Salmos 8 - Chayahuita (Shahui)

Yosë chiníquën nanantaton noya acorinpoasoꞌ

Yosë cantanën Tapiri ocoirinsoꞌ

¹ Quëmasáchin Sinioro huaꞌanëntërancoi. Yaꞌipi isoroꞌpaquë yaꞌhuërinsopita huaꞌanëntëran. “¡Ma noyanquëncha quëmasoꞌ ninan paya! Yaꞌipi inápaquë yaꞌhuërinsopita quëran, noya noyanquën quëmasoꞌ,” tënai.

² Quëma nohuanton huaꞌhuaroꞌsa noya chinotarinën. Shoꞌshopiaꞌhuaroꞌsantaꞌ, chinotarinën. Inapohuachinara, chini chiníquën nanantaton, piyapinënpita paꞌpoyaran. Inapita paꞌpoyaton, inimicoroꞌsa minsëaran.

³ Piꞌiroꞌtë acoransoꞌ nëꞌpëhuatora, yoqui, tayoraroꞌsaꞌ, inapita niꞌnahuë. Ina nicato: “Ma noyacha acorin paya,” tënahuë.

⁴ Inapita acoaponahuëꞌ, ¿piyapicointa yonquirancoi ti? ¡Co quiyasoꞌ máquëncoihuëꞌ! ¡Co yonquiatoncoi catahuancoiso inashitëraihuëꞌ!

⁵ Ina nipirinhuëꞌ, anquëniroꞌsa pochin shininancoi. Noya nicatoi huaꞌanëntaꞌhuaiso marëꞌ acorancoi.

⁶ Huaꞌan pochin nicaꞌhuaiso marëꞌ acorancoi. Yaꞌipi maꞌsha huaꞌanëntërai.

^7-8 Ohuacaroꞌsaꞌ, ohuicaroꞌsaꞌ, tanan maꞌsharoꞌsaꞌ, anpiantëhuanoꞌsaꞌ, samiroꞌsa iꞌquë paꞌpisopita, nisha nisha maꞌsharoꞌsa marëquë yaꞌhuëpisoꞌ, yaꞌipi inapita ahuaꞌanëntërancoi.

⁹ Quëmasáchin Sinioro huaꞌanëntërancoi. Yaꞌipi isoroꞌpaquë yaꞌhuërinsopita huaꞌanëntëran. “¡Ma noyanquëncha quëmasoꞌ ninan paya! Yaꞌipi inápaquë yaꞌhuërinsopita quëran, noya noyanquën quëmasoꞌ,” tënai.