Santiago 2 - Chayahuita (Shahui)

Yaꞌipi piyapiꞌsaꞌ nosoroaꞌhuaꞌ

¹ Quisocristo huaꞌanëntërinpoaꞌ. Inasáchin noya noya ninin. Ina imaramaꞌ niꞌton, ama iyaroꞌsaꞌ aꞌnapita nocancosohuëꞌ. Yaꞌipi piyapiꞌsaꞌ napopináchin nosorocoꞌ.

^2-3 Yosë chinotacaso marëꞌ niyontonpatamara, maꞌhuansoꞌ huëꞌpachina, paꞌyatëramaꞌ. Noyápiachin aꞌmorin. Naꞌa poꞌmoitëra oro quëran nininsoꞌ poꞌmorin. Ina nicatomaꞌ: “Huëquëꞌ iyasha,” itatomaꞌ, noyaquë chachin ahuënsëramaꞌ. Aꞌnaquënso nipirinhuëꞌ, co onpopinchin noyahuëꞌ aꞌmosahuaton huëꞌpachina, co onpopinchin noya niꞌnamahuëꞌ: “Inaquë huaniquëꞌ. Nohuantohuatan, noꞌpaquë tërantaꞌ huënsëquëꞌ,” itëramaꞌ.

⁴ ¿Coꞌta ina pochin nipatamaꞌ, co napopianachin nosororamahuëꞌ? Cancanënpoa quëran huarëꞌ Yosë niꞌsarinpoaꞌ nipirinhuëꞌ, co ina pochin yonquiramahuëꞌ. Co noyahuëꞌ yonquiramaꞌ.

⁵ Niꞌcoꞌ iyaroꞌsaꞌ. Naꞌaquënpoaꞌ co naꞌcon coriqui yaꞌhuëtopirinpoahuëꞌ, Yosë huayoninpoaꞌ imacaso marëꞌ. Yosë nohuitohuatëhuaꞌ, nóya cancantarihuaꞌ. Huëntonënquë chachin ayaꞌconinpoaꞌ niꞌton, Yosëꞌpaꞌ noya noya yaꞌhuëcontarihuaꞌ. Nani shaꞌhuitërinpoaꞌ. “Nosorohuatamaco, inápaquë quëpantaranquëmaꞌ,” itërinpoaꞌ.

⁶ Canpitaso nipirinhuëꞌ, saꞌahua nininsopita co onpopinchin nosororamahuëꞌ. Maꞌhuanoꞌsasoꞌ nonpintatënënquëmaꞌ, ihuarinënquëmaꞌ. Aparisitërinënquëmaꞌ. Coisëquë shaꞌhuirapirinënquëmaꞌ. ¿Ina nipirinhuëꞌ paꞌyataramaꞌ ti?

⁷ Quisocristosoꞌ nóya niponahuëꞌ, tëhuapi: “Co noyahuëꞌ inasoꞌ,” toconpi. Imarëhuaꞌ niꞌton, Quisocristo piyapinënpitanpoaꞌ canpoasoꞌ. Napoaton ama maꞌhuanoꞌsaꞌ naꞌcon naꞌcon paꞌyatocosohuëꞌ.

⁸ Yosë quiricanën quëran noya noya pënëninpoaꞌ. “Quëmaora ninosororanso pochachin aꞌnapitantaꞌ nosorocoꞌ,” itërinpoaꞌ. Yaꞌipi piyapiꞌsaꞌ nosorohuatamaꞌ, noya nisaramaꞌ.

⁹ Nipirinhuëꞌ, aꞌnasoꞌ nocanpatamaꞌ, co noyahuëꞌ nisaramaꞌ. Co Yosë natëramahuëꞌ niꞌton, oshahuanaramaꞌ.

¹⁰ Yosë chachin pënëninpoaꞌ. “Noya natërai,” topiramahuëꞌ, piꞌpian tërantaꞌ co natëhuatamahuëꞌ, oshahuanaramaꞌ. Anaꞌintinquëmasoꞌ yaꞌhuërin.

¹¹ “Saꞌahuanpatamaꞌ, ama aꞌna sanapi monshitocosohuëꞌ,” tënin Yosë. Naporahuaton, “Ama piyapi tëpacosohuëꞌ,” tënin antaꞌ. Co monshihuanaponahuëꞌ, piyapi tëpahuatan, oshahuanaran. Co Yosë natëaranhuëꞌ.

¹² Quisocristo imapatëhuaꞌ, nasha nanan shaꞌhuitërinpoaꞌ. Nichaꞌërinpoaꞌ niꞌton, nanitërëhuaꞌ nóya nicacasoꞌ. Ina nanan chachin yonquiaton, aꞌna tahuëri Yosë coisë pochin nontarinpoaꞌ. Niꞌton, piyapi nosoroatomaꞌ, noya nicoꞌ, noya nontocoꞌ.

