২ বংশধর 8 - Chakma Bibleশলোমনর্ অন্য কামানি 1 লগেপ্রভুর ঘরান আর তার্ নিজোর্ ঘরান বানাদে শলোমনর্ কুড়ি বজর্ সময় লাক্ক্যে। 2 হীরমে যেদক্কানি আদাম তারে দিয়্যে শলোমনে সে কুড়ি বজর শেজন্দি সিয়েনি আরঅ ঠিগ্ গুরিলো আর ইস্রায়েলীয়গুনোরে সিদু বজত্তি গুরিবাত্তে দিলো। 3 সে পরেন্দি শলোমনে হমাৎ-সোবাত ইদু যেইনে সিয়েন্ গজক্ গুরি নেযেল। 4 তে ধূল্যেচর-চাগালাত্ তদ্মোর শঅর আর হমাৎ চাগালার বেক্ ভান্ডাল-শঅরানি আরঅ বানেল। 5 তে উগুরের বৈৎ-হোরোণ আর তলেন্দি বৈৎ-হোরোণত্ গেট্টো আর রোক্ষ্যে গুরিবার দেবাল্ বানেইনে সিয়েন্ দরমর গুরিলো। 6 তে বালৎ শঅর্ আর তার্ বেক্ ভান্ডাল-শঅরানি বানেল আর রথ আহ্ ঘোড়াসৈন্যগুনোত্তে কয়েক্কান্ শঅর্ বানেল। যিরূশালেমত্, লেবাননত্ আর তার্ শাজনর্ অধীনোত্ যেদক্কানি রেজ্য এলঅ সিয়েনি ভিদিরে তে যিয়েনি যিয়েনি বানেবাত্তে চেইয়্যে সিয়েনি বেক্কানি গুরিলো। 7 যিগুনে ইস্রায়েলীয় ন-এলাক্, অত্তাৎ যিদুক্কুন্ হিত্তীয়, ইমোরীয়, পরিষীয়, হিব্বীয় আর যিবূষীয়গুনোর বংশধরুনে সেক্কেয়ো দেজত্ বাঁজি এলাক্, 8 যিগুনোরে ইস্রায়েলীয়গুনে ভস্ত ন-গরন্ শলোমনে তারারে চাগর্ ইজেবে কাম্ গুরিবাত্তে বাধ্য গোজ্যে। তারা এজঅ সং সে কামানি গত্তন্। 9 মাত্তর্ তা কামানি গুরিবাত্তে ইস্রায়েলীয়গুনোরে তে চাগর্ ন-বানায়; তারা এলাক্কে তার্ যুদ্ধোগুরিয়্যে, তার্ সেনাপতি আর তার্ রথচালেয়্যে আর ঘোড়া বাহিনী গুনোর সেনাপতি। 10 ইগুনবাদেয়ো রাজা শলোমনর্ দ্বিশঅ পঞ্চাশ জন আজল্ কামগুরিয়্যে এলাক্ যিগুনে চাগরুনো কামত্ চেক্ দিদাক্। 11 শলোমনে ফরৌণ ঝিবোত্তে যে ঘরান্ বানেয়্যে তে দায়ূদ-শঅরত্তুন্ তারে আনিলো। তে কলঅ, “মঅ মোক্কো ইস্রায়েলর রাজা দায়ূদোর রাজঘরত্ ন-থেবঅ, কিত্যে যেদক্কানি জাগাত্ লগেপ্রভুর সুন্দুক্কো আনা ওইয়্যে সিয়েনি পবিত্র।” 12 উবোসনা-ঘরর্ আস্ছালার্ মুজুঙোত্ শলোমনে লগেপ্রভুর যে ডালিপূজোবো বানেয়্যে তা উগুরে তে লগেপ্রভুর নাঙে পূজ্যে-উৎসর্বর অনুষ্ঠান গুরিদো। 13 মোশির উগুম্ মজিম তে জিরেবার্ দিনোত্, আঙোস্যেত্ আর বজরর্ তিন্নো পরবত্, অত্তাৎ সদানেইয়্যে রুটির পরবত্, সাত-সাপ্তার পরবত্ আর নাদা মান্জ্যর-ঘরর্ পরবত্-সেই বেক্ দিনুনোর্ সুদোম মজিম উৎসর্বর অনুষ্ঠান গুরিদাক্। 14 তা বাপ্পো দায়ূদোর উগুম্ মজিম তে ধর্মগুরুগুনোর কামানি গুরিবাত্তে তারারে নানান্ দলত্ ভাগ গুরিনে কামত্ নেযেল আর পত্তিদিনোর্ কাম্ মজিম নাঙ্ গিনেদে-গান গুরিবার আর ধর্মগুরুগুনোরে বল্ দিবাত্তে তে লেবীয়গুনোরে নেযেল। পত্তি গেদোট্টে তে রক্ষীগুনোর্ দল্ মজিম কামত্ লাগেল, কিত্যে এধোক্ক্যেন গুরিনে গোজেনর মানুচ্ দায়ূদে উগুম্ দি যেইয়্যে। 15 রাজা দায়ূদে ভান্ডালর্ কনঅ পৌইদ্যেনে আর অন্য যে কনঅ পৌইদ্যেনে ধর্মগুরুগুনোরে আর লেবীয়গুনোরে যে উগুমানি দি যেইয়্যে সিয়েনি তারা অমান্য ন-গুরিলাক্। 16 লগেপ্রভুর ঘরর্ মূল্ খুদোবোত্তুন্ আরাম্ভ গুরিনে সিবে থুম্ গুরিবার দিন্নো সং শলোমনর্ বেক্ কামানি গমেডালে গরা ওইয়্যে। এধোক্ক্যেন গুরিনে লগেপ্রভুর ঘর বানেবার্ কামানি থুম্ অলঅ। 17 সে পরেন্দি শলোমনে ইদোম দেজ সাগর-পারর্ ইৎসিয়োন-গেবরত্ আর এলতত্ গেলঅ। 18 হীরমে তার্ নিজো মানুচ্চুনোর্ মাধ্যমে শলোমনরে কয়েক্কান্ জাহাজ আর কয়েক্কো কাবিল্ জাহাজ চালেয়্যে পাধেই দিলো। ইগুনে শলোমন মানুচ্চুনো লগে ওফীরোত্ যেইনে সাড়ে সতর টন সোনা আনিনে রাজা শলোমনরে দিলাক্। |
Copyright © 2021 Bangladesh Bible Society
Bangladesh Bible Society