Salmos 87 - Chayahuita (Shahui)

Yosë ninanonën paꞌyapiro nininsoꞌ

Isoso canta, Cori huiꞌninpitari ocoirinsoꞌ

¹ Noya motopiquë chachin Yosëso ninanonën acorin.

² Quirosarin ninano yaꞌcoananënpitasoꞌ, Siniorori nosororin. Yaꞌipi Israiro ninanoroꞌsa quëran naꞌcon naꞌcon nosororin.

³ ¡Quirosarinsoꞌ Yosë ninanonën chachin! Ina yonquiatona paꞌyapiro shaꞌhuipi.

^4-5 Sinioro chachinta shaꞌhuiton: “Nisha nisha ninanoroꞌsaquë yaꞌhuëpisopita imarinaco. Iquipito, Papironia, Huiristia, Tiro, Itiopia, inaquëpita aꞌnaquën imarinaco. Yaꞌipi inapitaso nonpachinara: ‘Quirosarinquë pacatoi, huaꞌhuatëraiso pochin ninai,’ topi. Yaꞌhuëhuanoꞌsanta nonpachinara, inachachin shaꞌhuipi. Caso Yosëco chini chiníquën nanantato iso ninano ocoirahuë.

⁶ Nisha nisha nacionoꞌsa nininëna ninshitohuatora: ‘Yaꞌipi isopita nacionoꞌsa Quirosarinquë huaꞌhuatatona pochin nipi,’ tënahuë

⁷ Inapitanta nansarëꞌnachin cantatonaꞌ, ‘quiyanta Quirosarinquë Yosë nohuitërai,’ topi,” tënin.