Salmos 63 - Chayahuita (Shahui)

Yosë yanohuitërinsoꞌ

¹ Quëmasáchin Yosënëhuënquën. Paꞌpi yamororëso pochin cancantato, yanohuitëranquën. Inotëroquë noꞌpaꞌ yanirin. Inaquë shaꞌtohuatëra, co noyatërinhuëꞌ. Ina pochin cancantato noyá nohuitaꞌhuanquë huarëꞌ sano cancantarahuë.

² Chinotërinënquënso pëiquë chinotatënquën noya nohuichinquën. Tëhuënchachin chiníquën nanantaton, yaꞌipi nanitaparan. Quëmasoꞌ noya noyanquën.

³ Co huachi nosorohuatancohuëꞌ, chiminaꞌhuaso noya noya. Noya noyanquën niꞌton, chinotáponquën.

⁴ Isoroꞌpaquë nanpisoco, chinotáponquën. Nontohuatanquën, natananco mini.

⁵ Noya ancantato, noya cosharo caꞌnëso pochin chiníquën cancantarahuë. Noya ancantato chinotaranquën.

⁶ Tashinta quëhuënpatora yonquiáranquën. Yono tashihuë nipon, tahuëri yaꞌcarihuë nipon capayatohuatora, yonquiantaranquën.

^7-8 Naꞌcon catahuaranco niꞌton, inchinan quëran sëꞌquërëso pochin, quëpatonco co onporonta aꞌpoarancohuëꞌ. Anpiantëhuanoꞌsa huaꞌhuin toꞌcohuëtërinso pochin aꞌpairanco. Napoaton noya ancantato cantarahuë.

⁹ Yatëparinacosopitasoꞌ, inahuaꞌton chiminpachinaꞌ, paꞌpitapi.

¹⁰ Inimiconënpitari sahuëniquë tëpaponaꞌ. Inapotohuachinaꞌ, asaniroꞌsari caponaꞌ.

¹¹ Piyapinënpitacoi chinotatëinquën capa cancanchii. Copirnonëhuëintaꞌ, chinotatënquën capa cancanchin. Nonpintëroꞌsaso nipirinhuëꞌ, quëmari Sinioro anaꞌintaton ataꞌhuantapon.