Salmos 95 - Chayahuita (Shahui)

Capa cancantatëhua Yosë cantanën cantahuaꞌ

¹ Huëco Yosë chinotahuaꞌ: “¡Ma noyanquëncha quëmaso paya!” itahuaꞌ. Inasoꞌ nóya aꞌpairinpoa niꞌton, capa cancantatëhua cantahuaꞌ. Inaíchin nichaꞌërinpoaꞌ.

² “Yosparinquën Sinioro,” itatëhua chinotahuaꞌ. Nisha nisha cantanën cantatëhuaꞌ, paꞌyatahuaꞌ.

³ Yosëíchin chini chiníquën nanantërin. Piyapiꞌsasoꞌ nisha nisha moshapirinahuëꞌ, Yosëíchin chini chiníquën nanantërinsoꞌ.

⁴ Acoporo yaꞌhuërinsopita quëran huarëꞌ huaꞌanëntërin. Ina inápa motopiroꞌsantaꞌ, huaꞌanëntërin.

⁵ Marënta inari acoaton huaꞌanëntërin. Yaniroꞌpanta imirin quëran chachin ninin.

⁶ Huëco Yosëíchin yonquiaꞌahuaꞌ. Isonatëhua ina chinotahuaꞌ. Ina nininpoa niꞌton, paꞌyatahuaꞌ.

⁷ Inaíchin Yosënënpoaꞌ. Canpoasoꞌ ina piyapinënpitanpoa ninëhuaꞌ. Ohuicaroꞌsa huaꞌanëni pastoquë noya aꞌpairin. Inapochachin Sinioronta noya aꞌpairinpoaꞌ. Ipora tahuëri ina nontarinquëma niꞌton, noya natanatoma yonquicoꞌ:

⁸ “Iráca inotëro parti shimashonëmapita huëcasoiꞌ, Miripaquë, Masaquë, inaquëpita co natërinacohuëꞌ. Ama inapita napopiso pochin nicosohuëꞌ.

^9-10 Inapitasoꞌ naꞌcon catahuato, catapini shonca piꞌipi nani maꞌsha quëtërahuë. Inapotopirahuëꞌ, co natëtonacohuëꞌ tënirinaco. Napoaton inapita noꞌhuito: ‘Isopitasoꞌ, camaitërahuësopita co yanatërinacohuëꞌ. Co yanohuitërinacohuëꞌ. Co cancanëhuë yamapihuëꞌ.

¹¹ Napoaton caso Yosëco niꞌto, noꞌtëquën shaꞌhuitërahuë. Co natëtonacohuë anoꞌhuitërinaco niꞌquëhuarëꞌ, co onporonta noyaroꞌpaquë yaꞌconatonaꞌ, sano cancantaponahuëꞌ,’ tënahuë,” itërinquëmaꞌ.