Salmos 72 - Chayahuita (Shahui)

Copirno marëꞌ Yosë nontërinsoꞌ

Isoso canta, Saromoni ocoirinsoꞌ

¹ Quëmasáchin Yosënquën niꞌton chinotaranquën. Copirnonëhuëi catahuaquëꞌ. Quëma pochin noꞌtëquën yonquiaton, noyasáchin niin.

² Quëma pochin cancantaton huaꞌanënchincoi. Quëma piyapinënpitacoi, noya camaiincoi. Saꞌahuaroꞌsantaꞌ, catahuain.

³ Motopiroꞌsaꞌ, motopiaꞌhuaroꞌsaꞌ, inaquëpita sano yaꞌhuëatonaꞌ, noꞌtëquën yonquiꞌinaꞌ.

⁴ Saꞌahuaroꞌsa paꞌpoyain. Inapita huiꞌninpitanta nichaꞌëin. Nonpinatona ihuatopisopitasoꞌ, nipincatërëso pochin anaꞌinchin.

⁵ Tëꞌhuatatënquën natëmiachinquën. Piꞌi, yoqui, inapita yaꞌhuëmiatopiso pochin, naporinso ama ayachinsohuëꞌ.

⁶ Pasto nipotohuatëra, oꞌnanpachina papotaantarin. Poroncayonta noꞌpaꞌ shipirotërin. Inapochachin copirnonëhuëi nicaton, catahuachin.

⁷ Ina huaꞌanëntasoꞌ, sano yaꞌhuëatoi noꞌtëquën yonquiꞌi. Yoqui taꞌhuantomiataquë huarëꞌ, inapo yaꞌhuëchi.

⁸ Aꞌna marë quëran, aꞌna marëꞌpaꞌ huaꞌanëntërinso noꞌpaꞌ naniin. Iopiratisiiꞌ quëran, isoroꞌpaꞌ nanirinquë huarëꞌ huaꞌanënchin.

⁹ Inimiconënpita inotëro parti yaꞌhuëpi. Inapitasoꞌ: “Co huachi nanitëraihuëꞌ chinitaꞌhuaisoꞌ. Huaꞌanëntatoncoi camaiincoi nipachin,” taꞌtona inarë anoyachinaꞌ.

¹⁰ Noya nicatonaꞌ, nani maꞌsha quëchinaꞌ. Copirno marëꞌ nininsonta pahuërëchinaꞌ. Tarsis copirnoroꞌsaꞌ, Soꞌtonoꞌsaquë copirnoroꞌsa yaꞌhuëpisoꞌ, inapitarinta inapochinaꞌ. Sapa, Sipa, inaquëpita copirnoroꞌsa yaꞌhuëpisontaꞌ, inapochinaꞌ.

¹¹ Yaꞌipi copirnoroꞌsa ina notënanquë isoinaꞌ. Yaꞌipi nacionoꞌsaquë yaꞌhuëpisopitari natëinaꞌ.

¹² Nosorotopisopitari nontohuachinaꞌ, nichaꞌësarin. Pahuantopisopitanta co incari catahuapirinhuëꞌ, inari catahuapon.

¹³ Sano piyapiroꞌsa nosoroaton catahuapon. Nosorotopisopita chimirin quëran nichaꞌësarin.

¹⁴ Huaꞌanëntatona aparisitohuachinaꞌ, nichaꞌësarin. Naꞌcon paꞌtërinso pochin nicaton napotarin.

¹⁵ Copirnonëhuëi ¡Huaꞌqui tahuëri nanpiton, camaiincoi! Sapaquë oro yaꞌhuërinso quëchinaꞌ. Ina marëꞌ Yosë nontápaiso yaꞌhuërin. Siniorori chachin catahuaraꞌin.

¹⁶ Notohuaroꞌ trico yaꞌhuërëhuaso noꞌpaquë yaꞌhuëꞌin. Motopiroꞌsa huiꞌnimotënquëpita noya noyachin. Nipano motopi tanantërinquë maꞌsha noya noyatërin. Ina pochin trico shaꞌnëhuasoꞌ noyachin. Iminoꞌsaquë pacatoro yaꞌhuërinso pochin. Ninanoroꞌsaquëntaꞌ, notohuaroꞌ piyapi naꞌain.

¹⁷ Noya copirno niꞌton, yaꞌipi parti noya nahuiꞌin. Piꞌi yaꞌhuërárinso pochin inantaꞌ, yonquiraꞌinaꞌ. Insosona noya yaꞌhuëcaso marëꞌ yashaꞌhuihuachin iꞌna yonquiaton shaꞌhuiꞌin. Yaꞌipi nacionoꞌsaquë yaꞌhuëpisopitari ina paꞌyachinaꞌ.

¹⁸ ¡Ma noyacha Yosëso paya! Inasoꞌ Sinioro, israiroꞌsanpoa chinotërëhuasoꞌ. Inasáchin nani maꞌsha ninin.

¹⁹ Inasoꞌ, noyápiachin. Inasáchin chinotomiachinaꞌ. ¡Yosë huënaratërinsoari yaꞌipi isoroꞌpaꞌ noyá aꞌpinchin! ¡Inapoꞌin mini!

²⁰ Isëquë huarëꞌ Tapi Yosë nontërinsopita taꞌhuantërin. Inasoꞌ, Quisi huiꞌnin.