Salmos 80 - Chayahuita (Shahui)

Nosoroaton noya acoantacaso marëꞌ Yosë nontopisoꞌ

Isonta canta, Asahuari ocoirin

^1-2 Quëmasoꞌ Sinioro, ohuica huaꞌanën pochin ninan. Israiroꞌsacoisoꞌ, ohuicanënpita pochin ninai. Cosi shinpita noya aꞌpaiquëꞌ. Quiropinoꞌsa anquipisoanaquë quëmasoꞌ yaꞌhuëran. Noya nicaton Iprain, Mincamin, Manasisi, inapita huëntonoꞌsa catahuaquëꞌ. Chiníquën nanantaton nichaꞌëcoi.

³ Quëmaso Yosënquën. Catahuacoi iráca pochachin niantaꞌi. Noya nicatoncoi nichaꞌëhuatancoi, chaꞌësarai.

⁴ Sinioro quëmasoꞌ yaꞌipi nanitaparan. Ama huachi noꞌhuitoncoirahuëꞌ, nontërainquënsoꞌ natanaton, nichaꞌëcoi.

⁵ Cosharo yaꞌhuërënamën, naꞌnëcaꞌhuaisoꞌ quëtërancoi. Oꞌoi yaꞌhuërënamëntaꞌ, sëto quëtërancoi.

⁶ Niyacaparaisoꞌ capini nipirinhuëꞌ, nocanatonacoi tëhuarinacoi. Inimicoroꞌsanta tëhuarinacoi.

⁷ Quëmaso Yosënquën. Yaꞌipi nanitaparan. Catahuacoi iráca pochachin niantaꞌi. Noya nicatoncoi nichaꞌëpatancoi, chaꞌësarai.

⁸ Opa paꞌhuë ocoirëso pochin piyapinëpitacoi Iquipito quëran ocoirancoi. Inpio nacionoꞌsaquë yaꞌhuëpisopita aꞌparahuaton, noꞌpanënaquë shacatë pochin nitërancoi.

⁹ Noꞌpaꞌ taparoatë shaꞌtërëso pochin nitohuatancoira, itëhuanatë pochin nisahuatoi, aꞌshinai. Inaporahuatoi yaꞌipi iso noꞌpaꞌ yaꞌhuëtërai.

¹⁰ Naꞌamiatatoi, motopiroꞌsaquë huarëꞌ yaꞌhuërai. Nipano motopiroꞌsaquënta yaꞌsotërai.

¹¹ Piꞌi yaꞌconinso parti quëran, marë Pancaiquë huarëꞌ yaꞌhuëtërai. Pipirin quëraontaꞌ, Iopiratisëiquë huarëꞌ yaꞌhuërai.

^12-14 Quëmasoꞌ yaꞌipi nanitaparan. Quiyasoꞌ quëma opanën pochin nipiraihuëꞌ: ¿Onpoatonta co huachi paꞌpoyarancoihuëꞌ? Inimiconëhuëipita naꞌhuëpona pochin maꞌsha onpotërinacoi. Naman pochin cancantatonaꞌ, yapëꞌyarinacoi. Inápa quëran nocorahuatoncoi, nosorocoi. Ama huachi anaꞌintocoisohuëꞌ.

¹⁵ Quëmaora chachin shacatë pochin nitërancoi. Quëma chachin aꞌpairancoi.

¹⁶ Iporaso nipirinhuëꞌ, inimicoroꞌsa minsërincoi. Ninanonëhuëipitantaꞌ, pënquë ahuiquitëraꞌpiapi. Ina marëꞌ quëmarintaꞌ, inapita noꞌhuiton ataꞌhuantëquëꞌ.

¹⁷ Piyapinënpitacoisoꞌ, quëma chachin noya acorancoi. Ama amiatonhuëꞌ, catahuacoi.

¹⁸ Catahuaantahuatancoi, co huachi onporonta aꞌpoarainquënhuëꞌ. Ananpitaantarëso pochin nitocoi, chinotaantaꞌinquën.

¹⁹ Quëmasoꞌ Sinioronquën, yaꞌipi nanitaparan. Catahuacoi iráca pochachin niantaꞌi. Noya nicatoncoi nichaꞌëpatancoi, chaꞌësarai huachi.