Salmos 51 - Chayahuita (Shahui)

Oshanën inquitacaso marëꞌ Yosë nontërinsoꞌ

Isonta canta Tapiri ocoirin

¹ Quëmasoꞌ Sinioro noyanquën niꞌton, nosoroco. Nosoromiatatonco oshanëhuë inquitoco.

² Co noyahuëꞌ cancantërahuëso noyá paꞌmorëso pochin, oshanëhuë inquitatonco noyápiachin cancan quëtoco.

³ Iꞌhua tëhuënchachin co noyahuëꞌ ninahuë. Oshahuanahuësoꞌ yonquiato, co napion cancantërahuë.

⁴ Noya pënënpirancohuëꞌ, co natëranquënhuëꞌ. Naꞌinpiro nininsoꞌ nicato tëhuëtëranquën. Co natëranquënhuë niꞌquëhuarëꞌ, anaꞌintancoso yaꞌhuërin.

⁵ Tëhuënchachin huaꞌhuatapo quëran huarëꞌ, co noyahuëꞌ cancantërahuë. Mamahuë yoꞌnamënquë yaꞌhuëasoco quëran huarëꞌ, oshahuanchináchin cancantërahuë.

⁶ Noya cancantaꞌhuaiso marëꞌ acorancoi niꞌton, catahuacoi noꞌtëquën yonquiꞌi.

⁷ Oshanëhuë inquitoco noyápiachin cancanchi. Paꞌmocancanco huiri huiríchin pochin cancanchi.

⁸ Co noyahuëꞌ nicato chiníquën sëtopirahuëꞌ. Anoyacancantohuatanco, capa cancantarahuë huachi.

⁹ Oshahuanpirahuëꞌ, ama huachi ina yonquiquësohuëꞌ. Yaꞌipi co noyahuëꞌ ninahuësoꞌ, inquitoco.

¹⁰ Nasha cancan Sinioro quëtoco. Cancanëhuë anoyatohuatanco, noyápiachin cancantaantarahuë. Inapotohuatanco noyasáchin yonquiato, natëtochináchin cancantarahuë.

¹¹ Ama aꞌpomiatocosohuëꞌ. Noya nicaꞌhuaso catahuarincoso ispirito, ama cancanëhuë quëran ocoiquësohuëꞌ.

¹² Co noyahuëꞌ ninahuë niꞌton, sëtërahuë. Anoyacancantoco noya cancantaantaꞌi. Quëma ispiritonën achiniantaꞌinco.

¹³ Inapotohuatanco oshahuanoꞌsa aꞌchintantarahuë. Pënënpato, co noyahuëꞌ yonquipisopita aꞌporahuatonaꞌ, imasarinën huachi.

¹⁴ Nichaꞌëco, ama tëpaꞌinacosohuëꞌ. Quëmasáchin nanitëran nichaꞌëancosoꞌ. Inapotohuatanco, nichaꞌërancosoꞌ yonquiato cantaarahuë.

¹⁵ Catahuaco Sinioro nichaꞌërancosoꞌ shaꞌhuiꞌi. Noya noyanquën ninansoꞌ yonquiato, cantanën cantai.

¹⁶ “Oshanëhuë marëꞌ maꞌsha tëpato yaꞌipi ahuiquichi,” topirahuë, co ina nohuantëranhuëꞌ.

¹⁷ Oshanëhuëi marëꞌ paꞌpi sëtatoi, co napion cancantohuatoira tëhuënchinsoꞌ, noya niꞌsarancoi.

¹⁸ Quirosarin ninano nosoroantaquëꞌ. Pairanën ohuatopisoꞌ noya acoantaquëꞌ.

¹⁹ Naporoꞌ tëhuënchinsoꞌ, quëma marëꞌ maꞌsha nininsoꞌ tëpaarai. Aꞌnaquën yaꞌipi ahuiquitarai. Aꞌnaquëontaꞌ, piꞌpian ahuiquitarai. Naporoꞌ, artaronënquë toroaꞌhuaroꞌsa ahuiquitatoi chinotarainquën.