Salmos 69 - Chayahuita (Shahui)

Co napion ancantaton Yosë nontërinsoꞌ

Isonta canta Tapiri ocoirin

^1-2 Quëmaso Yosënëhuënquën. Paꞌitato yachimiitarahuëso pochin nisarahuë. Nosoroatonco nichaꞌëco. Yaꞌcoroquë paꞌmiatarahuëso pochin nisarahuë. Co maquë tëranta nantëhuë chinicaso yaꞌhuërinhuëꞌ. Anpo acopo camarëso pochin nisarahuë. Chiniiꞌ quëpararincoso pochin parisitarahuë.

³ Yaitápato sacarorahuë. Napoápato iquin conopiratërahuë. Yosë catahuaincoso ninato, pëtorayatërëso pochin niꞌtërahuë.

⁴ Ainëhuë huaꞌhuayátërahuë nipirinhuëꞌ, ina quëran naꞌcon naꞌcon inimicotërinacosopita naꞌarin. Co manta onpotopirahuëꞌ, noꞌhuirinaco. Inimicoroꞌsa naꞌatonaꞌ, topinan quëran yatëparinaco. Co manta ihuatopirahuëꞌ, ayanaꞌhuaso camaiárinaco.

⁵ Quëmaso Yosënëhuënquën. Caso co manta yonquirahuësohuë pochin ninahuë. Oshanëhuë co nanitërahuëꞌ, poꞌotaꞌhuanquënsoꞌ.

⁶ Sinioro, quëmasoꞌ yaꞌipi nanitaparan. Ama tëhuërahuëso marëꞌ chinotërinënquënsopita tapainasohuëꞌ. Aꞌnaquën paꞌpi nohuantatonaꞌ, chinotërinën. Ama naporahuëso yonquiatonaꞌ, inapitanta aꞌpochinasohuëꞌ.

⁷ Imaranquënso marëꞌ naꞌaro maꞌsha onpotërinaco. Inapotatonaco atapaninaco.

⁸ Iyahuëpita tëranta nisha pochin niꞌninaco. Mamahuë huaꞌhuinpita niponaraihuëꞌ, inapotërinaco.

⁹ Quëma pëinën Sinioro paꞌpi aꞌpitërahuë. Napoaton quëma inimiconënpita noꞌhuirinaco cantaꞌ.

^10-11 Sëtato naꞌpatëra, tëhuaconinaco. Sëtohuatora, saꞌcatën aꞌmorahuë. Napohuatorantaꞌ, tëhuayatoninaco.

¹² Naní quëran chinotárinaco. Ninano yaꞌcoanaroꞌsaquë huënsëpisopitantaꞌ, pinorinaco. Noꞌpirahuëroꞌsa quëran huarëꞌ, cantahuachinara aꞌpiantërinaco.

¹³ Caso nipirinhuëꞌ, Sinioro chiníquën nontëranquën. Quëmaso Yosënëhuënquën niꞌton, ipora catahuaco. Nosoroatonco aꞌpanico huachi. Yácatahuaranco niꞌton, nichaꞌëco.

¹⁴ Yaꞌcorotërahuëso pochin ninahuë quëran, ocoico huachi. Noꞌhuirinacosopita quëran nichaꞌëco. Anpo quëran ocoirëso pochin nitoco.

¹⁵ Ama chiniiꞌ quëparincoso pochin maꞌsha onpoꞌisohuëꞌ. Panca nihui oꞌhuatërinso pochin inimicoroꞌsa yanitërinaco. Paꞌpoyaco ama canainacosohuëꞌ.

¹⁶ Quëmasoꞌ noyanquën Sinioro. Nosoromiatërancoi niꞌton, aꞌpanico. Paꞌpi nosoromiatatonco yonquico huachi.

¹⁷ Piyapinënco niꞌto, ama nocancosohuëꞌ. Paꞌpi huëhuëpiroquë nisarahuë niꞌton, aꞌnaroáchin catahuaco.

