Salmos 47 - Chayahuita (Shahui)

Yosë yaꞌipiroꞌpaꞌ huaꞌanëntërinsoꞌ

Isonta canta, Cori huiꞌninpitari ocoirinsoꞌ

¹ Nisha nisha piyapinquëma yaꞌhuëramasoꞌ, Sinioro yonquiatoma pinca pinca tocoꞌ. Ina paꞌyatatomaꞌ, “yai, yai,” charácoꞌ.

² Siniorosoꞌ chini chiníquën nanantaton, paꞌpi tëꞌhuatoro yaꞌnorin. Yaꞌipi isoroꞌpaꞌ huaꞌanëntaton noya noya copirno yaꞌconin.

³ Israiroꞌsanpoasoꞌ ina catahuarinpoa niꞌton, nisha nisha nacionoꞌsa ataꞌhuantërëhuaꞌ. Inapita canatëhuaꞌ, nohuantërëhuaso nitërëhuaꞌ.

⁴ Ina huayontërinpoa noꞌpaꞌ huaꞌanëntacasoꞌ. Ina huaꞌanëntatëhua Cacopo shinpitanpoasoꞌ: “Ma noyacha noꞌpaꞌ huaꞌanëntërëhua paya. Nosoroatonpoa ahuaꞌanëntërinpoaꞌ,” tënëhuaꞌ.

⁵ Siniorosoꞌ Yosë. Huaꞌanëntacaso shiranënquë huënsëcaso marëꞌ nani nanpërin. Naporo chachin capa cancantatëhuaꞌ, noncarorëhuaꞌ. Corto huaꞌanoꞌsantaꞌ, tronpitaroꞌsa pihuirantapi.

⁶ Yosë cantanën cantaco cantahuaꞌ. Copirnonënpoa niꞌton, ina cantanën cantahuaꞌ.

⁷ Inasoꞌ yaꞌipi roꞌpaꞌ huaꞌanëntërin niꞌton, noya yonquiatomaꞌ, cantanën cantacoꞌ.

⁸ Yosësoꞌ, yaꞌipi nacionoꞌsa copirnonën nicacaso marëꞌ yaꞌconin. Noya noya huaꞌanëntacaso shiranënquë huënsëárin.

⁹ Nacionoꞌsa huaꞌanënapita, Yosë piyapinënpitarëꞌ nipayaponaꞌ. Apraan shinpitarëꞌ napoaponaꞌ. Yosë nohuanton isoroꞌpaquë copirnoroꞌsa yaꞌconpi. Inari yaꞌipi huaꞌanëntarin.