১ রাজাবলী 12 - Chakma Bibleরহবিয়ামর বিরুদ্ধে ইস্রায়েলর উল্লোমি 1 রহবিয়ামে শিখিমোত্ গেলঅ, কিত্তেই ইস্রায়েলীয়গুনে বেক্কুনে তারে রাজা বানেবাত্তে সিদু যেইয়োন্। 2 সেক্কে নবাটর পূঅ যারবিয়ামে মিসর দেজত্ এলঅ, কিত্তেই তে রাজা শলোমন ইত্তুন্ ধেইনে সিদু যেইয়্যে। সিদু থেবার সলাবোত্ তে রহবিয়ামর রাজা অবার্ হবরান্ শুনিলো। 3 মানুচ্চুনে যারবিয়ামরে ডাগিনে পাদেলে পরেন্দি তে আর ইস্রায়েলীয়গুনে বেক্কুনে রহবিয়ামর ইদু যেইনে কলাক্, 4 “তঅ বাপ্পো আমা উগুরে এক্কান ঘুয়োর্ জুঙোল্ চাবি দিয়্যে, মাত্তর্ ইক্কিনে তুই আমা উগুরে চাপ্যে সে জদবদে কামানি কোমেইনে ঘুয়োর্ জুঙোলান্ পাদল্ গুরি দে; সেক্কে আমি তরে সেবা গুরিবোং।” 5 জোবত্ রহবিয়ামে কলঅ, “তুমি ইক্কিনে যগোই, তিন দিনোর্ দিন্নোত্ এচ্ছো।” সেক্কে মানুচ্চুনে গেলাক্। 6 যিদুক্কুন্ বুড়ো নেতায় তা বাপ্পো শলোমনর্ জীংকানিগানত্ তারে সেবা গুরিদাক্ রহবিয়াম তারার্ লগে সুল্লুক্ গুরিবাত্তে কলঅ, “এ মানুচ্চুনোরে জোব্ দিবাত্তে তুমি মরে কি সল্লা দিবা?” 7 জোবত্ তারা কলাক্, এচ্ছ্যে যুনি তুই এ মানুচ্চুনোর সেবাগুরিয়্যে ওইনে তারারে সেবা গরচ্ আর তারার্ কোজোলিগানি রোক্ষ্যে গরচ্ সালে তারা নিত্য তর্ চাগর্ ওইনে থেবাক্। 8 মাত্তর্ রহবিয়ামে বুড়ো নেতাগুনোর উপদেজ্ছানি গেরাজ্য ন-গুরিনে সে গাবুজ্যেগুনো সমারে সুল্লুক্ গুরিলো যিগুনে তা সমারে দাঙর্ ওইয়োন্ আর তারে সেবা গুরিদাক্। 9 তে তারারে কলঅ, “মানুচ্চুনে কদন্দে, ‘তঅ বাপ্পো যে ঘুয়োর্ জুঙোলান্ আমা উগুরে চাবি দিয়্যে সিয়েন পাদল্ গর্।’ এ পৌইদ্যেনে তমার সুলুক্কান্ কি? আমি তারারে কি জোব্ দিবোং?” 10 জোবত্ সে গাবুজ্যেগুনে কলাক্, “যিদুক্কুন্ মান্জ্যে তঅ বাবর চাপি দিয়্যে ঘুয়োর্ জুঙোলান্ পাদল্ গুরি দিবার কধা কোইয়োন্ তারারে তুই কোইদে, তঅ বাবর কমরত্তুন্অ বেশ্ তর্ কাল্যে আঙুল্লো দাঙর্। 11 তঅ বাপ্পো তারা উগুরে যে ঘুয়োর্ জুঙোলান্ চাপি দিয়্যে সিয়েন্ তুই আরঅ ঘুয়োর্ গুরিবে। তঅ বাপ্পো তারারে মাজ্যেদে চাবুক্কোই মাত্তর্ তুই তারারে মারিবেদে কাঙারা-বিজেলোই।” 12 রাজার কধা মজিম্ তিন দিনোর্ দিন্নোত্ যারবিয়ামে আর বেক্ মানুচ্চুনে রহবিয়ামর্ ইদু ফিরি এলাক্। 13 রাজা বুড়ো নেতাগুনোর উপদেশছানি অগ্রাজ্য গুরিনে মানুচ্চুনোরে কড়া জোব্ দিলো। 