¹³ Co piyapiꞌsaꞌ nosorohuatamahuëꞌ, ayaroꞌ tahuëri Yosëntaꞌ co nosoroarinquëmahuëꞌ. Napoaton “Yosë naꞌcon nosororinpoaꞌ,” taꞌtëhuaꞌ, aꞌnapita nosoroaꞌhuaꞌ. Ina quëran ayaroꞌ tahuëri co anaꞌintarinpoahuëꞌ.

Noya nicacasoꞌ yaꞌhuërin

¹⁴ “Cantaꞌ Yosë imarahuë,” tapomarahuëꞌ, co noyahuëꞌ nipatamaꞌ, topinan quëran nonsaramaꞌ. Ina pochin cancantohuatamaꞌ, co chaꞌësaramahuëꞌ.

¹⁵ Niꞌcoꞌ. Aꞌna quëmapihuëꞌ nipon, sanapihuë nipon Quisocristo imanaꞌpi, capa capacasoꞌ, capa aꞌmocasoꞌ nipachina, catahuacasoꞌ yaꞌhuërin.

¹⁶ Co catahuarihuarahuëꞌ: “Noya yaꞌhuëquëꞌ. Ama sëhuënquësohuëꞌ. Ama tana natanquësohuëꞌ,” itapomarahuëꞌ, co aꞌmocaisoꞌ, cosharoꞌ, inapita quëtohuatëhuahuëꞌ, ¡topinan quëran napotarihuaꞌ!

¹⁷ Inapochachin “Cantaꞌ Yosë natërahuë,” tapomarahuëꞌ, co piyapiꞌsaꞌ catahuahuatamahuëꞌ, topinan quëran nonsaramaꞌ. Co tëhuënchachin imaramahuëꞌ.

¹⁸ Aꞌnaquëmaꞌ tapomaꞌ nimara: “Quëmasoꞌ ‘Yosë imarahuë,’ taꞌton, chinotëran. Caso nipirinhuëꞌ noya ninahuë. Quëmasoꞌ Yosë chinotaponahuëꞌ, co noya nipatanhuëꞌ, topinan quëran nonsaran. Caso nipirinhuëꞌ, noya ninahuëso marëꞌ natërahuësoꞌ yaꞌnoarin,” tapomaꞌ.

¹⁹ “Aꞌnaíchin Yosë yaꞌhuërin,” ¿tënan ti? Noꞌtëquën nonan. “Yosë yaꞌhuarin mini,” topi sopairoꞌsantaꞌ. Ina nitotopi niꞌton, tëꞌhuatatonaꞌ, ropa ropatapi. Napoaponaraihuëꞌ, co Yosë imapihuëꞌ. Co napopiso marëꞌ Yosëꞌpaꞌ paꞌsapihuëꞌ.

²⁰ ¡Coꞌchi noꞌtëquën yonquiranhuë paya! Co noya nipatanhuëꞌ, “Cantaꞌ imarahuë,” topiranhuëꞌ, topinan quëran nonsaran.

²¹ Tata Apraan yonquiquëꞌ. Yosëri nontohuachina, “Ama huiꞌnan apiratocosohuëꞌ,” itohuachina, Isaco quëparin. Huiꞌnin niponahuëꞌ, co apiratërinhuëꞌ. Yosë chinotacaso marëꞌ yatëpapirinhuëꞌ, Yosërisoꞌ nichaꞌërin. ¡Natërinso marëꞌ Yosëri noya niꞌnin!

²² “Yosë noꞌtëquën nontërinco,” taꞌton, Apraani natërin. Natëton, noya noya imarin. Co topinan quëran chinotërinhuëꞌ. Yaꞌipi cancanën quëran huarëꞌ natëton, noya imarin.

²³ Yosë quiricanënquë ninshitërin: “ ‘Yosë noꞌtëquën nontërinco,’ tëninso marëꞌ Yosëri noya niꞌnin,” tënin. “Inasoꞌ Yosërëꞌ nipayarin,” tënin antaꞌ. Noꞌtëquën naporin.

²⁴ Co topinan quëran nonacasoꞌ yaꞌhuërinhuëꞌ, tënahuë. Yosë natëtëhuaꞌ, noya nipatëhuaꞌ, noya imarëhuaꞌ. Ina marëꞌ Yosë noya niꞌsarinpoaꞌ.

²⁵ Inapochachin Nacapantaꞌ oshahuanaꞌpi niponahuëꞌ, Yosë yonquiaton, noya ninin. Cosoi aꞌparinsopita huëꞌpachinara, noya aꞌpairin ama inimicoroꞌsari tëpacaiso marëhuëꞌ. Ina quëran poꞌoana quëran catahuarin chaꞌëcasoꞌ. Ina marëꞌ Yosëri noya niꞌnin.

²⁶ Huaꞌyanënpoꞌ capa nipachina, co nanpirëhuëꞌ. Inapochachin topinan quëran nonpatëhuaꞌ, co noya cancantohuatëhuahuëꞌ, co Yosë natërëhuahuëꞌ. Chimipi pochin cancantatëhuaꞌ, co tëhuënchachin imarëhuahuëꞌ.