১ শমূয়েল 10 - Chakma Bible1 সে পরেন্দি শমূয়েলে এক্কো তেলর শিঝিরি নেযেইনে শৌলর মাদাবো উগুরে তেল ঢালি দিলো। তে তারে গালত্ চুমিনে কলঅ, লগেপ্রভু তা মানুচ্চুনো উগুরে তরে নেতা ইজেবে অভিষেগ্ গুরিলো। 2 তুই মর্ কায়-কুরেত্তুন যানার পরেন্দি এচ্চ্যে বিন্যামীন চাগালার্ দুযিত্ সেল্সহ নাঙে জাগানত্ রাহেলর গোরান কায়কুরে দ্বিজন মান্জ্যর দেগা পেবে। তারা তরে কবাক্, তুই যে গাধীগুনোরে তোগেবাত্তে নিগিল্যচ্ সিগুনোরে পাহ্ যেইয়্যে। মাত্তর্ ইক্কিনে তঅ বাপ্পো গাধীগুনোর চিদেচজ্জা ছাড়ি দিইনে তর্ চিন্তেত্ পোজ্যে। তে কোইয়্যেদে, তার পূঅবো পৌইদ্যেনে ইক্কিনে তে কি গুরিবো? 3 সে পরেন্দি তুই সিয়োত্তুন উজেই যেইনে তাবোর চাগালার্ এলোন গাজর্ কায়কুরে গেলে দেগিবেদে তিনজন মানুচ্ গোজেনর উবোসনাত্তে বৈথেলত্ উদি যাদন্। তুই দেগিবে, তারার একজনে তিন্নো ছাগলর ছঅ, আর একজনে তিনেন্ পিদে আর আরেকজনে এক্কো পিলেলোই আংগুর-রস বুয়োই নেযাদন্। 4 তারা তরে ভালেদি জানেইনে দ্বিয়েন রুটি দিবাক্ আর তুই সিয়েনি তারার আঢত্তুন নিবে। 5 সে পরেন্দি তুই গিবিয়োৎ-হা-এলোহিম শঅরত্ যেবে। সিয়েনত পলেষ্টীয় সৈন্যগুনোর এক্কান তাম্বুল্ আঘে। শঅরত্ লুমোনার পরেন্দি এন্ এক ঝাক্ ভাববাদী সমারে তর্ দেগা অবঅ যিগুনে গোজেনর দিয়্যে কধা কদে কদে উবোসনার উজু জাগাত্তুন্ লামি এচ্ছোন। তারার দলর্ মুজুঙো মানুচ্চুনে বীণা, জুড়ি আর বাঁশি আর হার্মোনি বাজাদে বাজাদে আদিবাক্। 6 সেক্কে লগেপ্রভুর আত্মাগান পুরোপুরিভাবে তরে নিজোর অধীনোত্ আনিবো, আর সেক্কে তুইয়ো তারার লগে গোজেনর দিয়্যে কধা কবে। সেক্কে তুই অন্য বাবোত্যে মানুচ্ ওই যেবে। 7 এদক্কানি চিহ্নো ঘদানার পরেন্দি তর্ সেক্কে যিয়েনি গরানা উজিত্ তুই সিয়েনিই গুরিচ; গোজেনে তঅ লগে থেবঅ। 8 “তুই মর্ আগেন্দি লামিনে গিল্গলত্ যাহ্। মুই পুজ্যে-উদোলোলি-উৎসর্বর অনুষ্ঠান গুরিবাত্তে তইদু এচ্ছোং। মুই ন-এজানা সং তুই সাত দিন সং মত্তে বাজ্জেই থেবে। মুই এইনে কোম্ তত্তুন্ কি গরা পুরিবো।” শৌলে রাজা অলঅ 9 শমূয়েল ইত্তুন যেবার্ আজাই শৌলে ঘুরিনে থিয়্যেদে ন-থিয়্যেদে গোজেনে তার মনান্ বুদুলি দিলো। সেদিন্যেই চিহ্নো ইজেবে কোইয়্যে ঘটনাগানি ঘুদিলো। 10 শৌল আর তার চাগর্ গিবিয়াতত্ লুুমিলে এক ঝাক্ ভাববাদী সমারে তারার দেগা অলঅ। সেক্কে গোজেনর আত্নাগানে শৌলরে পুরোপুরিভাবে নিজোর অধীনোত্ আনিলো, আর সেক্কে তে সেই ভাববাদীগুনোর মোধ্যে যেইনে গোজেনর দিয়্যে কধা কুয়ো ধুরিলো। 11 যিগুনে শৌলরে আগেত্তুন্ ধুরি চিনিদাক্ তারা তারে ভাববাদীগুনো সমারে গোজেনর দিয়্যে কধা কদে দেগিনে একজন আরেকজনরে কুয়া ধুরিলাক্, “কীশর পূঅবোর ইয়েন কি অলঅ? শৌলেয়ো কি সালে ভাববাদীগুনো ভিদিরে একজন?” 12 সেক্কে সিদুগোর্ এক্কো মান্জে কলঅ, “মাত্তর্ ইগুনে কার্ পূঅ?” শৌলেয়ো কি ভাববাদীগুনো ভিদিরে একজন? এই কধাগান ডাগকধা ওই উদিলো। 