Santiago 3 - Chayahuita (Shahui)

Nanamënpoaꞌ nininsoꞌ

¹ Ama iyaroꞌsaꞌ naꞌanquëmaꞌ cortoquë pënëntocosohuëꞌ. Piyapiꞌsaꞌ pënënpirëhuahuëꞌ co canpoa tërantaꞌ noya nipatëhuahuëꞌ, aquëtë chachin Yosë anaꞌintarinpoaꞌ.

² Yaꞌipinpoaꞌ co noyahuëꞌ nicatëhuaꞌ, oshahuanëhuaꞌ. Noyasáchin nonacasosoꞌ saca sacaiꞌ. Noyasáchin nonëhuaꞌ naporini, Yosë pochachin cancanchitërihuahuëꞌ. Co huachi aquëtëꞌ tëhuëꞌitërihuahuëꞌ.

³ Cahuario paꞌpatëra, piꞌpian huaꞌnayon acatëntërëꞌ noꞌtëquën pacacaso marëꞌ. Ina quëran motën noꞌtëquën otëërarëꞌ.

⁴ Nanchantaꞌ panca masho nipirinhuëꞌ, quëmapiri otëërin. Noꞌsoratënën huaꞌhuishin niponahuëꞌ, noya otëërarin. Panca ihuani mapiriontaꞌ, noya otëërarin. Insëquësona yaquëpahuachina, noya quëparin.

⁵ Inapochachin nanamënpoaꞌ piꞌpiraꞌhuaya niponahuëꞌ, nonpatëhuaꞌ, naꞌcon nocanëhuaꞌ. Noya nonpatëhuaꞌ, piyapiꞌsaꞌ achinicancanarihuaꞌ. Nipirinhuëꞌ, co noyahuëꞌ nonpatëhuara, anishacancantarihuaꞌ. Niꞌcoꞌ. Pën piꞌpiraꞌhuaya niponahuëꞌ, matohuachina, panca imin aꞌnaroáchin huiquitërin.

⁶ Nanamënpoasoꞌ pën pochin ninin. Paꞌpi co noyahuëꞌ ninin. Ina marëꞌ oshahuanëhuaꞌ. Sopai chachin camairinpoaꞌ co noyahuëꞌ nonacasoꞌ. Nanamënpoa quëran nipinorëhuaꞌ, ninoꞌhuirëhuaꞌ. Maꞌtëhuaꞌ maꞌtëhuaꞌ nonëhuaꞌ. Co noyahuëꞌ nonpatëhuara, nitapicancanarëhuaꞌ.

⁷ Nisha nisha maꞌsharoꞌsaꞌ tananquë yaꞌhuërinsopita pëꞌtahuarëꞌ. Pëꞌtahuahuatëra, co huachi maninpohuëꞌ. Anpiantëhuanoꞌsaꞌ, iꞌquë yaꞌhuërinsopita, inapita pëꞌtahuarëꞌ. Pëhuara, mayo, inapita pochin nininsontaꞌ mapatëra, pëꞌtahuarëꞌ.

⁸ Nipirinhuëꞌ, co insontaꞌ inaora nanitërinhuëꞌ noya nonacasoꞌ. Aꞌnaroáchin co noyahuëꞌ nonëhuaꞌ. Co noyahuëꞌ nonpatëhuaꞌ, yaꞌhuan tomainën pochin nonëhuaꞌ. Aꞌnaroáchin yanquëëtërinso pochin naꞌa piyapiꞌsaꞌ atapicancanarihuaꞌ.

⁹ Nanamënpoa quëran Yosë chinotërëhuaꞌ. “Tata Yosë huaꞌanëntërinpoasoꞌ nóya,” tënëhuaꞌ. Ina nanamënpoa quëran chachin piyapiꞌsaꞌ pinorëhuaꞌ. Yaꞌipinpoaꞌ Yosë chachin nininpoaꞌ. Ina pochin cancantacaso marëꞌ acopirinpoahuëꞌ, nipinorëhuaꞌ.

¹⁰ Yosë noya nontapomarahuëꞌ, piyapi pinopatamaꞌ, co noyahuëꞌ cancantaramaꞌ. Co iyaroꞌsaꞌ nisha nisha nonacasoꞌ yaꞌhuërinhuëꞌ.

^11-12 Niꞌcoꞌ. Quëpa papotohuachina, quëpa nitërin. Co nisha nitërinhuëꞌ. Misëra papotohuachina, misëra nitërin. Co quëpa nitërinhuëꞌ. Aꞌna huinan yaꞌhuëhuachina, noyaiꞌ, caꞌcaiꞌ, co cato chachin pipirinhuëꞌ. Noyápiachin nipachina, co onporontaꞌ caꞌcaquën pipirinhuëꞌ. Inapochachin iyaroꞌsaꞌ, co nisha nisha nonacasoꞌ yaꞌhuërinhuëꞌ. Noyasáchin noncoꞌ.

Yosë noya ayonquirinpoasoꞌ

¹³ ¡Tëhuënchachin noya yonquihuatamaꞌ, noya nisaramaꞌ! Napoaton noya nicoꞌ aꞌnapitantaꞌ noya yonquiramasoꞌ nitochinaꞌ. “Co canpoara noya nitotërëhuahuëꞌ. Yosëíchin catahuarinpoaꞌ noya yonquicasoꞌ,” taꞌtomaꞌ, noya nicoꞌ.

¹⁴ Aꞌnaquënso nipirinhuëꞌ aꞌnapita apiratatonaꞌ, nocanpi. Inahuara nohuantopisoráchin yonquiatonaꞌ noꞌhuitápi. Ina pochin cancantohuatamaꞌ: “Casoꞌ noyaco,” ama tocosohuëꞌ. Co noꞌtëquën yonquiramahuëꞌ. Nonpiánamaꞌ.

¹⁵ Co Yosë nohuanton ina pochin cancantërëhuahuëꞌ. Piyapiꞌsaꞌ inahuara ina pochin yonquipi. Ninocanatonaꞌ, niapiratopi. Inachin yonquipi. Sopai nohuanton, ina pochin yonquipi.

¹⁶ Niapiratohuatëhuara, yaninoꞌhuirëhuaꞌ. Co aꞌnapita nohuantopisoꞌ yonquihuatëhuahuëꞌ, nisha nisha cancantarihuaꞌ. Inapohuatëhuaꞌ, paꞌpi co noyahuëꞌ nisarëhuaꞌ.

¹⁷ Yosëso nipirinhuëꞌ, noꞌtëquën ayonquirinpoaꞌ. Ina catahuahuachinpoaꞌ, noyápiachin cancantarihuaꞌ. Co mantaꞌ noꞌhuitarihuahuëꞌ. Sanoanan quëran nontarihuaꞌ. Aꞌnapita pënënpachinpoaꞌ, noya natanarihuaꞌ. Piyapiꞌsaꞌ nosoroarihuaꞌ. Naporahuaton noyasáchin nisarëhuaꞌ. Co nisha nisha yonquiarihuahuëꞌ. Co nonpintarihuahuëꞌ. Yosëíchin catahuarinpoaꞌ ina pochin cancantacasoꞌ.

¹⁸ Yosë yonquihuatëhuaꞌ, sano cancantatëhuaꞌ, nanan anoyatarihuaꞌ. Napoaton, noya niniꞌtëhuaꞌ yaꞌhuarihuaꞌ. Noya nipatëhuaꞌ, aꞌnapitantaꞌ nicatonpoaꞌ, noya nisapi.