Salmos 40 - Chayahuita (Shahui)

Paꞌpoyarinso marëꞌ Yosë chinotërinsoꞌ

Isonta canta Tapiri ocoirin

¹ Maꞌsha onpohuatora, Sinioroíchin catahuaincoso ninarahuë. Naporahuë niꞌton, co napion ancantato nontërahuësoꞌ natanahuatonco, catahuarinco.

² Yaꞌcoroquë yaꞌcorotërëso pochin co napion ancantopirahuëꞌ, ina quëran ocoirëso pochin catahuarinco. Natëtëquë ahuanirincoso pochin achinicancaninco niꞌton, chiníquën cancantato noya paꞌnahuë huachi.

³ Inapotërinco niꞌton, nasha cantanën ocoiato cantarahuë. “Ma noyacha Yosë catahuarinco paya,” tënahuë cantato. Ina nicatonaꞌ, naꞌa piyapiroꞌsa Yosë tëꞌhuatopi. Ina tëꞌhuatatonaꞌ, natëpi huachi.

⁴ Sinioroíchin ninahuatëhuaꞌ, tëhuënchachin capa cancantarihuaꞌ. Co natëtochináchinhuëꞌ cancantopisopita, co catahuainposo marëꞌ yonirihuahuëꞌ. Mamanshi moshacaiso marëꞌ Yosë aꞌpopisopitantaꞌ, co tahuërëtarihuahuëꞌ.

⁵ Napoaton Sinioro nontato napotërahuë: “Quëmasoꞌ Sinioro catahuancoiso marëꞌ notohuaroꞌ paꞌyápiro nininsopita ninan. Noya yonquirancoisontaꞌ, huaꞌhuayátërahuë. Catahuarancoisopita shaꞌhuihuatointaꞌ, co apira tiquichináchinhuëꞌ.

⁶ Maꞌsharoꞌsa tëpatoi chinotaꞌhuainquënsoꞌ, co nohuantëranhuëꞌ. Trico roꞌmo pochin nininsoꞌ quëshihuatëinquëntaꞌ, co nohuantëranhuëꞌ. Oshanëhuëi marëꞌ maꞌsha yaꞌipi ahuiquitohuatointaꞌ, co noya niꞌsarancoihuëꞌ. Napoaponahuëꞌ, quëma nohuanton nasitërahuë natëaꞌhuanquënso marëꞌ.

⁷ Napoaton naporahuë: Maꞌtana Sinioro isëquë nisarahuë. Quiricanënquë naporinso chachin nitocoꞌ.

⁸ Quëma nohuantëranso chachin nohuantërahuë nicaꞌhuasoꞌ. Pënëntëransoꞌ, cancanëhuë quëran yonquirárahuë.

⁹ Notohuaroꞌ piyapinënpita niyontonpiquë, noya nicacaisoꞌ shaꞌhuitërahuë. Nani Sinioro shaꞌhuitërahuësoꞌ nitotëran. Co piyapiꞌsa canitërahuëꞌ.

¹⁰ Noyasáchin ninansoꞌ shaꞌhuitërahuë. Nichaꞌërancosoꞌ, co nisha nisha cancantëransohuëꞌ, inapitanta shaꞌhuitërahuë. Nosororancosoꞌ, noꞌtëquënáchin nonansoꞌ, inapitantaꞌ, notohuaroꞌ piyapinënpita niyontonpiquë noꞌtëquën shaꞌhuitërahuë.

¹¹ Quëmanta Sinioro nosoroatonco catahuaco. Noꞌtëquën nontërancoso chachin nosoroco.

¹² Naꞌcon maꞌsha onporahuë. Co tiquinahuanhuë niꞌton, co shaꞌhuichináchinhuëꞌ. Co noyahuëꞌ ninahuëso marëꞌ parisitárahuë. Yaꞌpirahuë quëraontaꞌ, co huachi noya quënantërahuëꞌ. Motohuëquë naꞌcon ain yaꞌhuërin. Ina quëran naꞌcon naꞌcon maꞌsha onporahuë. Naporahuaton co huachi chiníquën cancantërahuëꞌ.

¹³ ¡Sinioro! Nosoroatonco nichaꞌëco. Manóton huëꞌsahuaton catahuaco.

¹⁴ ¡Yatëparinacosopita quëmari atapanquëꞌ! Maꞌsha yaonpotërinacosopitantaꞌ, co taparohuanhuë pochin taꞌananpiinaco.

¹⁵ Nocanatonaco tëhuarinacosopitantaꞌ, inapochachin taꞌananpiinaco.

¹⁶ Quëma chinotërinënquënsopitaso nipirinhuëꞌ, yonquiatënën capa cancanchinaꞌ. Quëmari nichaꞌëcasoꞌ nohuantopisopitanta napoꞌinaꞌ: ‘¡Siniorosoꞌ chini chiníquën nanantërin!’ chinaꞌ.

¹⁷ Caso nipirinhuëꞌ, maꞌsha onpoato nosorotárahuë. Ama Sinioro naniantocosohuëꞌ. Quëmasáchin catahuatonco nichaꞌëranco. ¡Manóton catahuaco huachi!” itërahuë.