Salmos 96 - Chayahuita (Shahui)

Nasha cantanën cantatëhuaꞌ, Sinioro chinotahuaꞌ

¹ Nasha cantanën cantatëhuaꞌ, Sinioro chinotahuaꞌ. Yaꞌipi isoroꞌpaquë yaꞌhuërëhuasopita inasáchin chinotahuaꞌ.

² “Yosparinquën Sinioro,” itatëhuaꞌ, chinotahuaꞌ. Nichaꞌërinpoasoꞌ, aꞌnapitanta shaꞌhuitahuaꞌ.

³ Yosëso noyasáchin nicaton, paꞌyapiro nininsopita ninin. Naporinso yaꞌipi piyapiꞌsa shaꞌhuitahuaꞌ.

⁴ Yosëso chini chiníquën nanantërin. Inasáchin chinotacaso yaꞌhuërin. Mamanshiroꞌsasoꞌ topinan quëran tëꞌhuatopi. Yosë tëhuënchinsoꞌ tëꞌhuatacaso yaꞌhuërin.

⁵ Piyapiroꞌsa mamanshinënapitasoꞌ, co máquënhuëꞌ. Sinioroso nipirinhuëꞌ, piꞌiroꞌtë acorin.

⁶ Yosëso huënaráchin huënaráchin yaꞌnorin. Chini chiníquën nanantërin. Ina chinotacaso pëiquë nani maꞌsha noyápiachin yaꞌhuërin.

⁷ Nisha nisha piyapinquëmaꞌ, Sinioro yonquiatoma chinotocoꞌ. Chini chiníquën nanantërinso marëꞌ paꞌyatocoꞌ.

⁸ Noya nicatëhua ina natëahuaꞌ. Maꞌsha ina marëꞌ quëcatëhuaꞌ, chinotacaso pëiꞌ iꞌiratëquë niyontoanhuaꞌ.

⁹ Sinioro pëinënsoꞌ, noyápiachin. Ina iꞌiratëquë yaꞌconatëhua chinotahuaꞌ. Yaꞌipi piyapiꞌsari ina tëꞌhuachinaꞌ.

¹⁰ Nisha nisha nacionoꞌsaquë yaꞌhuëpisopitantaꞌ: “Sinioro huaꞌanëntërinpoa huachi. Isoroꞌpaꞌ noya acorin niꞌton, co huachi nacontarinhuëꞌ. Nisha nisha piyapinpoa nipirëhuahuëꞌ, napopináchin nicatonpoaꞌ huaꞌanëntarinpoaꞌ,” tocoꞌ.

¹¹ Inápaquë yaꞌhuëpisopita capa cancanchinaꞌ. Isoroꞌpaquë yaꞌhuëpisopitanta capa cancanchinaꞌ. Marënta tënënchin. ¡Nani maꞌsha inaquë yaꞌhuëpisopitanta capa cancantatona tënënchinaꞌ!

¹² ¡Sharoꞌsanta noya noyataponaꞌ! Nararoꞌsantaꞌ, capa cancantërëso pochin noya noyataponaꞌ.

¹³ ¡Sinioro oꞌmaton huaꞌanëntarinpoa niꞌton, napoapi! ¡Yaꞌipi piyapiroꞌsa noꞌtëquën huaꞌanëntarin! Noya coisë pochin nicaton, huaꞌanëntarinpoaꞌ.