১ বংশধর 21 - Chakma Bibleযুদ্ধোগুরিয়্যেগুনোরে গুণোনা 1 শতান্নো এবেরা ইস্রায়েল বিরুদ্ধে লাগিলো। ইস্রায়েল জাদ মানুচ্চুনোরে গুণিবাত্তে তে দায়ূদো মনত্ আওজ্ জাগেল। 2 দায়ূদে সেক্কে যোয়াব আর সৈন্যদল সেনাপতিগুনোরে কলঅ, “বের্-শেবাত্তুন্ দান সং ইস্রায়েলীয়গুনোরে গণঅ। সে পরেন্দি ফিরি এইনে মরে ইজেব্ দুয়ো যেনে ইগুনে কুদুক্কুন্ সিয়েন্ মুই হবর্ পাঙ্।” 3 মাত্তর্ যোয়াবে জোবত্ কলঅ, “লগেপ্রভু যেনে তার্ নিজো মানুচ্চুনোরে একশঅ গুণ্ বাড়েই দে। মর্ গিরোজ মহারাজ, ইগুনে বেক্কুনে কি তর্ চাগর্ নয়? সালে কিত্তে মঅ গিরোজ্সো ইয়েন্ গুরিবাত্তে চেইয়্যে? কিয়া তত্তে পুরো ইস্রায়েল জাদ্তুয়ো দুষি অবঅ?” 4 মাত্তর্ যোয়াব ইদু রাজার উগুমান্ অদেঅদ্ রলঅ; সেনত্তে যোয়াবে যেইনে পুরো ইস্রায়েল দেজ্ছান ঘুরিনে যিরূশালেমত্ ফিরি এলঅ। 5 যিগুনে তলোয়ার চালেই জানন্ তারা কুদুক্কুন্ তে দায়ূদোরে জানেল-সিগুন্ অলাক্ গদা ইস্রায়েলত্ এগার লাখ্ আর যিহূদাত্ চের্ লাখ্ সত্তুর্ আজার্। 6 মাত্তর্ যোয়াবে সে গণা ভিদিরে লেবি আর বিন্যামীন-গুট্টির মানুচ্চুনোরে ন-ধরে, কিত্তে রাজার এ উগুমান্ তাইদু গম্ ন-লাগে। 7 এ উগুমান্ গোজেন চোগেন্দিয়ো গম্ ন-এলঅ; সেনত্তে তে ইস্রায়েল জাদ্তোরে সাজা দিলো। 8 সেক্কে দায়ূদে গোজেনরে কলঅ, “মুই এ কামান্ গুরিনে জদবদে পাপ গোজ্যং। ইক্কিনে মুই তইদু কোজোলী গরঙর্, তুই তঅ চাগরবোর্ এ অন্যেয়ান্ ক্ষেমা গর্। মুই অমকদ বামভুলো কাম্ গোজ্যং।” 9 লগেপ্রভু সেক্কে দায়ূদ দর্শক ভাববাদী গাদরে কলঅ, 10 “তুই যেইনে দায়ূদোরে এ কধাগান কঅ, ‘মুই লগেপ্রভু তরে তিনেন্ সাজা ভিদিরেত্তুন্ এক্কান্ বেঈ নিবাত্তে কঙর্। তুই সিয়েনি ভিদিরেত্তুন্ যিয়েন্ বেঈ নিবে মুই তঅ উগুরে সিয়েন গুরিম্।’ ” 11 সেক্কে গাদ দায়ূদো ইদু যেইনে কলঅ, “লগেপ্রভু তরে ইয়েনি ভিদিরেত্তুন্ এক্কান্ বেঈ নিবাত্তে কোইয়্যে- 12 তিন বজর্ ধুরিনে ভাদঅ রাত্, বা তঅ শত্রুগুনো ইদু উদি যেইনে তারা মুজুঙোত্তুন্ তিন মাস সং ধেই ধেই বেড়ানা, বা তিন দিন সং লগেপ্রভুর তলোয়ারান, অত্তাৎ দেজ ভিদিরে ভানা পিড়ে। সে তিন দিন লগেপ্রভুর দূত্তো ইস্রায়েলর বেক্ জাগানিত্ ভস্তর্ কাম্ গুরি বেড়েব। ইক্কিনে তুই কঅ, যিবে মরে পাদেয়্যে তারে মুই কি জোব্ দিম্?” 13 দায়ূদ গাদরে কলঅ, “মুই অমকদ দযাত্ পোজ্যং। মুই যেনে মান্জ্য আদত্ ন-পড়ং, তাত্তুন্ বরং লগেপ্রভুর আদত্ পড়ং, কিত্তে তার্ দোয়্যে-মেয়্যে থুম্ ন-ওইয়্যে।” 14 সেক্কে লগেপ্রভু ইস্রায়েল উগুরে এক্কান্ ভানা পিড়ে পাধেই দিলো আর সেক্কে ইস্রায়েলর সত্তুর্ আজার্ মানুচ্ মারা পড়িলাক্। 15 যিরূশালেম শঅরান ভস্ত গুরিবাত্তে গোজেনে এক্কো দূতোরে পাধেই দিলো। মাত্তর্ সে দুত্তো যেক্কে সে কামান্ গুরিবাত্তে যার্ সেক্কে লগেপ্রভু সে অমকদ সাজা দেনাত্তুন্ মনান্ ফিরেল। সে ভস্তগুরিয়্যে স্বর্গদুত্তোরে তে কলঅ, “থাগ্, যদবদে ওইয়্যে, এবেরা তঅ আত্তান্ বাদি গর্।” লগেপ্রভুর দূত্তো সেক্কে যিবূষীয় অরৌণার খামার ইদু থিয়্যেই এলঅ। 