¹⁸ Yaꞌcarirahuatonco catahuaco. Inimiconëhuëpita quëran nichaꞌëco.

¹⁹ Maꞌsha onpotërinacosoꞌ quëma nitotëran. Atapaninacosoꞌ, co noyahuëꞌ niꞌninacosoꞌ, inapitanta nitotëran. Inpitasona inimicotërinacosopitantaꞌ, nitotëran.

²⁰ Maꞌsha onpotápatonaco asëtomiatërinaco. Inapoato co huachi chiníquën cancantërahuëꞌ: “Insha tëranta taꞌma nosoroatonco achinicancanaponco,” taꞌto ninápirahuëꞌ. ¡Coꞌchi paya!

²¹ Cosharonëhuëquë noniarinaco. Yamorohuatorantaꞌ, huino áin oꞌshitërinaco.

²² Napopiso marëꞌ anaꞌintëquëꞌ: Capatonaꞌ, oꞌotona capa cancantopirinahuëꞌ, ina quëran chachin nitapicancainaꞌ.

²³ Somarayarëso pochin cancantatonaꞌ, ama noꞌtëquën yonquiꞌinasohuëꞌ. Naporahuatonaꞌ, yamorinso pochin quëparichinaꞌ.

²⁴ Noꞌhuiton chiníquën anaꞌintëquëꞌ. Ama aꞌnaya tëranta taꞌananpiinënquënsohuëꞌ.

²⁵ Yaꞌhuëpiquë ama huachi yaꞌhuëꞌinasohuëꞌ. Tananhuantërarin quëran pantachin.

²⁶ Quëma nohuanton parisitopirahuëꞌ, ina inahuanta aparisitarinaco, tëhuarinaco, napotërinaco.

²⁷ Co noyahuëꞌ nipiso marëꞌ parisichinaꞌ. Ama oshanëna inquitëquësohuëꞌ.

²⁸ Nanpipisopita quiricanënquë nininëna ninshitëransoꞌ, tapiquëꞌ. Ama noya piyapiꞌsa nininënpitarëꞌ nininëna ninshitëquësohuëꞌ.

²⁹ Caso canioto, co napion cancantápirahuëꞌ, quëma Yosënëhuënquën anoyatahuatonco nichaꞌëco.

³⁰ Quëma cantanën cantato chinotaranquën. “Yosparinquën,” itatënquën napotaranquën. Inapoato Sinioro noya cancantarahuë.

³¹ Toro tëparahuato ahuiquitopirahuëꞌ, toroaꞌhuanta tëpato inapotopirahuëꞌ, co cantato chinotëranquënso pochin niꞌsaranhuëꞌ.

³² Ina nicatona parisitopisopita capa cancantapi. Chinotërinënquënsopita chiníquën cancantapi.

³³ Nosorotopisopitari nontohuachinara, Siniororisoꞌ natanin. Piyapinënpita áquë quëpapirinahuëꞌ, co nocaninhuëꞌ.

³⁴ Inápaquë yaꞌhuëpisopitarintaꞌ, Sinioro chinochinaꞌ. Isoroꞌpaꞌ, marë, inaquëpita yaꞌhuëpisopitantaꞌ, yaꞌipiya quëran ina chinochinaꞌ.

³⁵ Quëmari chachin Quirosarinquë yaꞌhuëpisopita nichaꞌësaran. Cota huënton noꞌpanënaquë ninanoroꞌsa yaꞌhuërinsontaꞌ, anoyataantaran. Quëma nohuanton piyapinënpita iso noꞌpa chachin huaꞌanëntaponaꞌ. Huaꞌanëntatonaꞌ, inaquë yaꞌhuëapona huachi.

³⁶ Piyapinënpita quëran pipipisopitantaꞌ, iso noꞌpa chachin huaꞌanëntaponaꞌ. Nosororinënquënsopita isëquë chachin yaꞌhuëaponaꞌ.