয়, তাত্তুন্ যিয়েন নেই সেই ইজেবে নয়। 13 মুই ন-চাং, অন্যগুনে সুগে থাদোক্ আর তুমি দুঘোত্ থাগঅ, বরং মুই চাং যেন তমার্ বেক্কুনোর্ অবস্থা সং সং-থায়। 14 ইক্কিনে তমার্ যিয়েনি বেশ্ আঘে সিয়েনিলোই তারার্ অভাব দূর্ গুরিবা, আরঅ যেক্কে তারার্ বেশ্ অবঅ সেক্কে তারা তমার্ অভাব দূর্ গুরিবাক্। এবাবোত্যেগুরি বেক্কুনোর্ অবস্থা সং সং অবঅ। 15 পবিত্র বোইবোত্ লেগা আঘে, “যিগুনে বোউত্ কুড়েলাক্ তারার্ বেশ্ ন-অলঅ আর যিগুনে কম্ কুড়েলাক্ তারার্ কম্ ন-পড়িলো।” তীতরে করিন্থত্ পাধা অলঅ 16 তমাত্যে মঅ মনানত্ যে আওজ্চান্ আঘে, ঠিগ্ সেই আওজ্চান্ গোজেনে তীতর্ মনত্অ দিয়্যে বিলিনে মুই তারে ভালেদি জানাং। 17 তীতে আমার্ কোজোলিগান্ মানি লোইয়্যে, মাত্তর্ তাত্তুন্-অ দাঙর্ কধা ইয়েন, তে নিজোর্ ইচ্ছ্যেই অমকদ আওজে তমা ইধু যার্। 18 তীত সমারে আমি আর এক ভেইয়োরেয়ো পাদের্। যীশু খ্রীষ্ট পৌইদ্যেনে গম্ হবর্ ফগদাঙর্ কামত্ বেক্ মন্ডলীগুনে এ ভেইবোরে নাঙ্ গিনি থান্। 19 এ মন্ডলীগুনে বানা যে তারে নাঙ্ গিন্নোন্ সিয়েন নয়, আমা সমারে এ দানুন্ নেযেবাত্যে মন্ডলীগুনে তারে বেঈঅ লোইয়োন। প্রভুরে বাঈনী গুরিবাত্যে আর অন্যগুনোরে সাহায্য গরানার্ কামত্ আওজ্ দেগেবাত্যে আমি এ দানুন্ নেযেবার্ বেবস্থা গুরির্। 20 এ বিরাট দানুন্ বিলি গরানা পৌইদ্যেনে কেঅ যেন আমা বিরুদ্ধে কিচ্চু কোই ন-পারন্ সেনত্যে আমি এ ভেইবোরেয়ো পাদের্। 21 আমি বানা প্রভুর্ মুজুঙোত্ নয়, মাত্তর্ মান্জ্য মুজুঙোত্অ গমেডালে চলানা ইন্দি মনযোগ্ দিই। 22 সিয়েন বাদে তারা সমারে আমি আমার্ অন্য আর এক ভেইয়োরেয়ো পাদের্। তে যে আয়োজি সিয়েন তে ভালোক্কানি পৌইদ্যেনে বোউত্ বার্ আমা ইধু প্রমাণ গোজ্জ্যে। ইক্কিনে তমা উগুরে তার্ ভারি বিশ্বেজ্ ওইয়্যে বিলি তে আরঅ আয়োজি ওইয়্যে। 23 তীত পৌইদ্যেনে মর্ যিয়েন কবার্ আঘে সিয়েন এই-তে মর্ সমাজ্জ্যে আর মঅ লগে তে তমাত্যে কাম্ গরের্। আর অন্য ভেইয়ুনো পৌইদ্যেনে মর্ যিয়েন কবার্ আঘে সিয়েন এই-মন্ডলীগুনে তারারে বেঈ লোইনে পাধাদন্। এ ভেইয়ুনোর্ মাধ্যমে খ্রীষ্টরে বাঈনী গরা অয়। 24 সেনত্যে কোই, তারা ইধু খুলোমেলা গুরি তমার্ কোচ্পানার্ প্রমাণ দুয়ো আর তারারে দেগেয়ো কিত্যে তমারে নিইনে আমি দেমাগ্ গুরিই, যাতে মন্ডলীগুনে সিয়েন দেগন্। |
Copyright © 2021 Bangladesh Bible Society
Bangladesh Bible Society