16 এ ভিদিরে দায়ূদে উগুরেত্তুন্ রিনি চেইনে দেগিলোদে, লগেপ্রভুর দূত্তো আগাজ ইদু থিয়্যেই এলঅ আর তা আদত্ রোইয়্যে যিরূশালেম উগুরে মেল্যে গুরি-ধোজ্যে খুলো তলোয়ারান্। ইয়েন্ দেগিনে দায়ূদ আর বুড়ো নেতাগুনে বস্তা সিলুম্ উজ্যে অবস্থায় মাদি উগুরে আদু পাড়িনে পড়িলাক্। 17 সেক্কে দায়ূদে গোজেনরে কলঅ, “মানুচ্চুনোরে গুণিবার উগুমান্ কি মুই ন-দুয়োং? পাপ মুয়ই গোজ্যং, অন্যেইঅ গোজ্যং। ইগুনে দঅ ভেড়া ছাগল ধোক্ক্যেন, ইগুনে কি গোজ্যন্? ও লগেপ্রভু, মঅ গিরোজ্, মর্ আর মঅ গিরি উগুরে তঅ আঢ্তান পোড়োক্, মাত্তর্ এ ভানা পিড়েগান যেনে আর তঅ মানুচ্চুনো উগুরে ন-থায়।” 18 সেক্কে লগেপ্রভুর দূত্তো গাদরে উগুম্ দিলো যেনে তে দায়ূদোরে যিবূষীয় অরৌণার খামারত্ যেইনে লগেপ্রভুর নাঙে এক্কো ডালিপূজো বানেবাত্তে কয়। 19 লগেপ্রভুরে নাঙ্ গিনিনে গাদ তারে যে কধাগান কোইয়্যে সে কধালোই বাধ্য ওইনে দায়ূদে সিদু গেলঅ। 20 অরৌণা গম ঝারদে ঝারদে মুয়োন ফিরেলে সে স্বর্গদূত্তোরে দেগিলো, আর তা লগে তার্ যে চের্বো পুয়ো এলাক্ তারা যেইনে পৌল্যেলাক্। 21 দায়ূদে উজেই গেলঅ আর তারে দেগিনে অরৌণা খামার ছাড়িনে তা মুজুঙোত্ যেইনে মাদিত্ আদু পাড়ি পড়িনে তারে জু জু গুরিলো। 22 দায়ূদে তারে কলঅ, “তর্ এ খামার-ঘর জাগায়ান্ মরে দে। মুই সিদু লগেপ্রভুর নাঙে এক্কো ডালি পূজো বানেম্ যেনে মানুচ্চুনো ইদু এ ভানা পিড়েগান্ থামায়। পুরো দাম দিইনে সিয়েন্ মইদু বিযি দে।” 23 অরৌণা দায়ূদোরে কলঅ, “তুই সিয়েন্ নেযা। মর্ গিরোজ্ মহারাজে যিয়েন্ গম্ বিলি মনে গরে সিয়েন গোরোক্। চাহ্, পূজ্যে-উৎসর্বত্তে মুই মঅ বলদ্ গোরুগুন্ দুয়োঙর্, দার্বোত্তে দুয়োঙর্ শোজ্য মাড়েদে তক্তার্ মেশিন্ আর শোজ্য-উৎসর্বত্তে গম্। মুই এ বেক্কানি তরে দুয়োঙর্।” 24 মাত্তর্ জোবত্ রাজা দায়ূদে অরৌণারে কলঅ, “না, সিয়েন্ ন-অবঅ। মুই ইয়েনর্ পুরো দামান্ দিম্। যিয়েন্ তর্ সিয়েন্ মুই লগেপ্রভুত্তে ন-নেযেম্, বা মাগানা পেইয়্যে এন্ কনঅ জিনিস্ছোই পূজ্যে-উৎসর্বয়ো ন-গুরিম্।” 25 ইয়েন্ কোইনে সে ভূইয়ানত্তে দায়ূদে অরৌণারে সাত কেজি আস্তোশ গ্রাম সোনা দিলো। 26 দায়ূদে সিদু লগেপ্রভুর নাঙে এক্কো ডালিপূজো বানেল আর পূজ্যে-উৎসর্ব আর উদোলোলি-উৎসর্বর পরব্ গুরিলো। তে লগেপ্রভু ইদু কোজোলি গুরিলো আর লগেপ্রভু পূজ্যে-উৎসর্বর ডালিপূজো উগুরে স্বর্গত্তুন্ আগুন্ পাধেইনে জোব্ দিলো। 27 ইয়েন পরেন্দি লগেপ্রভু সে স্বর্গদূত্তোরে উগুম দিলো আর তে তা তলোয়ারান্ খৈল্যেবোত্ ভোরেই রাগেল। 28 সে সময়োত্ দায়ূদে যেক্কে দেগিলো, যিবূষীয় অরৌণা খামারত্ লগেপ্রভু তারে জোব্ দিলো সেক্কে তে সিয়েনত্ আরঅ উৎসর্বর অনুষ্ঠান গুরিলো। 29 ধূল্যেচর-চাগালাত্ মোশি লগেপ্রভুত্তে যে থেবার্-তাম্বুলান্ বানেয়্যে সিয়েন্ আর পূজ্যে-উৎসর্বর ডালিপূজোবো সে অক্তত্ গিবিয়োন তবনা গরেদে অজল্ জাগানত্ এলঅ। 30 মাত্তর্ লগেপ্রভুর দূত্তো তলোয়ারান দরে দায়ূদে গোজেন আওজ্ছান জানিবাত্তে সে ডালিপূজোবো মুজুঙোত্ যেই ন-পারিলো। |
Copyright © 2021 Bangladesh Bible Society
Bangladesh Bible Society