১ শমূয়েল 27 - Chakma Bibleপলেষ্টীয়গুনোর দেজত্ দায়ূদ 1 দায়ূদে মনে মনে ভাবিলো, “এই শৌলর আঢদই মত্তুন্ একদিন মরা পুরিবো, সেনত্যেই পলেষ্টীয়গুনোর দেজত্ ধেই যানাগানই মর্ পক্ষেন্দি বেগত্তুন্ গম্ অবঅ। সালে ইস্রায়েল দেজ ভিদিরে তে আর মরে তোগেইনে ন-বেড়েব, আর মুইয়ো তার আঢত্তুন্ রোক্ষ্যে পেম্।” 2 ইয়েন ভাবিনে দায়ূদে তা সমারে ছয়শঅ মানুচ্ নেযেইনে সেই জাগায়ান ছাড়িনে মায়োকর পূঅ আখীশোর ইদু গেলঅ। আখীশ এলদে গাতর রাজা। 3 দায়ূদ আর তার মানুচ্চুনে গাদত্ আখীশোর ইদু বজত্তি গরা ধুরিলাক্। তা মানুচ্চুনোর পত্তিজনর লগে এলদে তারার গিরি, আর দায়ূদোর লগে এলাক্ তার দ্বিবে মোক্, যিষ্রীয়েল আদামর অহীনোয়ম আর কর্মিল আদামর অবীগলে। অবীগল এলদে নাবলর্ নেক্ নেইয়্যে মোক্কো। 4 শৌল যেক্কে হবর্ পেলঅ, দায়ূদে গাদত্ ধেই যেইয়্যে সেক্কে তে তার তগানাগান্ বন্ধ গুরি দিলো। 5 একদিন্যে দায়ূদে আখীশরে কলঅ, “তুই যুনি মঅ উগুরে হুজি ওই থাস্ সালে এ দেজর্ কনঅ এক্কান আদামত্ মরে কিজু জাগা দে যেনে মুই সিয়েনত্ যেইনে বজত্তি গুরি পারং। তর্ এ চাগর্বো কিত্তে তর্ লগে রাজধানিত্ বজত্তি গুরিবো?” 6 সেক্কে আখীশে সিক্লগ শঅরান্ দায়ূদোরে দান গুরিলো। সেক্কেত্তুন্ ধুরি এজঅ সিক্লগ শঅরান্ যিহূদার গজগত্ আঘে। 7 দায়ূদে পলেষ্টীয়গুনোর দেজত্ এক বজর্ চের্ মাস এলঅ। 8 সেই সময়ান ভিদিরে তে তার মানুচ্চুনোরে নেযেইনে গশূরীয়, গির্ষীয় আর অমালেকীয়গুনোর দেজত্ লুদেবাত্তে যেইয়োন্। এ বেক্ জাদর্ মানুচ্চুনে বোউত্ দিন আগে শূরত্তুন্ মিসর সং বেক্ চাগালানিত্ বজত্তি গুরিদাক্। 9-10 দায়ূদে যেক্কে কনঅ চাগালা আক্রমণ গুরিদো সেক্কে সে জাগার্ মিলে-মরদ বেক্কুনোরে মারে ফেলেদ আর তারার্ ভেড়া, গোরু, গাধা, উট, আর কাবড়-চুগোড় লোই আনিদো। যেক্কে তে আখীশর ইদু ফিরি এদঅ সেক্কে আখীশে পুযোর্ গুরিদো, “এচ্চ্যে কুদু লুদেবাত্তে যেইয়ো?” জোবত্ দায়ূদে কলঅ, তে নেগেভ যিহূদা চাগালার্ বা যিরহমেলীয়গুনোর চাগালাত্ বা কেনীয়গুনোর চাগালাত্ যেইয়্যে। 11 দায়ূদে কনঅ মিলে বা মরদরে গাদত্ লোই এবাত্তে বাঁজেই ন-রাগেদ, কিত্যে তে মনে গুরিদো, তারা তারার পৌইদ্যেনে বেক্ কধানি জানেই দিইনে কবাক্, দায়ূদে এ কামান্ গোজ্যে। পলেষ্টীয়গুনোর দেজত্ এজানার পরেত্তুন্ ধুরি দায়ূদে বরাবরই এবাবোত্যে গুরিদো, 12 মাত্তর্ আখীশ দায়ূদোরে বিশ্বেজ্ গুরিদো আর ভাবিদো দায়ূদে এ কামানি গুরিনে তার নিজোর জাত্ ইস্রায়েলীয়গুনোর ইদু নিজোরে অমকদ ঘিনাইদে চোগোত্ তুল্যে আর সেক্কে তে জিংকানিবর্ তার চাগর্ ওই থেবঅ। |
Copyright © 2021 Bangladesh Bible Society
Bangladesh Bible Society