১ রাজাবলী 21 - Chakma Bibleনাবোতর আংগুর ক্ষেত 1 ইয়েনর্ পরেন্দি যিষ্রিয়েলীয় নাবোতর আংগুর ক্ষেততান্দোই এক্কান্ ঘটনা ঘুদি গেলঅ। এ আংগুর খেততান্ এলদে যিষ্রিয়েলত্ শমরিয়ার রাজা আহাবর রাজঘরর্ কায়। 2 আহাবে নাবোতরে কলঅ, “ক্ষেত্-ক্ষেত্তি গুরিবাত্তে তঅ আংগুর ক্ষেততান্ মরে দে, কিত্তেই সিয়েন্ মঅ রাজঘরর্ কায়। ইয়েনর্ বদলে মুই তরে আরঅ এক্কান্ গম্ আংগুর ক্ষেত্ দিম্ বা যুনি চাজ্ সালে সিয়েন দামানঅ তরে দিম।” 3 জোবত্ নাবোতে কলঅ, “মঅ বাপ-দাদাত্তুন্ পেইয়্যে সোম্বোত্তিগানি যে মুই তরে দি দিম্ লগেপ্রভু যেনে সিয়েন্ অবাত্তে ন-দে।” 4 “মঅ বাপ-দাদার সোম্বোত্তিগানি মুই তরে ন-দিম্,” যিষ্রিয়েলীয় নাবোতর এ কধানিত্তে আহাবে মুয়োন্ কালা গুরিলো আহ্ কুজুক্ ওইনে ঘরত্ ফিরি গেলঅ। তে বিচ্ছোনত্ পুরিনে মুয়োন্ ফিরেই রলঅ, হেবাত্তে ন-চেলঅ। 5 ইয়েন্ দেগিনে তা মোক্কো ঈষেবলে তারে পুযোর্ গুরিলো, “কিত্তে তুই মনান্ যাগুলুক্ গুরিনে আগচ্? কিত্তে হেবাত্তে ন-চর্?” 6 জোবত্ রাজা তারে কলঅ, “মুই যিষ্রিয়েলীয় নাবোতরে কোইয়োং তা আংগুরো ক্ষেততান্ মইদু বিজিবাত্তে বা তে চেলে সিয়েন বদলে মুই তারে আর এক্কান আংগুর ক্ষেতঅ দিবাত্তে চেয়োং, মাত্তর্ তে কলদে, তে তার্ আংগুর ক্ষেদ্তান্ মরে ন-দিবো।” 7 সেক্কে তা মোক্কো ঈষেবলে তারে কলঅ, “তুই ইস্রায়েলর রাজা নয়? উঠ্, হানা-দানা গর্, হুজী অ। যিষ্রিয়েলীয় নাবোতর আংগুর ক্ষেদ্তান্ মুই তরে দিম্।” 8 ঈষেবলে সেক্কে আহাবর নাঙে কয়েক্কান্ চিদি লিগিনে সিয়েন উগুরে আহাবর সীলমঅরবো দিলো আর নাবাতর শঅরত্ বজত্তি গোজ্যে বুড়ো নেতা আর মুরুব্বিগুনোর্ ইদু চিদিগানি পাধেই দিলো। 9 সে চিদিগানিত্ তে লেখ্যেদে, “তুমি উবোস্ থেবার্ ফগদাং গরঅ আর মানুচ্চুনোর্ ইদু নাবোতরে এক্কান্ বিশেষ জাগা দুয়ো। 10 তা মুজুঙোত্ দ্বিয়েন্ আসনত্ দ্বিজন বজং মান্জ্যরে বজঅ। তারা ইয়েন্ কোইনে তা বিরুদ্ধে সাক্ষি দেদোক্, তে গোজেন আর রাজার বিরুদ্ধে অগমানর্ কধা কোইয়্যে। সে পরেন্দি তারে সিয়োত্তুন্ নিগিলেনে পাত্তর্ মেলাহ্ মারিনে মারে ফেলঅ।” 11 সেনত্তে নাবোতর্ শঅরত্ বজত্তিগুরিয়্যে বুড়ো নেতাগুনে আর মুরুব্বিগুনে ঈষেবলর চিদিগানিত্ লেখ্যে উঘুম্ মজিম্ কাম্ গুরিলাক্। 12 তারা উবোস্ থেবার ফগদাং গুরিনে নাবোতরে মানুচ্চুনোর্ ইদু এক্কান্ বিশেষ জাগা দিলাক্। 13 সে পরেন্দি দ্বিজন বজং মানুচ্ এইনে নাবোতর্ মুজুঙোত্ বজিনে মানুচ্চুনোর্ ইদু তা বিরুদ্ধে এ সাক্ষীগান্ দিলাক্, তে গোজেন্ আর রাজার বিরুদ্ধে অগমানর্ কধা কোইয়্যে। সে পরেন্দি মানুচ্চুনে তারে শঅরর্ বারেন্দি নেযেইনে পাত্তর্ মেলাহ্ মারিনে মারে ফেলেলাক্। 14 ইয়েনর্ পরেন্দি সে নেতাগুনে ইষেবল ইদু হবর্ পাদেলাক্, নাবোতরে পাত্তর্ মেলাহ্ মারিনে মারে ফেলা ওইয়্যে। 