Salmos 91 - Chayahuita (Shahui)

Sinioro noya noya paꞌpoyarinpoasoꞌ

¹ Siniorosoꞌ chini chiníquën nanantaton, yaꞌipi nanitaparin. Ina yaꞌipi cancanënpoa quëran imapatëhuaꞌ, sano yaꞌhuëarihuaꞌ. Chiníquën nanantaton aꞌpaiarinpoaꞌ.

² Sinioro nontohuatëhuara: “Quëmaso Yosënëhuënquën. Naꞌpianaquë naꞌpiraiso pochin yaꞌcopirancoi. Inápa pairahuan ninano pochin paꞌpoyarancoi. Maꞌsha onpohuatoira, quëmasáchin chinotërainquën,” itërëhuaꞌ.

³ Pëcotanquë maꞌsha manëso pochin maꞌsha yaonpotopirinënpoahuëꞌ, inaso nichaꞌsarinpoaꞌ. Naporahuaton ina nohuanton co tiquito canio tiquiarinpoahuëꞌ.

⁴ Anpiantëhuanoꞌsa huaꞌhuina toꞌcohuëtopiso pochin aꞌpaiarinpoaꞌ. Aꞌpaiarinpoa niꞌton, sano yaꞌhuëarihuaꞌ. Iscoto yaꞌcopirinpoaso pochin noꞌtëquën noninso paꞌpoyararinpoaꞌ.

⁵ Tashinta co manta tëꞌhuatacaso yaꞌhuërinhuëꞌ. Tahuërinta pëꞌchinan quëran tëpainënpoasoꞌ co tëꞌhuatarihuahuëꞌ.

⁶ Tiquito canio matohuachina, co tashi tëranta tëꞌhuatarihuahuëꞌ. Tahuërinta nani maꞌsha onpopirëhuahuëꞌ, co paꞌyanarihuahuëꞌ.

⁷ Ahuënanënpoa parti quëran huaranca nanitopi taquicaisoꞌ. Inchinanënpoa quëranta shonca huaranca taquirapirinahuëꞌ, co canpoasoꞌ maꞌsha onpoarihuahuëꞌ.

⁸ Canpoara yaꞌpiranpoa quëran chachin co noyahuëꞌ nipisopita Yosëri anaꞌintërinsoꞌ niꞌsarëhuaꞌ.

^9-10 Canpoasoꞌ, Sinioro chachin paꞌpoyainpoaso marëꞌ acorëhuaꞌ. Chini chiníquën nanantërinsoꞌ nontërëhua niꞌton, co manta onpoarihuahuëꞌ. Co tiquito canio tëranta macainpoaso yaꞌhuërinhuëꞌ.

¹¹ Yosëri anquëninënpita aꞌpaiinpoaso marëꞌ camaiarin. Intohuaso paꞌnëhuaquë, inapita aꞌpaiarinpoaꞌ.

¹² Ama naꞌpiquë tëranta iꞌpacaso marëhuëꞌ, imirina quëran masarinënpoaꞌ.

¹³ Paꞌpiniroꞌsaꞌ, yaꞌhuanoꞌsaꞌ, panca maꞌsharoꞌsaꞌ, inapita huáncana noya paꞌsarëhuaꞌ.

¹⁴ Sinioro napotërinpoaꞌ: “Nohuitatomaco nosororamaco niꞌton, inapita quëran nichaꞌësaranquëmaꞌ. Co insonta nanitapaponquëmahuëꞌ.

¹⁵ Nontohuatamaco aꞌpaniaranquëmaꞌ. Ca chachin caꞌtanaranquëmaꞌ. Maꞌsha onpoatoma co napion ancantopiramahuëꞌ, nichaꞌësaranquëmaꞌ. Inapotaranquëma niꞌton, naní quëran noya niꞌsarinënquëmaꞌ.

¹⁶ Huaꞌqui tahuëri nanpitomaꞌ, noya yaꞌhuëapomaꞌ. Nichaꞌëranquëmasoꞌ yonquiatomaꞌ, capa cancantaramaꞌ,” itërinpoaꞌ.