Salmos 66 - Chayahuita (Shahui)

Nani maꞌsha nininsoꞌ yonquiatëhuaꞌ, Yosë paꞌyatahuaꞌ

¹ Yaꞌipi isoroꞌpaquë yaꞌhuërëhuasopita capa cancantatëhuaꞌ, Yosë chinotahuaꞌ.

² Paꞌyapiro niꞌton, ina cantanën cantahuaꞌ. Noya noya nininso cantaroꞌsa cantatëhuaꞌ, chinotahuaꞌ:

³ “Nani maꞌsha acoransopitasoꞌ, paꞌyápiro ninan. Chini chiníquën nanantëran niꞌton, inimiconënpita tëꞌhuatatënën, anotatonaꞌ: ‘Tomonca,’ tëcaponaꞌ.

⁴ Yaꞌipi piyapiꞌsa chinotaponën. Quëma cantanën cantatona paꞌyataponën,” itahuaꞌ.

⁵ Sinioro catahuainpoaso marëꞌ naporinsopita, yonquicoꞌ. Canpoa marëꞌ paꞌyapiro nininsopita acorin:

⁶ Marë pancaiꞌ nipirinhuëꞌ, ayanirin. Iinta ayanipachina, noꞌpaꞌ paꞌtatonaꞌ, shimashonënpoapita pëntonpi. Inaquëpita Yosë yonquiatona capa cancantopi.

⁷ Inasoꞌ, chiníquën nanantaton huaꞌanëntomiatarin. Yaꞌipi nacionoꞌsa aꞌpaiarin. Ama co natantochináchinhuëꞌ cancantopisopitari yaꞌhuërëtacaiso marëhuëꞌ, aꞌpaiarin.

⁸ Nisha nisha piyapinquëma yaꞌhuëramasoꞌ, Yosë paꞌyatatoma chinotocoꞌ. Cantanën cantatoma inapocoꞌ.

⁹ Ina nohuanton nanpiarëhuaꞌ. Co taꞌhuantërëhuahuëꞌ.

¹⁰ Napoaton ina nontato: “Quëmasoꞌ Yosënëhuëinquën. Prata asoquirëso pochin tënirancoi.

¹¹ Ritiquë sami manëso pochin nitërancoi. Panca pëꞌpëto aꞌmitëtatë pochin aparisitërancoi.

¹² Tananpitërancoi niꞌton, apinapicharoꞌsanta toꞌpi toꞌpitatë pochin nitërinacoi. Pancaiꞌ apëntontërëso pochin nitatoncoi, aparisitërancoi. Naporahuaton pënquë poꞌmorëso pochin maꞌsha onpotërancoi. Napoaponahuëꞌ, napoin quëran noya noya acoantarancoi.

¹³ Napoaton pëinënquë yaꞌconahuë. Inaquë quëma marëꞌ maꞌsha tëparahuato yaꞌipi ahuiquitarahuë. Inapoato shaꞌhuitëranquënsoꞌ, ananiarahuë.

¹⁴ Maꞌsha onpochináchin nicasoco, inapochin nicaꞌhuasoꞌ shaꞌhuitëranquën.

¹⁵ Noya nicatënquën chinotaꞌhuanquënso marëꞌ tororoꞌsa amo amonën nininsoꞌ quëshiaranquën. Tororoꞌsaꞌ, chipoaꞌhuaroꞌsaꞌ, carniroroꞌsaꞌ, inapita quëma marëꞌ tëparahuato, pimóchin ahuiquitarahuë,” itërahuë.

¹⁶ Yaꞌipinquëma Yosë chinotëramasopita, huëco catahuarincoso shaꞌhuichinquëmaꞌ.

¹⁷ Co napion ancantato chiníquën Yosë nontërahuë. Naporahuato cantanën cantarahuë.

¹⁸ Co noyahuëꞌ yonquirahuë naporini, co Sinioro natëitoncohuëꞌ.

¹⁹ Inaso napoaponahuëꞌ, natanahuatonco aꞌpanirinco.

²⁰ Ma noyacha Yosëso paya. Nontohuatora aꞌpanirinco. Nosoroatonco catahuarinco.