13 গোজেনর দিয়্যে কধা কনা শেজ্ গুরিনে শৌল উবোসনার উজু জাগানত্ উদি গেলঅ। 14 শৌলর কুত্তোবো শৌল আর তার চাগর্বোরে পুযোর্ গুরিলো, “তুমি কদু যেইয়ো?” শৌল কলদে, “গাধীগুনোরে তোগেবাত্তে যেইয়োং, মাত্তর্ সিগুনোরে কনজাগাত্ ন-পেইনে আমি শমূয়েলর ইদু যেইয়্যেই।” 15 শৌলর কুত্তোবো কলদে, “মরে কঅ, শমূয়েলে তমারে কি কোইয়্যে?” 16 শৌল তার কুত্তোবোরে কলদে, “তে আমারে আভাংপাং গুরি কোই দিলদে, গাধীগুনোরে পাহ্ যেইয়্যে।” মাত্তর্ তার রাজাগিরি গরানা পৌইদ্যেনে শমূয়েল তারে যে কধাগান কোইয়্যে সিয়েনি তে তার কুত্তোবোরে ন-কলঅ। 17 পরেন্দি শমূয়েলে মিস্পাদত্ লগেপ্রভুর মুজুঙোত্ ইস্রায়েলীয়গুনোরে ডাগিনে এগত্তর্ গুরিলো। 18 তে তারারে কলঅ, “ইস্রায়েলীয়গুনোর গোজেন লগেপ্রভু কোইয়্যেদে, ‘মিসর দেজত্তুন মুয়ই তমারে নিগিলেই আন্যং, আর মিসরীয়গুনোর আদত্তুন্ আর যে রেজ্যর মানুচ্চুনে তমা উগুরে অত্যেচার্ গুরিদাক তারার আদত্তুন্ মুয়ই তমারে উদ্ধোর গোজ্যং।’” 19 শমূয়েলে আরঅ কলঅ, “মাত্তর্ তমার গোজেন, যিবে বেক্ দযা আর দুর্দজাত্তুন্ তমারে উদ্ধোর গোজ্যে, এচ্চ্যে তারেই তুমি এলাফেলা গরর্ আর কর্, ‘আমা উগুরে এক্কো রাজা নেযা।’ সেনত্তেই ইক্কিনে তুমি যে যার গুট্টি আর বংশ মজিম্ লগেপ্রভুর মুজুঙোত্ আঝিল্ অ।” 20 শমূয়েলে ইস্রায়েলীয়গুনোর বেক্ গুট্টিগুনোরে কায়-কুরে ডাগিলো। তারা ভিদিরে বিন্যামীন-গুট্টিবোরে বেঈ নেযা অলঅ। 21 সে পরেন্দি বিন্যামীন-গুট্টির বেক্ বংশগুনোরে মুজুঙোত্ আনা অলঅ। তারা ভিদিরেত্তুন্ মট্রীয়র বংশবোরে বেঈ নেযা অলঅ। এধোক্ক্যেনগুরি যেরেন্দি কীশর পূঅ শৌলরে বেঈ নেযা অলঅ। মাত্তর্ তারে তোগেলে তারে পাহ্ ন-গেলঅ। 22 সেক্কে মানুচ্চুনে লগেপ্রভুরে পুযোর্ গুরিলাক, “আর কনজনে কি ইয়েনত্ আগন্?” লগেপ্রভু কলঅ, “চঅ, তে পযাপিরানি ভিদিরে লুগিই আঘে।” 23 সেক্কে মানুচ্চুনে দাবা যেইনে সিয়োত্তুন্ শৌলরে আনিলাক্। তে এইনে মানুচ্চুনো ভিদিরে থিয়্যেনার পরেন্দি দেগা গেলঅ তে বেক্কুনোত্তুন্ প্রায় এক ফুট লাম্বা। 24 শমূয়েলে সেক্কে বেক্কুনোরে কলদে, “তুমি কি লগেপ্রভুর বেঈ নেযেয়্যে মানুচ্চোরে দেগর্? গোদা মানুচ্চুনো ভিদিরে তা ধোক্ক্যেন আর কনজন নেই।” সেক্কে মানুচ্চুনে কলাক্, “রাজাবো জিংকানিবর্ বাঁজোক্।” 25 শমূয়েলে সেক্কে রেজ্য শাজনর্ সুদোমানি মানুচ্চুনো ইদু ফগদাং গুরিলো। তে সিয়েনি এক্কো বোইয়োত্ লিগিনে লগেপ্রভুর মুজুঙোত্ রাগেল। সে পরেন্দি তে বেক্ মানুচ্চুনোরে যার্ যার্ ঘরত্ বিদেয় গুরি দিলো। 26 শৌলেয়ো গিবিয়াতদ্ তার নিজোর ঘরত্ ফিরি গেলঅ। যিদুক্কুন বীর পুরুষোর মনত্ গোজেনে সাড়া জাগেয়ে তারায়ো তা সমারে গেলাক্। 27 মাত্তর্ কয়েক্কো বাজে মান্জে কলাক্, “এই মানুচ্চো কেধোক্ক্যেনগুরি আমারে রোক্ষ্যে গুরিবো?” তারা তারে ঈচ্ গুরিলাক আর কনঅ বক্শিজ্ ন-দিলাক্। মাত্তর্ শৌলে মুয়োন বন্ধ গুরি রলঅ। |
Copyright © 2021 Bangladesh Bible Society
Bangladesh Bible Society