Salmos 73 - Chayahuita (Shahui)

Yosë shiaꞌporahuësoꞌ

Isoso canta, Asahuari ocoirinsoꞌ

¹ Yosësoꞌ, israiroꞌsanpoa paꞌpi nosororinpoaꞌ. Noyápiachin cancantohuatëhuaꞌ, nosororinpoaꞌ.

² Iꞌhuaso nipirinhuëꞌ, piꞌpian nisha yonquirahuë. Yosë yaaꞌporëso pochin cancantërahuë.

³ Co noyahuëꞌ nipisopita noyaparahuë. Inapitaso nocanatonpoa co noyahuëꞌ nipirinahuëꞌ, noya noya yaꞌhuërapi. Ina yonquiato co noyahuëꞌ yonquipirahuëꞌ.

⁴ Inapitasoꞌ noya noya yaꞌhuëatonaꞌ, co chiminacaiso yonquipihuëꞌ.

⁵ Co aꞌnapita pochin parisitatonaraihuëꞌ, yashi yashin yaꞌhuërápi.

⁶ Nitapapisoꞌ, co tapayapihuëꞌ. Ina pochachin inahuantaꞌ: “Ma noyacha caso ninahuë paya,” toconpi. Aꞌmoanpisontaꞌ, co aꞌpopihuëꞌ. Inapochachin inahuantaꞌ, aꞌnapita maꞌsha onpotacaisoráchin cancantopi.

⁷ Paꞌpi amonpi niꞌton, tomari yaiꞌcopirayatárin. Co noyahuëꞌ nicacaisoráchin yonquimantapi.

⁸ Co taparohuanhuëꞌ noꞌhuitopi. Co yonquinahuanhuë niꞌtonaꞌ, piyapiꞌsa maꞌsha yaonpotopi.

⁹ Inápaquë huaꞌanëntërinsontaꞌ, pinopi. Isoroꞌpaquë yaꞌhuëpisopitantaꞌ, chinotopi.

¹⁰ Napoaton naꞌa piyapiꞌsari paꞌyatopi. Yosë piyapinënpitanta inahua pochachin yacancantopi.

¹¹ Inapita yonquiatona napopi: “Isopitasoꞌ co noyahuëꞌ nisápirinahuëꞌ, co Yosë nitotarinhuëꞌ. Chini chiníquën nanantaponahuëꞌ, co manta aꞌpiponhuëꞌ.

¹² Niꞌco isopita: Co noyahuëꞌ niponaraihuëꞌ, naꞌcon canapi. Co parisitaponaraihuëꞌ, maꞌhuanpi.

¹³ Topinan quëran canpoasoꞌ noyápiachin cancantërëhuaꞌ. Topinan quëran co noyahuëꞌ ninëhuasopita aꞌporëhuaꞌ.

¹⁴ Apira apira ahuërëso pochin Yosë nitárinpoaꞌ. Nani tashíramiachin maꞌsha onpotárinpoaꞌ,” topi.

¹⁵ Canta inapita pochin yonquirahuë naporini, imarinënquënsopita anishacancanchitohuëꞌ.

¹⁶ Ina naꞌcon yonquiato: “¿Onpoatoncha napoca nicaya?” topirahuë, co nanitërahuë noꞌtëquën yonquicaꞌhuasoꞌ.

¹⁷ Yosë chinotacaso pëiquë yaꞌconato yonquiárahuë. Naporo huarëꞌ inapita taꞌhuantacaiso yaꞌhuërinsoꞌ, yonquirahuë huachi.

^18-19 Tëhuënchachin co natëpisopitahuëꞌ, co yaꞌhuëmiatapihuëꞌ. Aꞌnanaya toꞌcoitërëso pochin nipachinaꞌ, taꞌhuantaponaꞌ. Naporo huarëꞌ noꞌtëquën yonquiatona paꞌyanapona huachi.

²⁰ Quëmari Sinioro capayatërëso pochin nicaton anaꞌintaran. Noya yaꞌhuëpirinahuëꞌ, anaꞌintaran huachi.

²¹ Inapita yonquiato noꞌhuitochináchin cancantopirahuëꞌ.

²² Co noꞌtëquën yonquiatohuëꞌ co yonquinahuanhuë pochin ninahuë. ¡Quëma marësoꞌ Sinioro, maꞌsharoꞌsa pochin niconahuë ipora!

²³ Napoaporahuëꞌ, co aꞌporancohuëꞌ. Nosoroatonco inchinan imira quëran sëꞌquërëso pochin quëparanco.

²⁴ Noya nicaꞌhuaso marëꞌ nani tahuëri ayonquiranco. Aꞌna tahuërintaꞌ, inápaquë quëpantaranco huachi.

²⁵ ¡Quëmasáchin Sinioro nohuantëranquën! Imaranquën niꞌton, isoroꞌpaquë yaꞌhuërinsopita, co paꞌyatërahuëꞌ.

²⁶ Aꞌna tahuëri Sinioro parisitërahuë. Naꞌcon parisitopirahuëꞌ, quëmasoꞌ huaꞌanëntomiatëranco. Achinicancananco niꞌton, imamiataranquën.

²⁷ Co imarinënquënsopitasohuëꞌ, quëmari ataꞌhuantapon. Aꞌporinënquënsopitantaꞌ, acopitapon.

²⁸ Caso nipirinhuëꞌ, nohuitaꞌhuanquënsoráchin cancantarahuë. Ina pochin cancantohuato, noya noya nisarahuë. Quëma huaꞌanëntatonco paꞌpoyaranco. Napoaton yaꞌipi naporansopita shaꞌhuirápo.