Salmos 65 - Chayahuita (Shahui)

Nani piꞌiquë Yosë catahuarinpoasoꞌ

^1-2 Quëmasáchin Yosënquën. Sionquë chinotërinënquënso pëi yaꞌhuërin. Noya noyanquën niꞌton, yaꞌipiya quëran chinochinën. Maꞌsona nicaꞌhuaisoꞌ shaꞌhuitohuatëinquën, ina inachachin nicaꞌhuaiso yaꞌhuërin. Nontërainquënsoꞌ natanatoncoi catahuarancoi niꞌton, inapocaꞌhuaiso yaꞌhuërin. Napoaton yaꞌipi piyapiꞌsa nontarinënquën.

³ Co noyahuëꞌ cancantatoi co noyahuëꞌ ninai. Oshahuanpiraihuëꞌ, oshanëhuëi inquitërancoi.

⁴ Nohuitaꞌhuainquënso marëꞌ huayonancoi niꞌton, noya cancantërai. Noya cosharo pëinënquë yaꞌhuërin. Ina aꞌcatë pochin nitatoncoi catahuacoi nohuitatëinquën noya noya cancanchii.

⁵ Quëmaso Yosënëhuëinquën. Nontohuatëinquëran noꞌtëquën aꞌpaniarancoi. Paꞌpi huëhuëpiro nininsopita nicaton aꞌpaniarancoi. Isoroꞌpaꞌ nanirinquë yaꞌhuëpisopita quëma ninaponën. Marë aquëtëran yaꞌhuëpisopita quëran huarëꞌ, ninaponën.

⁶ Quëmari motopiroꞌsa achiniran. Chiníquën nanantaton naporan.

⁷ Marë panca coꞌsacaitohuachina, quëmari asanoiran. Nisha nisha nacionoꞌsanta noꞌhuitohuachinara, quëmariáchin asanoran.

⁸ Isoroꞌpaꞌ nanirinquë huarëꞌ yaꞌhuëpisopitantaꞌ, huëhuëpiro ninansoꞌ nicatona tëꞌhuatopi. Quëma nohuanton piꞌi pipirinso parti yaꞌhuëroꞌsa capa cancantopi. Piꞌi yaꞌconinso parti yaꞌhuëroꞌsanta napopi.

^9-10 Quëma nohuanton oꞌnani, noꞌpaꞌ ohuërëpisoꞌ acaniororin. Inapotërinquë shaꞌtohuachinara, notohuaroꞌ nitërin huachi. Nishitëmototopisonta catahuaran niꞌton, noyataantarin.

¹¹ Quëma nohuanton nani piꞌiquë cosharo noya noyatërin. Chitoro quëran oꞌnan anotohuachina, nani maꞌsha noya noyatërin.

¹² Inotëro partinta oꞌnanpachina, pastoroꞌsa canomëtërin. Motopiroꞌsaquënta oꞌnanpachina, huënaráchin aꞌmopiso pochin yaꞌnopi.

¹³ Canonamatëroꞌsaquë pëꞌtahua huëntonoꞌsa naꞌarin. Motopianaroꞌsantaꞌ, tricororoꞌsari imotërin. Capa cancantatona noncaropiso pochin nipi. Yaꞌipi inapita cantapiso pochin nipi.