Salmos 42 - Chayahuita (Shahui)

Sëtaton Yosë nontërinsoꞌ

Cori huiꞌninpita canta ocoipisoꞌ

¹ Yo taꞌahuachina, yamoroton iꞌsha naꞌcon naꞌcon nayarin. Inapochachin cantaꞌ, Yosë naꞌcon naꞌcon nohuantërahuë.

² Yamoro yatëparincoso pochin cancantato, Yosë naꞌcon naꞌcon nohuantërahuë. Inasoꞌ nanpiárin niꞌton, yachinotërahuë. ¿Onporo huarëcha ina pëinënquë paato, chinotaantarëꞌpoya? tënahuë.

³ Nani tahuëri piyapiꞌsa tëhuarinaco: “¿Inso huachi Yosë chinotëransoꞌ?” itërinaco. Napotërinacoso marëꞌ tahuëri tashirë chachin sëtato naꞌnërahuë.

⁴ Ina yonquihuatora, paꞌpi sëtërahuë. Iráca naꞌa niyontonahuatoi, Yosë chinotërai. Pëinënquë yapaꞌpatoira, cari piyapiꞌsa quëparahuë. Capa cancantatoi nonca nonca tërarai. “Yosparinquën Sinioro,” tëcatoi, panca pita ninai. Iporaso napoaponahuëꞌ, parisitárahuë.

⁵ Parisitapirahuëꞌ, ¡ama huachi sëchisohuëꞌ! ¡Ama huachi napoin ancanchisohuëꞌ! “Sinioro catahuaantaponco,” tënahuë. Ina nohuanton noya chinotaantapo. Inasáchin Yosënëhuë niꞌton, nichaꞌësarinco.

⁶ Ina pochin cancantato Yosë nontërahuë: “Cortaniiꞌ huiꞌnirai parti Irmon motopi yaꞌhuërin. Nisaro motopinta yaꞌhuërin. Ina parti yaꞌhuëato, pënsha yatacopirinso pochin cancantërahuë. Napoaton Sinioro naꞌcon yonquiaranquën.

⁷ Panca tahuanoꞌsaquë, anoiroꞌsa tënëntërinso natanëꞌ. Anoiꞌ imotërincoso pochin Sinioro quëma nohuanton nanirinso chachin parisitërahuë.

⁸ Napoaporahuëꞌ, tahuëri nanihuachin nosoroaranco. Tashinta nipirinhuëꞌ, yonquiatënquën cantarápo. Quëmasáchin ananpiranco niꞌton, nontáponquën:

⁹ Quëmasoꞌ Sinioro yápaꞌpoyaranco. ¿Onpoatonta iporasoꞌ naniantëranco? Inimiconëhuëpita aparisitërinaco niꞌton, sëtárahuë.

¹⁰ Inimicoroꞌsa noꞌhuirinacosoꞌ yonquiato, co napion cancantërahuëꞌ. Nani tahuëri piyapiꞌsa tëhuarinaco: ‘¿Inso huachi Yosë chinotëransoꞌ?’ itárinaco,” itërahuë.

¹¹ Parisitapirahuëꞌ, ¡ama huachi sëchisohuëꞌ! ¡Ama huachi napoin ancanchisohuëꞌ! Sinioro catahuaantaponco. Ina nohuanton noya chinotaantapo. Inasáchin Yosënëhuë niꞌton, nichaꞌësarinco.