Salmos 89 - Chayahuita (Shahui)

Yosë Tapirëꞌ anoyatërinsoꞌ

Isoso canta, Israi quëmapi Itan itopisori ocoirinsoꞌ

¹ Sinioro quëmasoꞌ nosoromiatëranco. Ina yonquiato cantanën cantarápo. Co nisha nisha cancantëransohuëꞌ, shaꞌhuirápo.

² Co nisha nisha cancantatonhuëꞌ, nosoromiatëranco. Piꞌiroꞌtëꞌ co nishatërinsohuë pochin quëmasoꞌ ninan.

³ Nani quëmasoꞌ Tapirëꞌquën anoyatëran. Piyapinën huayonanso niꞌton, nani shaꞌhuitëran:

⁴ “Ca nohuanton quëmá quëran pipipisopitanta huaꞌanëntaponaꞌ,” itëran.

⁵ Quëmasoꞌ Sinioronquën niꞌton, yaꞌipi inápaquë yaꞌhuëpisopita chinotërinën. Co nisha nisha cancantatonhuëꞌ, paꞌyapiro ninanso marëꞌ chinotërinën.

⁶ Co aꞌna yosë quëma pochin yaꞌhuërinhuëꞌ. Inápaquë yaꞌhuëpirinahuë tërantaꞌ, co quëma pochin nipihuëꞌ.

⁷ Quëmasoꞌ chini chiníquën nanantëran. Paꞌpi tëꞌhuatoro yaꞌnoran. Anquëninënpita tancapitërinën.

⁸ Sinioro quëmasoꞌ yaꞌipi huaꞌanëntëran. ¡Co insonta quëma pochin nininhuëꞌ! Yaꞌipi nanitapaton, noꞌtëquënáchin nonan. ¡Co insonta quëma pochin nininhuëꞌ!

⁹ Marë noꞌhuitohuachina panca coꞌsacaitërin. Quëmariáchin nanitëran asanoicasoꞌ.

¹⁰ Marëquë panca maꞌsha yaꞌhuërinsoꞌ, co oshataranhuë minsëapon. Chini chiníquën nanantaton inimiconënpita aꞌparan.

¹¹ Piꞌiroꞌtëꞌ, isoroꞌpaꞌ, inapitaso quëmaquën. Yaꞌipi isoroꞌpaquë yaꞌhuërinso quëmari acoran.

¹² Quëmari norti parti, sor parti, inapita acoran. Taporo, Irmon, inapita motopiroꞌsantaꞌ, quëmari acoran. Inapitanta piyapi pochin nicatonaꞌ, chinotaponën. Capa cancantatonaꞌ, cantaponaꞌ.

¹³ Quëmasoꞌ chini chiníquën nanantëran. Inchinan tanpanënsoꞌ chiníquën niꞌton, yáminsëtëran.

¹⁴ Quëmasoꞌ noya coisë pochin niꞌton, noꞌtëquënáchin yonquiran. Napopináchin piyapiꞌsa nicaton, maꞌsona onpotacasoꞌ noꞌtëquën shaꞌhuiran. Nosorotëransoꞌ, co nisha nisha cancantëransohuëꞌ, ina pochin ninansoꞌ co aꞌporinquënhuëꞌ.

¹⁵ Noya ancantatonaꞌ chinotohuachinën, tëhuënchachin capa cancantapi. Quëmari Sinioro aꞌpintatë pochin quëpaaran niꞌton, noya paꞌsapi.

¹⁶ Nani tahuëri quëma yonquiatënën capa cancantapi. Noꞌtëquënáchin yonquiranso marëꞌ paꞌyatërinën.

¹⁷ Tëhuënchachin quëma catahuarancoi niꞌton, chiníquën cancantarai. Naporahuatoi, noya noya yaꞌnoarai. Noya yonquirancoi niꞌton, chini chiníquën nanantarai.

¹⁸ Sinioronënpoasoꞌ iscoto pochin nicaton, paꞌpoyarinpoaꞌ. Noyasáchin nicaton huaꞌanëntërinpoaꞌ.

¹⁹ Piyapinënpita huaꞌnatopiquë pochin yaꞌnotaton, shaꞌhuitëran: “Piyapinëhuëpita quëran aꞌnara quëmapi chiníquën cancantërinso huayonahuë. Cari catahuarahuë niꞌton, noya noya acorahuë.

²⁰ Inasoꞌ, Tapi. Piyapinëhuë huayonahuësoꞌ. Ca marëꞌ toma nipiquë opomototohuachina, copirno nicacaso marëꞌ acorahuë.

²¹ Inasoꞌ, cari chachin catahuarápo. Chini chiníquën nanantato achinirápo.

²² Co inimiconënpitari ahuëarinhuëꞌ. Co noyahuëꞌ nipisopitari co minsëarinhuëꞌ.

²³ Inimiconënpita cari chachin minsëtarahuë. Inapotohuato, co huachi inapita quënanaponhuëꞌ. Noꞌhuipisopitantaꞌ, ataꞌhuantarahuë.

²⁴ Cari nosoroato catahuarápo. Ca nohuanton chini chiníquën nanantapon.

