২ বংশধর 11 - Chakma Bible1 যিরূশালেমত্ লুমিনে রহবিয়ামে যিহূদা আর বিন্যামীন-গুট্টির বেক্ মানুচ্চুনোরে যুদ্ধোত্তে এগত্তর্ গুরিলো। সেক্কে এক লাখ্ আশি আজার সৈন্য অলাক্। ইয়েন্ গরা অলঅ যেনে ইস্রায়েলীয়গুনো লগে যুদ্ধো গুরিনে রেজ্যগান্ আরঅ রহবিয়াম আঢত্ আনা যায়। 2 মাত্তর্ গোজেন মানুচ্ শময়িয়র ইদু লগেপ্রভুর এ কধাগান ফগদাঙ্ অলঅ, 3 “তুই যিহূদার রাজা শলোমন পুয়ো রহবিয়ামরে আর যিহূদা আর বিন্যামীন চাগালার্ বেক্ ইস্রায়েলীয়গুনোরে কোইদ্যে, 4 লগেপ্রভু কোইয়্যেদে তারা যেনে তারার্ ভেইয়ূনো বিরুদ্ধে যুদ্ধো গুরিবাত্তে ন-যান্। তারা পত্তিজনে যেনে ঘরত্ ফিরি যান্, কিয়া ইয়েন্ লগেপ্রভুর্ কাম্।” সেনত্তে তারা লগেপ্রভুর কধাগান্ মানিনে যারবিয়াম বিরুদ্ধে যুদ্ধো গুরিবাত্তে ন-গেলাক্। রহবিয়ামে যিহূদা দেজ্ছানরে রোক্ষ্যে গুরিলো 5-6 রহবিয়ামে যিরূশালেমত্ বজত্তি গরা ধুরিলো আর যিহূদা দেজ্ছানরে রোক্ষ্যে গুরিবাত্তে বৈৎলেহমত্, ঐটম, তকোয়, 7 বৈৎ-সূর, সোখো, অদুল্লম, 8 গাৎ, মারেশা, সীফ, 9 অদোরয়িম, লাখীশ, অসেকা, 10 সরা, অয়ালোন আর হিব্রোণ নাঙে যিহূদা আর বিন্যামীন চাগালার্ কয়েক্কান্ আদাম আর শঅর্ দেবাল্লোই ঘিরিনে দরমর গুরিলো। 11 তে সিয়েনি রোক্ষ্যে গুরিবার বেবস্থাগান্ দরমর গুরিলো আর সিদু সেনাপতিগুনোরে রাগেল। তে সিদু তারাত্তে হানা-দানা, জলপাইয়-তেল আর আংগুর-রস জমা গুরিলো। 12 তে সিদুগোর বেক্ আদামানিত্ আর শঅর ভিদিরে ঢাল আর জাদি রাগেইনে সিয়েনি জদবদে দরমর গুরিলো। এধোক্ক্যেন গুরিনে যিহূদা আর বিন্যামীন চাগালাগান্ তা অধীনোত্ থেলঅ। 13 ইস্রায়েলর পুরো চাগালাগানর ধর্মগুরুগুনে আর লেবীয়গুনে তা তপ্পেন্দি এলাক্। 14 লেবীয়গুনে তারার্ য়েমান চোড়েবার্ মাঠ্তুন্ আর সোম্বোত্তিগানি ছাড়িনে যিহূদা আর যিরূশালেমত্ এলাক্, কিত্তে যারবিয়ামে আর তা পুয়োগুনে লগেপ্রভুর ধর্মগুরু পোজিশনানত্তুন্ তারারে বাদ দি দিলো। 15 যারবিয়ামে উবোসনার্ অজল্ জাগাগানিত্তে আর ভান্ন্যেই আত্মাগুনোত্তে আর তার্ বানেয়্যে গোরু ছঅ মূত্তিগুনোত্তে তার্ নিজোর্ ধর্মগুরুগুনোরে নেযেল। 16 ইস্রায়েলর পুরো গুট্টিগুনো ভিদিরে যিগুনে ইস্রায়েলর গোজেন লগেপ্রভুর আওজ্চান্ জানিবাত্তে আওজি ওইয়োন্ তারা তারার্ পূরোণি মানুচ্চুনোর্ গোজেন লগেপ্রভুর নাঙে উৎসর্ব গুরিবাত্তে লেবীয়গুনোর লগে যিরূশালেমত্ এলাক্। 17 তারা তিন বজর সং যিহূদা রেজ্য আর শলোমনর্ পুয়ো রহবিয়ামর আঢ্তানরে দরমর গুরি তুলিলাক্, কিত্তে এ তিন বজর সং তারা দায়ূদ আর শলোমন পধেন্দি চোল্যন্। রহবিয়ামর গিরি 18 রহবিয়ামে দায়ূদো পুয়ো যিরীমোতর ঝি মহলতরে লল। মহলতর মা অবীহয়িলে এলদে যিশয়র পুয়ো ইলীয়াবর ঝি। 19 মহলতর পেদত্ যিয়ূশ, শমরিয় আর সহম নাঙে তিন্নো পুয়োর্ জর্ম ওইয়্যে। 20 সে পরেন্দি রহবিয়ামে অবশালোম ঝি মাখারে লল। তা পেদত্ অবিয়, অত্তয়, সীষ আর শলোমীতর জর্ম ওইয়্যে। 21 রহবিয়ামে তার্ অন্য মোক্কুন্ আর দ্বিতীয় ঘর মোক্কুনোত্তুন্ অবশালোম ঝি মাখারে বেশ্ কোচ্পেদঅ। তার্ বেক্কুনে আদারবো মোক্ আর ষায়েট্টো দ্বিতীয় ঘর মোক্, আদেশছুয়ো পুয়ো আর ষায়েট্তো ঝি এলাক্। 22 রহবিয়ামে মাখার পুয়ো অবিয়রে রাজা বানেবার্ আওজ্ গুরিনে তারে তা ভেইয়ূনো ভিদিরেত্তুন্ আজল্লো বানেল। 23 তার্ কয়েক্কো পুয়োরে তে যিহূদা আর বিন্যামীনর পূরো চাগালার্ দেবাল-ঘিজ্যে শঅরত্ পাধেই দিইনে বুদ্ধিবলা মান্জ্যর কাম্ গুরিলো। তে তারারে বোউত্ হানা-দানা দিলো আর তারাত্তে ভালোক্কুন্ মোগোর্ বেবস্থা গুরিলো। |
Copyright © 2021 Bangladesh Bible Society
Bangladesh Bible Society