14 তে সে গাবুজ্যেগুনোর্ সল্লা মজিম্ কলঅ, “মঅ বাপ্পো তমা জুঙোলানি ঘুয়োর্ গোজ্যে, মুই সিয়েনি আরঅ ঘুয়োর্ গুরি দিম্। মঅ বাপ্পো চাবুক্ দিইনে তমারে মাজ্যে, মুই তমারে মারিম্বে কাঙারা-বিজেলোই।” 15 এবাবোত্যেগুরি রাজা মানুচ্চুনোর কধালোই কান ন-পাদিলো। শীলোনীয় অহিয়োর মাধ্যমে লগেপ্রভু নবাটর পূঅ যারবিয়ামরে যে কধাগান কোইয়্যে সিয়েন্ পূরোণ গুরিবাত্তে লগেপ্রভুর ইত্তুন্ ঘটনাগান এবাবোত্যেগুরি গুদিলো। 16 ইস্রায়েলীয়গুনে যেক্কে বুঝিলাক্, রাজা তারার্ কধানি ন-শুনিবো সেক্কে তারা রাজারে কলাক্, “দায়ূদো উগুরে আমার কনঅ দাবি নেই। যিশয়র পূঅবো উগুরে আমার কনঅ অধিকার নেই। ও ইস্রায়েল, তুমি যে যার্ ঘরত্ ফিরি যঅ। ও দায়ূদ, ইক্কিনে তর্ নিজোর্ গুট্টি তুই নিজেই চাহ্।” সেনত্তেই ইস্রায়েলীয়গুনে যে যার্ ঘরত্ ফিরি গেলাক্। 17 মাত্তর্ যিহূদা-গুট্টির আদামানি আর শঅরানিত্ যিদুক্কুন্ ইস্রায়েলীয় বজত্তি গুরিদাক্ রহবিয়ামে তারা উগুরে রাজাগিরি গরা ধুরিলো। 18 যিগুনোরে কাম্ গুরিবাত্তে বাধ্য গরা অদঅ তারার্ ভারান্ যিগুনো উগুরে এলঅ সে অদোরামরে রাজা রহবিয়ামে ইস্রায়েলীয়গুনোর ইদু পাধেই দিলো, মাত্তর্ তারা তারে পাত্তর্ মারিনে মারে ফেলেলাক্। সেক্কে রাজা রহবিয়ামে যাদিমাদি তার রথতানত্ উদিনে যিরূশালেমত্ ধেই গেলঅ। 19 এবাবোত্যেগুরি ইস্রায়েলীয়গুনে দায়ূদো গুট্টিগুনোর বিরুদ্ধে উল্লোমি গুরিলাক্; অবস্থাগান্ এজঅ সং সেধোক্কেন্ আঘে। 20 যারবিয়ামে ফিরি এজানার হবরান্ শুনিনে ইস্রায়েলীয়গুনে মানুচ্ পাদেইনে তারে তারার্ মিটিঙোত্ ডাগি আনিলাক্ আর বেক্ ইস্রায়েলীয়গুনো উগুরে তারা তারে রাজা বানেলাক্। বানা যিহূদা-গুট্টির মানুচ্চুনে দায়ূদো বংশর উগুরে বিশ্বেজি এলাক্। 21 যিরূশালেমত্ লুমিনে রহবিয়ামে যিহূদা আর বিন্যামীন-গুট্টির বেক্ মানুচ্চুনোরে যুদ্ধো গুরিবাত্তে এগত্তর্ গুরিলো। সেক্কে এক লাখ্ আশি আজার সৈন্য অলাক্। ইয়েন্ গরা অলদে যেনে ইস্রায়েলীয়গুনোর লগে যুদ্ধো গুরিনে রেজ্যগান্ আরঅ শলোমনর্ পূঅ রহবিয়ামর আঢত্ নেযা যায়। 