²⁵ Chiníquën nanantaton huaꞌanëntapon. Marë Pancaiꞌ quëran Iopiratisëiquë huarëꞌ huaꞌanëntapon.

²⁶ Nontohuachincora, ‘quëmaso tatahuënquën, Yosënëhuënquën, paꞌpoyaranco, nichaꞌëranco, napotëranco,’ itaponco.

²⁷ Carintaꞌ, paninanoꞌsa ahuaꞌanëntopiso pochin quëtarahuë. Yaꞌipi aꞌnapita copirnoroꞌsa quëran, chini chiníquën nanantarin.

²⁸ Ina nosororahuësoꞌ co nishatarinhuëꞌ. Inarëꞌco anoyatërahuësontaꞌ, co nishatarinhuëꞌ.

²⁹ Ina quëran pipipisopitaráchin yaꞌhuërënamën huaꞌanëntaponaꞌ. Piꞌiroꞌtë yaꞌhuëasoꞌ, co nishari huaꞌanëntarinhuëꞌ.

^30-32 Napoaponahuëꞌ, aꞌchintërahuësopita aꞌpohuachinaꞌ, naporahuaton co camaitërahuëso pochin nanpihuachinahuëꞌ, anaꞌintarahuë. Pënëntërahuësopita, camaitërahuësopita, inapitanta co yanatëtonaraihuëꞌ co noyahuëꞌ nipachinaꞌ, huaraquë ahuërëso pochin nitarahuë.

³³ Inapotopirahuëꞌ, Tapisoꞌ nosoroápo. Nani shaꞌhuitërahuë niꞌton, co naniantarahuëꞌ.

³⁴ Inaroꞌco anoyatërahuësoꞌ, yonquirápo. Nani nonahuë niꞌton, inachachin nisápon.

³⁵ Caso noyasáchin nicato naporahuë: Yosëco niꞌto, noꞌtëquën Tapi shaꞌhuitërahuë. Napoaton co nonpintarahuëꞌ.

³⁶ Ina quëran pipipisopitarácin copirno yaꞌconpachinaꞌ, huaꞌanëntaponaꞌ. Piꞌi yaꞌhuëasoꞌ, co aꞌnapitari huaꞌanëntarinhuëꞌ.

³⁷ Yoquinta yaꞌhuërárinso pochin nicaponaꞌ. Piꞌiroꞌtë yaꞌhuërinso co taꞌhuachátërasohuëꞌ, co nisharoꞌsari israiroꞌsa huaꞌanëntaponhuëꞌ,” itëran.

³⁸ Napotaponahuëꞌ, Tapi copirno shinpita noꞌhuiton anaꞌintëran. Huayonpiranhuëꞌ, nocanaton aꞌporan.

³⁹ Inarëꞌquën anoyatëranso naniantëran. Shinpita huaꞌanëntërin quëran ocoiran.

⁴⁰ Ninanonënpita pairanën inimiconënpitari pacoantëraꞌpiarin. Pëinënpitanta ohuatëraꞌpiapi.

⁴¹ Inapotopi niꞌton, naꞌhuëroꞌsari nohuantopisoꞌ mapi. Napotopiso marëꞌ yaꞌcaria yaꞌhuëpisopitari tëhuayatopi.

⁴² Quëma nohuanton inimiconënpitari chiníquën nicatonaꞌ, canapi. Canatatonaꞌ, capa cancantopi.

⁴³ Sahuëninën achiꞌmotatë pochin nitëran. Ahuëtohuachinantaꞌ, co huachi catahuaranhuëꞌ.

⁴⁴ Noya noya yaꞌnopirinhuëꞌ, napoonin yaꞌnorin huachi. Huaꞌanëntacaso shiranëntaꞌ, tëꞌyatatë pochin nitëran.

⁴⁵ Huaꞌqui nanpicaso nipirinhuëꞌ, tahuëri matëran. Inapotëran niꞌton, paꞌpi taparo nisarin.

⁴⁶ ¡Ama huachi Sinioro naꞌpirëso pochin nitocoisohuëꞌ! ¡Ama huachi pën huëyarárinso pochin noꞌhuitáquësohuëꞌ!

⁴⁷ Sinioro, caso co huaꞌqui yaꞌhuëapohuëꞌ. Piꞌpian marëꞌ isoroꞌpaquë acorancoi.

⁴⁸ Co inso tëranta yaꞌhuëráponhuëꞌ. Co insonta chimirin quëran chaꞌësarinhuëꞌ.

⁴⁹ Yaꞌnan nosororancoisoꞌ, yonquiantaquëꞌ. ¡Noꞌtëquënáchin nonaton Tapi shaꞌhuitëransoꞌ yonquiquëꞌ!

⁵⁰ Piyapinënpitacoi nipiraihuëꞌ, naꞌa piyapiꞌsa noꞌhuirinacoi. Noꞌhuirinacoisoꞌ, cancanëhuë quëran yonquirárahuë.

⁵¹ Inapochin inimiconënpita nitárinacoi. ¡Huayonanso shinpitacoi nipiraihuëꞌ, noꞌhuirárinacoi!

⁵² ¡Ma noyacha Sinioroso niꞌton, yaꞌhuëmiatarin paya! ¡Amen!