Salmos 90 - Chayahuita (Shahui)

Piꞌpian marëꞌ isoroꞌpaquë yaꞌhuërëhuasoꞌ

Moisësë oraton naporinsoꞌ

¹ Sinioro quëmasoꞌ paꞌpoyarancoi. Iráca quëran huarëꞌ aꞌpairancoi.

² Coꞌhuara isoroꞌpaꞌ, motopiroꞌsaꞌ, inapita yaꞌhuëyátërasohuëꞌ, quëmasoꞌ yaꞌhuëran. Iráca quëran huarëꞌ yaꞌhuëran. Tahuëri nitiquipirinhuë tërantaꞌ, quëmaso yaꞌhuëápon. Quëmasáchin Yosënquën.

³ Nanpirapiraihuëꞌ, camaitaton: “Piyapinquëmaꞌ, amocan taraantacoꞌ,” tënan. Topatana, chiminatoi amocan taranai.

⁴ Tëhuënchachin huaranca piꞌinta nipirinhuëꞌ, aꞌna tahuëriíchin pochin quëmarisoꞌ niꞌnan. Cara oraíchin tashi aꞌpaitopiso pochin niconin.

⁵ Chiniiri quëparinso pochin nitërancoi. Huaꞌnaraiso pochin co huaꞌqui nanpiraihuëꞌ.

⁶ Pacatoro yancotërinso pochin ninai. Inasoꞌ, tashíramiachin noyápiachin yaꞌnorin. Iꞌhuaraya huarëso nipirinhuëꞌ, ahuirin. Inapochachin quiyanta co huaꞌqui yaꞌhuëraihuëꞌ.

⁷ Tëhuënchachin anoꞌhuitohuatëinquën, aꞌpayanarancoi. Noꞌhuihuatancoira, ataꞌhuantërancoi.

⁸ Yaꞌipi co noyahuëꞌ ninaisopita nitotëran. Poꞌoana quëran nicatoi oshahuanpiraihuëꞌ, yaꞌipi nitotëran.

⁹ Tëhuënchachin noꞌhuihuatancoira, huaꞌyanëhuëi matërancoi. Sëtërarai quëran panca nii oꞌhuahuatoira, co huaꞌquirinhuëꞌ. Inapochachin nanpiraisontaꞌ, co huaꞌquirinhuëꞌ.

¹⁰ Canchisë shonca piꞌíchin nanpiraiso nanirin. Chiníquënoꞌsasoꞌ, posa shonca nanipi. Ina nápo piꞌipi nanpitona nipaꞌyatopi. Napopirinahuëꞌ, naꞌcon naꞌcon sacai nipi. Naporahuatonaꞌ, aꞌnapitarinta amipi. Naporápirinahuëꞌ, aꞌnaroáchin tahuëri naꞌhuëhuachina, chiminapi anta huachi.

¹¹ ¡Co incoi tëranta noꞌhuitonënquë maꞌsha onpotancoisoꞌ, nitotëraihuëꞌ! ¡Co insonta noꞌhuitomiatëransoꞌ, nitotërinhuëꞌ!

¹² Co huaꞌqui isoroꞌpaquë yaꞌhuëapoihuë niꞌton, catahuacoi yonquínahuan yaꞌhuëꞌi.

¹³ Sinioro tahuërëtaantacoi. ¡Ama huachi noꞌhuicoisohuëꞌ! Nosoroatoncoi catahuaantacoi.

¹⁴ Tahuëririahuachina, nosororancoisoꞌ aꞌnotocoi. Inapotohuatancoi, quëma cantanën cantatoi, chiminaquë huarëꞌ capa cancantarai.

¹⁵ Naꞌa piꞌipi parisitërai. Inanapo piꞌipi chachin catahuacoi noya cancanchii.

¹⁶ Quëma nohuanton piyapinënpitacoi, chiníquën nanantëranso niꞌi. Quiya quëran pipipisopitanta ina chachin niꞌinaꞌ.

¹⁷ Naꞌcon nohuantërai quëma pochin cancantaꞌhuaisoꞌ. Napoaton noya niꞌcoi. Yanatërainquën niꞌton, catahuacoi quëma nohuantëranso chachin nii.