Salmos 46 - Chayahuita (Shahui)

Yosë paꞌpoyatonpoa achinirinpoasoꞌ

Isonta Cori huiꞌninpita canta ocoipisoꞌ

¹ Yosë paꞌpoyatonpoa achinirinpoaꞌ. Nani maꞌsha onporëhuaquë catahuarinpoaꞌ.

^2-3 Napoaton co tëꞌhuarëhuahuëꞌ. Isoroꞌpaꞌ nisha nisha nisapirinhuë tërantaꞌ, co paꞌyanarihuahuëꞌ. Motopiroꞌsa marëquëꞌpaꞌ niitohuachinaꞌ, Marë panca coꞌsacaitaton tënëntapon. Napohuachina, motopiroꞌsa nacon naconcharapon. Inapopirinhuë tërantaꞌ, co tëꞌhuatarihuahuëꞌ.

⁴ Aꞌna noyápiachin iꞌ nininsoari, Yosë ninanonënquë yaꞌhuëpisopita acapacancanin. Inaquësoꞌ, Yosë chini chiníquën nanantërinsoꞌ chinotopi.

⁵ Yosë chachin inaquë yaꞌhuërin niꞌton, co incari tëranta minsëarinhuëꞌ. Tahuëririahuachina Siniorori catahuararin.

⁶ Ina nonpachina, isoroꞌpaꞌ soquiarin huachi. Nacionoꞌsaquë nisha nisha copirnoroꞌsari huaꞌanëntërinso noꞌhuitapirinahuëꞌ, ropatatona huaꞌya huaꞌyantáponaꞌ.

⁷ Siniorosoꞌ, yaꞌipi nanitaparin. Inasoꞌ, yacatahuarinpoaꞌ. Iráca Cacapori chinotërinsoꞌ, paꞌpoyararinpoaꞌ.

⁸ Yaꞌipi piyapiꞌsa yonquiꞌinaꞌ. Yosë naporinso noya niꞌinaꞌ. Ina nohuanton co noyahuëꞌ nipisopita, taꞌhuantopi.

⁹ Yaꞌipi roꞌpaꞌ nanirinquë huarëꞌ, ina nohuanton co huachi quira nisapihuëꞌ. Pëꞌchinanoꞌsaꞌ, nansaroꞌsaꞌ, inapita paꞌquirin. Quira toronanoꞌsanta ahuiquitahuaton:

¹⁰ “¡Taꞌtoco huachi! Ca Yosëco napotaranquëmaꞌ. Cari yaꞌipi nacionoꞌsa huaꞌanëntarahuë. ¡Yaꞌipi roꞌpaꞌ huaꞌanëntaꞌhuaso yaꞌhuërin!” itarin.

¹¹ Siniorosoꞌ yaꞌipi nanitaparin. Inasoꞌ, yacatahuarinpoaꞌ. Iráca Cacapori chinotërinsoꞌ, paꞌpoyararinpoaꞌ.