১ রাজাবলী 6 - Chakma Bibleতবনা-ঘর বানানা 1 মিসর দেজত্তুন্ ইস্রায়েলীয়গুনে নিঘিলি এজানার পরেন্দি চেরশঅ আশি বজর সং ইস্রায়েলীয়গুনো উগুরে শলোমনর্ রাজাগিরির চের্ বজরত্ সিব মাজত্, অত্তাৎ দ্বিমাজত্ শলোমনে লগেপ্রভুর ঘরান তুলোনা আরাম্ভ গুরিলো। 2 রাজা শলোমনে লগেপ্রভুত্তে যে ঘরান্ বানেয়্যে সিয়েন লাম্বান্দি এলদে ষায়েট আত, পাদাজ্যে কুড়ি আত্ আর অজল্ ত্রিশ আত। 3 তবনা-ঘরর্ আজল্ গুদিবোর্ মুজুঙেন্দি যে আজ্চালাগান এলঅ সিয়েন্ ঘরানর পাদাজ্যে মাপ মজিম্ কুড়ি আত্ পাদাজ্যে আর ঘরানর মুজুঙেত্তুন্ সিয়েনর লাম্বান্দি এলদে দশ আত্। 4 ঘরানর্ দেবাল ভিদিরে তে জানালা ধোক্ক্যেন গুরিনে কানা কানা জাল ধোক্ক্যেন্ জাগা বানেল। 5 আজল্ গুদিবো আর দাঙর্ পবিত্র জাগানর্ তিন কিত্তেন্দি দেবালত্ বাস্যে তে এক্কান তিন তালা ঘর বানেল। সিয়েন ভিদিরে ভালোক্কুন্ গুদি এলাক। 6 তলে তালার গুদিগুন্ এলাক্কে পাচ্ আত্ পাদাজ্যে, দ্বিতালার গুদিগুন্ এলাক্কে ছঅ আত্ পাদাজ্যে আর তিন তালার গুদিগুন্ এলাক্কে সাত্ আত্ পাদাজ্যে, কিত্তেই তবনা-ঘরর্ দেবাল বারেন্দি কাজাকুরে কয়েক্কো থাক্ বানা ওইয়্যে। সেনত্তে সে তিন তালা ঘরান্ বানেবাত্তে তবনা-ঘরর্ দেবালত্ কনঅ টেগেন্ লাগেবার্ দরকার ন-অলঅ। 7 গাট্টোর্ যিদুক্কুন্ পাত্তর্ কাবিনে ঠিগ গরা ওইয়্যে বানা সিগুন আনিনে তবনা-ঘরান বানেবার্ কামত্ বেবহার গরা অলঅ। তবনা-ঘরান বানেবার অক্তত্ সিদু কনঅ মাত্তুল্, কুড়োল বা অন্য কনঅ লুয়োর মেশিন রঅ শুনো ন-গেলঅ। 8 তলে তালার সুমিবার পথ্তান্ এলদে তবনা-ঘরর দোগিণেদি; সিয়োত্তুন্ এক্কান সিড়ি দ্বিতালাত্ আর সে পরেন্দি তিন তালাত্ উঠ্যেগোই। 9 এবাবোত্যেগুরি তে তবনা-ঘরান বানেয়্যে আর সিয়েন থুেম্অ গোজ্যে। তে এরস গাজ তক্তা আর টেগেন্দোই সিয়েনর্ দোন্দোমাগান্ দিয়্যে। 10 তবনা-ঘরর্ তিন কিত্তেন্দি সে ঘরানত্ তে কয়েক্কো গুদি বানেয়্যে। সে গুদিগুনোর এক ইক্কো লাম্বান্দি এলদে পাচ্ আত্ আর এরস গাজর টেগেন্দোই ঘরর্ দোন্দোমাগান বানা ওইয়্যে। সে টেগেনুনোর্ ইক্কো মাধা তবনা-ঘরর্ দেবাল থাগ উগুরে রাগা ওইয়্যে। 11 শলোমন ইদু লগেপ্রভুর এ কধাগান কুয়ো অলঅ, 12 “তুই যুনি মঅ উঘুম মজিম আদচ্, মর্ বেক্ সুদোমানি পালাচ্ আর মর্ বেক্ উঘুমানির বাধ্য অচ্ সালে তবনা-ঘরান্ তুই বানেয়োচ্ সিয়েন পৌইদ্যেনে মুই তঅ বাপ্পো দায়ূদো ইদু যিয়েনি শমক্ হেইয়োচ্ সিয়েনি মুই তঅ মাধ্যমে পুরেই দিম্। 13 মুই ইস্রায়েলীয়গুনোর ইদু বজত্তি গুরিম আর মঅ মানুচ্ ইস্রায়েলীয়গুনোরে মুই ন-ছাড়িম্।” 14 শলোমনে তবনা-ঘরান বানেইনে এধোক্ক্যেনগুরি থুম্ গুরিলো। 15 তলেত্তুন্ ধুরি দোন্দোমা সং এরস গাজ তক্তালোই তে দেবাল ভিদিরেন্দিগান ঢাগি দিলো আর তলেন্দিগান ঢাগি দিলোদে বেরস গাজ তক্তালোই। 16 তবনা-ঘর ভিদিরে দাঙর্ পবিত্র জাগা নাঙে ইক্কো ভিদিরে গুদি বানেবাত্তে তে তবনা-ঘরর্ পিচ্চো ভাগত্ কুড়ি আত্ জাগা তলেত্তুন্ ধুরি দোন্দোমা সং এরস গাজ তক্তালোই ফারক্ গুরি নেযেল। 