Salmos 84 - Chayahuita (Shahui)

Yosë chinotacaso pëisáchin cancantërinsoꞌ

Isoso canta, Cori huiꞌninpita marëꞌ ocoipisoꞌ

¹ Sinioro quëmasoꞌ yaꞌipi nanitaparan. ¡Ma noyápiachincha quëma pëinënso paya!

² Ina iꞌiratëquë canconaꞌhuaso marëꞌ co napion cancantarahuë. Quëma nohuanton Sinioro nanpirai. Yaꞌipi cancanëhuë quëran quëma cantanën cantararahuë.

³ Shinihuatëꞌ, pëirashiꞌ, inapitanta artaronënpitaquë pëꞌpëtën acoatonaꞌ, huaꞌhuatopi. Quëmaso huaꞌanëhuëinquën, Yosënëhuëinquën. Sinioronquën niꞌton, yaꞌipi nanitaparan.

⁴ Pëinënquë chachin aꞌnaquënso yaꞌhuëatonaꞌ, quëma marëꞌ sacatopi. Naporahuatona nani tahuëri chinotërinën. Inapitasoꞌ tëhuënchachin capa cancantopi.

⁵ Catahuaransopitantaꞌ, tëhuënchachin capa cancantopi. Napoaton huaꞌanëntëranquë huarëꞌ nohuantopi iratacaisoꞌ.

⁶ Naꞌnëiꞌ motopiana itopitaquëchin naꞌhuëihuachinara, noꞌpa quëran iꞌsha pipirinsoꞌ quënanquitona oꞌopi. Naporoso nani oꞌnapi yaꞌcari niꞌton, noya noya iꞌsha quënanquipi.

⁷ Yaꞌcaritapona pochin, chini chiníquën cancantëraponaꞌ. Quirosarinquë canconpachinara, Yosë chachin quënanëso pochin nicaponaꞌ.

⁸ Sinioro quëmaso Yosënquën, yaꞌipi huaꞌanëntëran. Iráca Cacopo chinotërinquën. Nontaranquënsoꞌ natanaton, aꞌpanico.

⁹ Copirno huayonaton acotërancoisoꞌ, iscoto pochin yaꞌcopirincoi. Noya nicaton ina catahuaquëꞌ.

¹⁰ Huaranca tahuëri niquë yaꞌhuëpirahuëꞌ, co noya cancantarahuëꞌ. Aꞌna tahuëriíchin tëranta pëinën iꞌiratëquë nipato, noya noya cancantarahuë. Pëinën yaꞌcoananën aꞌpainaꞌpi nicaꞌhuasoꞌ, naꞌcon naꞌcon nohuanchitohuëꞌ. Co noyahuëꞌ nipisopita pëinënquë yaꞌhuëcaꞌhuasoso nipirinhuëꞌ, co nohuantërahuëꞌ.

¹¹ Siniorosoꞌ Yosë niꞌton, paꞌpoyarinpoaꞌ. Aꞌpintatë pochin catahuarinpoa noꞌtëquën yonquicasoꞌ. Noyasáchin nipatëhuaꞌ, nosororinpoaꞌ. Noya nicatonpoaꞌ, noya nininsoꞌ co apiratërinpoahuëꞌ.

¹² Sinioro quëmasoꞌ, yaꞌipi nanitaparan. Chinotërinënquënsopitasoꞌ, tëhuënchachin capa cancantomiatapi.