২ করিন্হীয় 5 - Chakma Bible

¹ আমি এ কধাগান্ কোই পারিই যে, এ পিত্‌থিমীত যে তাম্বুলানত্ আমি বজত্তি গুরির্, অত্তাৎ যে বল্‌পোজ্যে কিয়্যেগানিলোই আমি আঘিই সিয়েন যুনি বর্‌বাদ ওই যায় তো গোজেনর্ দিয়্যে এক্কান্ ঘর আমার আঘে। এ ঘরান্ মান্‌জ্যর্ আঢে বানেইয়্যে নয়, সিয়েন স্বর্গত্ উমরত্যে আঘে।

² এ কিয়্যেগানত্ থানা অবস্থায় আমি ব নিজেচ্‌ ফেলের্ আর বেক্‌ মনান্দোই চাঙর্ যেন র্স্বগর্ সেই নুয়ো কিয়্যেগান্দোই আমারে নাঢা অয়;

³ কিয়া এ কধাগান সত্য যে, সেই কিয়্যেগান্ পানার্ পরেদি দেগা যেবদে যে, আমি লাংদা নয়।

⁴ ঘেচ্চ্যেকগুরি এ বল্‌পোজ্যে কিয়্যেগানত্ থানা অবস্থায় আমি কিয়্যে ভারে ব নিজেচ্‌ ফেলের্। আমি যে কিয়্যে নেইয়্যে অবাত্যে চেই সিয়েন নয়, বরং সেই নুয়ো কিয়্যেগানিলোই ঢাগিবাত্যে চেই, যেন আমার মরণর্ অধীন কিয়্যেগানি উমরত্যে জেদা থানা কিয়্যেগানি বুদুলি যায়।

⁵ ইয়েনত্যে গোজেনে আমারে বানেয়্যে আর তার্ পত্তম্ ভাগ্ ইজেবে তে পবিত্র আত্মাগান আমারে দিয়্যে।

⁶ ইয়েনত্যে কনদিন্অ আমার্ সাহজর্ অভাব ন-অয়, আর আমি বুঝি পাজ্জ্যেই যে, যেদক্ দিন আমি এ কিয়্যেগানর্ ঘরত্ বজত্তি গুরিবোং সেদক দিন প্রভুত্তুন্ দূরোত্ থেবং।

⁷ যিয়েন দেগা যায় আমি দঅ সিয়েন্দোই ন-চলিই, বরং বিশ্বেজ্‌চোই আঢাউদো গুরিই।

⁸ আমাত্তুন্ সাহচ্‌ আঘে আর আমি কিয়্যেগানি ঘরত্তুন্ দূর্ ওইনে প্রভু সমারে বজত্তি গরানা গম্ মনে গুরিই।

⁹ সেনত্যে আমি কিয়্যেগানর্ ঘরানত্ বজত্তি গুরিই বা ন-গুরিই, আমার্ উদ্দেচ্য অত্তে প্রভুরে হুজী গরানা।

¹⁰ ইয়েনর্ কারণান্ অলঅ, খ্রীষ্টর বিচের-আসন মুজুঙোত্ আমা বেক্কুনোর্ বেক্কানি ফগদাং গরা অবঅ, যেন আমি বেক্কুনে এ কিয়্যেগানিত্ থাগদে যিয়েনি গোজ্জ্যেই, সিয়েনি গম ওক্‌ বা ভান্ন্যেই ওক্‌, সেই ইজেবে সিয়েনির পাওনা পেই।

গোজেন সমারে মিজেনা

¹¹ প্রভুরে দোরেই বিলিনে আমি নিজো পৌইদ্যেনে মান্‌জ্য মনত্ বিশ্বেজ্ জোর্মেবার চেষ্টা গুরিই। আমি যেবাবোত্যে, সিয়েন দঅ গোজেন ইধু খুলোমেলা আর মুই আজা গরং তমা বিবেগ ইধুয়ো সিয়েন খুলোমেলা।

¹² ইয়েন্দোই খালিক্ আমি তমা ইধু আরঅ নিজোরে নাঙ্ ন-গিনির্ বরং আমারে নিইনে তমার্ দেমাগ্ দেগেবার কারণ দেগের্, যেন মনান্ ন-দেগিনে যিগুনে বারেদি চেঙেরাগান্ দেগিনে দেমাগ্ দেগান্ তারারে তুমি এক্কান্ জোব্ দি পারঅ।

¹³ যুনি আমি পাগল্ ওই যেই সালে সিয়েন গোজেনত্যে ওইয়্যেই, আর যুনি গম্ মনে থেই সালে সিয়েন তমাত্যে আঘিই।

¹⁴ খ্রীষ্টর্ কোচ্‌পানাগানে আমারে পুচ্ মানিনে চালার্, কিয়া আমি ঘেচ্চ্যেকগুরি বুঝ্‌চেই যে, বেক্কুনোর্ ওইনে একজনে মুরিলো, আর সেনত্যে বেক্কুনে মুরিলাক্।

¹⁵ তে বেক্কুনোর্ ওইনে মুরিলো যেন যিগুনে জেদা আঘন্ সিগুনে আর নিজোত্যে বাঁজি ন-থান্; বরং যে তারাত্যে মুরিলো আর জেদা ওইয়্যে তাত্যেই বাঁজি থান্।

¹⁶ সেনত্যে ইক্কেত্তুন্ ধুরি মান্‌জ্যরে আমি আর্ তার বারেদি অবস্থাগান্ দেগিনে বিচের্ ন-গুরিই। খালিক্ খ্রীষ্টরে আমি আগেদি সেবাবোত্যেগুরি বিচের্ গোজ্জ্যেই, মাত্তর্ ইক্কিনে আর সিয়েন ন-গুরিই।

¹⁷ যুনি কেঅ খ্রীষ্ট সমারে মিজেই থায় সালে তে নুয়ো গুরিনে সৃট্টি অলঅ। তার্ পুরোণি বেক্কানি ভুলি যেইনে বেক্কানি নুয়ো ওই উত্ত্যে।

¹⁸ ইয়েনি বেক্কানি গোজেনত্তুন্ অয়। তে খ্রীষ্টর্ মাধ্যমে তার্ নিজো সমারে আমারে এগত্তর্ গোজ্জ্যে, আর তা সমারে অন্যগুনোরে মিলেই দিবার্ কামান্ আমা উগুরে দিয়্যে।

¹⁹ ইয়েনর্ অত্তগান অলঅ, গোজেনে মান্‌জ্যর্ পাপ্পানি ন-ধুরিনে খ্রীষ্টর্ মাধ্যমে নিজো সমারে মান্‌জ্যরে মিলেই দিয়্যে, আর সেই মিজেনার্ হবরান্ জানেবার ভারান্ তে আমা উগুরে দিয়্যে।

²⁰ সেনত্তে আমি খ্রীষ্টর্ দূত ইজেবে তার্ ওইনে কধা কোর্। আসলে গোজেনে যেন নিজে আমা মাধ্যমে মানুচ্চুনো ইধু কোজোলী গরের্। সেনত্তে খ্রীষ্টর্ ওইনে আমি এ কোজোলীগান গুরির্, “তুমি গোজেন সমারে মিজো।”

²¹ যীশু খ্রীষ্ট ইধু কনঅ পাপ্ ন-এলঅ; মাত্তর্ গোজেনে আমা পাপ্‌পানি যীশু উগুরে তুলি দিইনে তারে পাপ জাগানত্ দিলো, যেন খ্রীষ্ট সমারে মিজেইনে গোজেনর্ পবিত্রতাগান্ আমার পবিত্রতাগান্ অয়।