17 দাঙর্ পবিত্র জাগানর্ মুজুঙোত্ আজল্ দাঙর্ গুদিবো অলদে চোল্লিশ আত্ লাম্বা। 18 তবনা-ঘর ভিদিরে এরস গাজ তক্তানি উগুরে লদা গাজর্ ফল আর ফুট্যে ফুল কাবিনে লেগা অলঅ। বেক্কানি এরস গাজ তক্তালোই এলঅ, কনঅ পাত্তর্ দেগা ন-যায়। 19 তবনা-ঘর ভিদিরে লগেপ্রভুর সুদোম-সুন্দুক্কো বোজেবাত্তে শলোমনে এবাবোত্যেগুরি দাঙর্ পবিত্র জাগাগান যুক্কোল্ গুরিলো। 20 সে জাগাগান এলদে কুড়ি আত্ লাম্বা, কুড়ি আত্ পাদাজ্যে আর কুড়ি আত্ অজল। খাটি সনালোই তে সিয়েন ভিদিরেন্দিগান নাদি দিলো আর ডালিঘরান্অ তে এরস গাজ তক্তালোই নাদি দিলো। 21 তবনা-ঘরর্ আজল্ গুদিবোর্ দেবালান্ তে খাটি সোনালোই নাদি দিলো আর মহাপবিত্র জাগানর মুজুঙোত্ সোনার শিগোল্ বাজেই দিলো। সে মহাপবিত্র জাগানর দেবালানঅ তে সোনালোই নাদি দিলো। 22 তবনা-ঘরর ভিদিরেন্দি বেক্ জাগাগান তে এবাবোত্যেগুরি সনালোই নাদি দিলো। দাঙর্ পবিত্র জাগানর ডালিঘরান্অ তে সনালোই নাদি দিলো। 23-26 তে দাঙর্ পবিত্র জাগান ভিদিরে জলপাই গাজ তক্তার দ্বিবে করূব বানেল। দ্বিবে করূব আরুগে আর গদনে একবাবোত্যে এলঅ। ইগুনোর পত্তিবো দশ আত্ গুরিনে অজল এলঅ। পত্তি করূবোর পাচ্ আত্ গুরিনে লাম্বা দ্বিয়েন ডুয়ো এলঅ। এক্ ডুয়োর্ গোড়াত্তুন্ অন্য ডুয়োর মাঢাগান সং এলদে দশ আত্। 27 দাঙর্ পবিত্র জাগানত্ তে সে করূব দ্বিবে ডুয়ো মেল্যে গুরি রাগেল। ইক্কো করূবোর্ ডুয়োগানি এক দেবালত্ আর অন্য করূবোর ডুয়োগানি আরেক্ দেবালত্ বাজেয়্যে এলঅ আর ঘরর্ দ্বিসেরে তারার অন্য ডুয়ো দ্বিয়েন এক্কান আরেক্কানর মাঢাগান্ বাজেয়্যে রলঅ। 28 তে করূব দ্বিবেরে সনালোই নাদি দিলো। 29 তবনা-ঘরর দ্বিবে গুদিত্ পুরো দেবালানিত্ করূব, খাজোর্ গাজ আর ফূট্যে ফুল কাবিনে বানেয়্যে এলঅ। 30 গুদি দ্বিবের তলেন্দিয়ো তে সনালোই নাদি দিলো। 31 দাঙর্ পবিত্র জাগানর দোরান্ তে জলপাই গাজ তক্তালোই বানেল। সে দোরান ফ্রেমানির পাচছুয়ো কোণা এলঅ। 32 দোরানর দ্বি ডাগেন্দি তে করূব, খাজোর গাজ আর ফুট্যে ফুল কাবিনে সনালোই নাদি দিলো আর সে করূব আর খাজোর্ গাজ্অ উগুরে সোনা পিদেইনে সিগুনোর আরুক্ দি দিলো। 33-34 আজল্ গুদিবো দোরানত্তে তে জলপাই গাজ তক্তালোই এক্কান চের্কুণ্যে ফ্রেম বানেল আর বেরস গাজ তক্তালোই দোরানর দ্বি ডাগ্ বানেল। কব্জা লাগেয়্যে দ্বিয়েন তক্তালোই এক এক্কান ডাগ্ বানা অলঅ। সেক্কে কত্তানি ভাজ্ গরা যেদঅ। 35 সে ডাগকানির্ উগুরে তে করূব, খাজোর গাজ আর ফুট্যে ফুলোর আরুক্ বানেইনে সোনা পাত্তোই নাদি দিলো। 36 দোল্ গুরি কাপ্যে তিন সুর্ পাত্তর্ আর এরস গাজর্ এক সুর্ দাদঅ তক্তালোই তে ভিদিরে উদোনর্ চেরোকিত্তে দেবাল বানেল। 37 চের্ বজরত্ সিব মাজত্ লগেপ্রভুর ঘরর্ গোড়াগান গাড়া ওইয়্যে। 38 সল্লা মজিম্ তবনা-ঘরানর বেক্ কামানি এগার বজরর্ বূল মাজত, অত্তাৎ আস্তো মাজত্ শেজ্ ওইয়্যে। এ তবনা-ঘরান বানাদে শলোমনর্ সাত বজর সময় লাক্ক্যে। |
Copyright © 2021 Bangladesh Bible Society
Bangladesh Bible Society