Tito 3 - Chayahuita (Shahui)

Imapisopita noya niinaꞌ

¹ Imapisopita nani nitotopirinahuëꞌ, inachachin quëmarintaꞌ pënëantaquëꞌ. “Copirno natëcoꞌ,” itëquëꞌ. Yaꞌipi copirno acorinsopitantaꞌ natëcasoꞌ yaꞌhuërin. Noya nicacaisoꞌ yonquiꞌinaꞌ.

² Ama pinochinasohuëꞌ. Ama ninoꞌhuiinasohuëꞌ. Noya ninicatonaꞌ yaꞌhuëꞌinaꞌ. Yaꞌipi piyapiꞌsaꞌ noya nicatonaꞌ, sanoanan quëran nonchinaꞌ.

³ Iráca canpoantaꞌ co noyahuëꞌ cancantërëhuaꞌ. Coꞌhuara Yosë nanamën nitochatërarihuahuëꞌ, co yonquirëhuahuëꞌ. Co yanatërëhuahuëꞌ. Sopai nonpintërinpoaꞌ niꞌton, nisha nisha nicacasoꞌ nohuantërëhuaꞌ. Maꞌpitasona paꞌyatacasoáchin yonquirëhuaꞌ. Aꞌna piyapi maꞌshanënpita noyapatërëhuaꞌ. Ninoꞌhuitëhuaꞌ, co niquëꞌyarëhuahuëꞌ. Noꞌhuípiroꞌ ninëhuaꞌ. Inapoatëhuaꞌ, topinan quëran yaꞌhuërëhuaꞌ.

⁴ Yosëso nipirinhuëꞌ nosoroatonpoaꞌ, catahuarinpoaꞌ. Inasoꞌ noya niꞌton, huiꞌnin aꞌpaimarin nichaꞌëinpoaso marëꞌ.

⁵ Co canpoara noya ninëhuaso marëꞌ nichaꞌërinpoahuëꞌ. Inaora nohuanton, Yosë nosoroatonpoaꞌ, nichaꞌërinpoaꞌ. Amatërëso pochin yaꞌipi oshanënpoaꞌ inquitërinpoaꞌ. Oshanënpoaꞌ inquitatonpoaꞌ, anasitaantarëso pochin nasha cancan quëtërinpoaꞌ. Ispirito Santo nohuanton, ina pochin cancantërëhuaꞌ.

⁶ Quisocristo anoyacancantërinpoaꞌ niꞌton, Ispirito Santo aꞌpatimarinpoaꞌ yaꞌcoancantinpoaso marëꞌ. Noyá yaꞌcoancantohuachinpoaꞌ, naꞌcon catahuarinpoaꞌ.

⁷ Napoaton iporasoꞌ Yosë noya niꞌninpoaꞌ. Iráca oshahuanpirëhuahuëꞌ, inaora nohuanton, nosoroatonpoaꞌ, nanan anoyatërinpoaꞌ. “Huëntonënquë ayaꞌconinpoaꞌ niꞌton, aꞌna tahuëri yaꞌhuërinꞌpaꞌ yaꞌhuëcontarihuaꞌ,” taꞌtëhuaꞌ, ninarëhuaꞌ. Inatohuaꞌ nanpimiatarihuaꞌ.

⁸ Noꞌtëquën shaꞌhuitëranquën. Quëmantaꞌ inachachin aꞌchintëquëꞌ, tënahuë. Pënënáquëꞌ yaꞌipi imapisopita noya nicacaiso marëꞌ. Aꞌchintëranquënsosoꞌ nóya imacasoꞌ. Natëhuatëhuaꞌ, noya noya yaꞌhuarihuaꞌ.

⁹ Aꞌnaquën co noyahuëꞌ yonquiatonaꞌ, nisha nisha nonpi. Cotio mashocoroꞌsaꞌ yonquiatonaꞌ, inahuara yonquinëna quëran nisha nisha aꞌchinpi. Cotioroꞌsaꞌ iráca pënëntopisoꞌ nisha nisha aꞌchinatonaꞌ, ninoꞌhuipi. Ama inapita natancosohuëꞌ. Ina pochin ninontohuachinara, topinan quëran ninontopi. Co mantaꞌ catahuarinpoahuëꞌ. Yosë nanamënáchin imacasoꞌ yaꞌhuërin.

¹⁰ Aꞌna piyapi nisha nanan aꞌchinpachin, imapisopita nisha nisha ayonquirin. Inasoꞌ pënënquëꞌ noꞌtëquën aꞌchinchin. Co yanatëhuachinquënhuëꞌ, naquëranchin pënëantaquëꞌ. Ina quëran co yanatëantahuachinquënhuëꞌ, shaꞌhuitëquëꞌ taꞌchin. Ama insoari tërantaꞌ ina natëinasohuëꞌ. Ama huachi imarinso pochin niꞌcosohuëꞌ.

¹¹ Nisha nisha yonquiaton, nitapicancanarin. Co noyahuëꞌ cancantaton, inaora ninaꞌintarin.

Nisha nisha paꞌpisopita

¹² Artimasë aꞌpataranquën. Co ina nanitohuachinhuëꞌ, Tiquico paꞌsarin. Cantonpachinquën, manoton Nicoporisëquë huëcaton, niꞌquico. Inaquë oꞌnapi naꞌhuëanatarahuë.

¹³ Sinasë, Aporosë, inapita cantonpachinquën, noya nontëquëꞌ. Sinasësoꞌ coisë catahuanaꞌpi. Yapaꞌpachinaꞌ, catahuaquëꞌ noya paꞌinaꞌ. Maꞌsha pahuantohuachinaꞌ, quëtëquëꞌ ama pahuanchinasohuëꞌ.

¹⁴ Yaꞌipi imapisopitantaꞌ shaꞌhuitëquëꞌ noya niinaꞌ. Pahuantërinsopita catahuainaꞌ. Inapotohuachinaꞌ, co topinan yaꞌhuapihuëꞌ.

Tiquiapon pochin shaꞌhuirinsoꞌ

¹⁵ Caꞌtaninacosopita yonquiatënënquën, saludos aꞌpatarinënquën. Yaꞌipi imaramasopita yonquiarainquëmaꞌ. Noya yaꞌhuëcoꞌ canpitantaꞌ, tënai. Quisocristo imaramaꞌ niꞌton, nosororamacoi. Yosë inaora nohuanton, noya catahuainquëmaꞌ. Nani ninshitëranquëma huachi. Paono