15 নাবোতরে পাত্তর্ মেলাহ্ মারিনে মারে ফেলা ওইয়্যে শুনিনে ঈষেবল আহাবরে কলঅ, “যাহ্, যিষ্রিয়েলীয় নাবোতে যে আংগুর ক্ষেদ্তান্ তইদু বিজিবাত্তে নঅ-চায় সিয়েন গজক্ গুরি নেযা। তে মুরি যেইয়্যে।” 16 নাবোতে মুরি যেইয়্যে শুনিনে আহাব নাবোতর আংগুর ক্ষেততান্ গজক্ গুরি নিবাত্তে গেলঅ। 17 সেক্কে তিশ্বীয় এলিয়োর্ ইদু লগেপ্রভুর এ কধাগান্ ফগদাং অলঅ, 18 “শমরিয়াত্ ইস্রায়েলর রাজা আহাব লগে দেগা গুরিবাত্তে যাহ্। তে ইক্কিনে নাবোতর্ আংগুর ক্ষেদত্ আঘে। তে সিয়েন গজক্ গুরিবাত্তে সিদু যেইয়্যে। 19 তুই তারে কঅ, লগেপ্রভু কত্তে, ‘তুই কি ইক্কো মান্জ্যরে মারে ফেলেইনে তা সোম্বোত্তিগানি গজক্ ন-গরচ্?’ সে পরেন্দি তারে কঅ, লগেপ্রভু কত্তে, ‘কুগুরুনে যিয়েনত্ নাবোতর্ লোগান লেইলেই হেইয়োন্ সিয়েনত্ তারা তঅ লোগান, অয় তর্ লোগান লেইলেই হেবাক্।’” 20 আহাবে সে কধাগান শুনিনে এলিয়রে কলঅ, “ও মর্ শত্রু, এবেরা তুই মরে পেইয়োচ্।” এলিয় কলঅ, “অয়, পেইয়োং, কিত্তেই লগেপ্রভুর চোগোত্ যিয়েনি ভান্ন্যেই সিয়েনি গুরিবাত্তে তুই নিজোরে বিজি দুয়োচ্। 21 সেনত্তে লগেপ্রভু কত্তে, ‘মুই তঅ উগুরে দযাগান ডাগি আনিম্। তরে মুই এক্কুবারে ভস্ত গুরিম্। চাগর্ ওক্ বা গিরোজ্ ওক্ তঅ বংশর্ পত্তি মরদরে মুই শেজ্ গুরি দিম্। 22 মুই তঅ বংশবোরে নবাটর পূঅ যারবিয়াম আর অহিয়োর্ পূঅ বাশার বংশ ধোক্ক্যেন্ গুরিম্, কিত্তেই তুই মরে রাগ তুলি দুয়োচ্ আর ইস্রায়েলরে দিইনে পাপ গোরেয়োচ্। 23 ইয়েন্বাদে ঈষেবলর পৌইদ্যেনেয়ো মুই কঙর্, যিষ্রিয়েলর দেবালান কায় কুগুরুনে তারে হেবাক্। 24 তর্ যিদুক্কুন্ মান্জ্যে শঅরত্ মুরিবাক্ তারারে কুগুরুনে হেবাক্ আর যিগুনে মাঢত্ মুরিবাক্ তারারে পেগে হেবাক্।’” 25 মোক্কোর্ ভেজে দেনালোই লগেপ্রভুর চোগোত্ যিয়েনি ভান্ন্যেই আহাবে সিয়েনি গুরিবাত্তে নিজোরে বিজি দিয়্যে। তা ধোক্ক্যেন্ আর কনজনে এবাবোত্যে কাম্ ন-গরন্। 26 ইস্রায়েলীয়গুনো মুজুঙোত্তুন্ লগেপ্রভু যে ইমোরীয়গুনোরে ধাবেই দিয়্যে তারা ধোক্ক্যেন্ মূত্তি পূজো গুরিনে তে জঘন্য কাম্ গুরিদো। 27 আহাবে লগেপ্রভুর কধা শুনিনে নিজো কাবড়ান্ ফাদি ফেলেইনে বস্তা ফাদা উরিলো আর উবোস্ থেলঅ। তে বস্তা ফাদা উরিনে ঘুম্ যেদঅ আর নম্রগুরিনে আঢাউদো গুরিদো। 28 সেক্কে লগেপ্রভু তিশ্বীয় এলিয়রে কলঅ, 29 “তুই কি খিয়েল্ গোজ্যস্ আহাবে মঅ মুজুঙোত্ নিজোরে কি বাবোত্যে চিগোন্ গোজ্যে? তে নিজোরে চিগোন্ গোজ্যে বিলিনে এ দযাগান্ মুই তা জিংকানিত্ ন-আনিম্, মাত্তর্ তা পূঅবো জিংকানিত্ তা বংশগুনো উগুরে আনিম্।” |
Copyright © 2021 Bangladesh Bible Society
Bangladesh Bible Society