22 মাত্তর্ গোজেন মানুচ্ শময়িয়োর্ ইদু গোজেনর্ এ কধাগান ফগদাং অলঅ, 23 “তুই যিহূদার রাজা শলোমনর্ পূঅ রহবিয়ামরে, যিহূদা আর বিন্যামীন-গুট্টির বেক্ মানুচ্চুনোরে আর বাদবাগি বেক্ মানুচ্চুনোরে কোই দে, 24 লগেপ্রভু কোইয়্যেদে তারা যেনে নিজোর ভেই ইস্রায়েলীয়গুনোর বিরুদ্ধে যুদ্ধো গুরিবাত্তে ন-যান্। তারা বেক্কুনে যেনে ঘরত্ ফিরি যান্, কিত্তেই ইয়েন লগেপ্রভুর কাম।” সেনত্তে তারা লগেপ্রভুর কধানি মানি নেযেইনে লগেপ্রভুর উঘুম মজিম্ ঘরত্ ফিরি গেলাক্। যারবিয়ামর মূত্তিপূজো 25 পরেন্দি যারবিয়ামে ইফ্রয়িমর মুড়োমুড়ি চাগালাত্ শিখিম তাম্বুলো ধোক্কেন্ গুরি বানেইনে সিয়েনত্ বজত্তি গরা ধুরিলো। তে সিয়োত্তুন্ যেইনে পনূয়েলঅ তাম্বুলান ধোক্কেন্ গুরি বানেল। 26 যারবিয়ামে ভাবিলোদে, “এবেরা অয়ত রেজ্যগান আরঅ দায়ূদো গুট্টিগুনোর আঢত্ ফিরি যেবঅ। 27 মানুচ্চুনে যুনি যিরূশালেমত্ লগেপ্রভুর তবনা-ঘরত্ উৎসর্বর অনুষ্ঠানত্তে যান সালে আরঅ সিগুনে তারার্ গিরোজ্ যিহূদার রাজা রহবিয়ামর কধানি মানি নিবাক্। তারা মরে মারে ফেলেইনে রাজা রহবিয়ামর ইদু ফিরি যেবাক্।” 28 রাজা যারবিয়ামে সেক্কে সুল্লুক্ গুরিনে দ্বিবে সোনার্ গোরু ছঅ বানেল। সে পরেন্দি তে মানুচ্চুনোরে কলদে, “যিরূশালেমত্ যানা তমাত্তে অমকদ দুগোর্ কধা। ও ইস্রায়েল, ইগুনে তমার্ দেবেদা, ইগুনে মিসর দেজত্তুন্ তমারে নিগিলেই আন্যন্।” 29 গোরু ছঅ দ্বিবেত্তুন্ ইক্কোরে তে রাগেলদে বৈথেলত্ আর অন্যবোরে রাগেলদে দানত্, 30 সেনত্তে মানুচ্চুনে পূজো গুরিবাত্তে দান সং যাহ্ ধুরিলাক্। এ বেপারান্ তারার্ পাপ ওইনে থেলঅ। 31 যারবিয়ামে পূজোর অজল্ জাগায়ানিত্ মন্দির্ বানা ধুরিলো আর এমন্ মানুচ্চুনোত্তুন্ ধর্মগুরু নেযেল যিগুনে লেবির বংশর মানুচ্ ন-এলাক্। 32 যিহূদা চাগালার্ ভিদিরে যে পরপ্পুন্ অদাক্ সে পরব ধোক্কেন আস্তো মাজর্ পন্দর দিনোর্ দিন্নোত্ তে বৈথেলত্অ ইক্কো পরবর্ বেবস্থা গুরিলো আর নিজোর্ বানেয়্যে গোরু ছবোর্ নাঙে ডালিপূজোবো উগুরে এ্যমান্ উৎসর্ব গুরিলো। তে বৈথেলত্ পূজোর্ অজল্ জাগানিত্ তার্ বানেয়্যে মন্দিরোত্ ধর্মগুরুয়ো নেযেল। 33 আস্তো মাজর্ পন্দর দিনোর্ দিন্নোত্ বৈথেলত্ তার বানেয়্যে ডালিপূজোবোত্ তে এ্যমান্ উৎসর্ব গুরিলো। সময়ান তার নিজোর্ বেঈ নেযেয়্যে। এবাবোত্যেগুরি তে ইস্রায়েলীয়গুনোত্তে পরবর্ বেবস্থা গুরিলো আর এ্যমান্ উৎসর্ব গুরিবাত্তে ডালিপূজোত্ উদিলো। |
Copyright © 2021 Bangladesh Bible Society
Bangladesh Bible Society