Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Salmos 37 - Chayahuita (Shahui)


Yosëíchin yonquicaso yaꞌhuërinsoꞌ
Isonta canta Tapiri ocoirin

1 Ama co noyahuëꞌ nipisopita yonquiaton noꞌhuitëquësohuëꞌ. Naꞌa maꞌsha yaꞌhuëtohuachinaꞌ, ama noyapatëquësohuëꞌ.

2 Iporasoꞌ mini noya yaꞌhuëapi. Napopirinahuëꞌ, pasto pochin nisapi. Pasto nipotohuatëra ahuirin. Inapochachin inahuantaꞌ, aꞌnanaya taꞌhuantaponaꞌ.

3 Canpitaso noya nicatoma Sinioro natëcoꞌ. Inasáchin cancantatoma isoroꞌpaquë yaꞌhuëcoꞌ.

4 Sinioroíchin nosoroaton capa cancantëquëꞌ. Ina nohuanton nohuantomiatëransopita natanansoꞌ, yaꞌhuëtarinquën.

5 Nani tahuëri Yosë nontatomaꞌ: “Nohuantëransoꞌ Sinioro anitotoco natëinquën,” itocoꞌ. Inasáchin chinotohuatamaꞌ, catahuararinquëmaꞌ.

6 Camotëchin nipachina, piꞌi noya noya aꞌpinin. Inapochachin Sinioro catahuahuachinquëmaꞌ, noya nicatoma imamiatëramasoꞌ, yaꞌnoarin.

7 Sinioro yonquiaton sano cancantëquëꞌ. “Catahuaponco mini,” tëcaton ina ninaquëꞌ. Aꞌnaquën co noyahuëꞌ nicaponahuëꞌ maꞌhuanahuachin, ama noꞌhuitëquësohuëꞌ.

8 Ama noꞌhuitaton yaiꞌhuërëtëquësohuëꞌ. Inapohuatan, aquë aquëtë nanan yaꞌhuëapon.

9 Co noyahuëꞌ nipisopitasoꞌ, yaꞌhuëpiso noꞌpa quëran aꞌpaponaꞌ. Sinioro chinotopisopitaso nipirinhuëꞌ, yaꞌhuëpisoꞌ noꞌpaꞌ huaꞌanëntaponaꞌ.

10 Co noyahuëꞌ nipisopitasoꞌ, co huaꞌquiya quëranhuëꞌ taꞌhuantaponaꞌ. Yonipiranhuë tërantaꞌ, co huachi inapita niꞌsaranhuëꞌ.

11 Sano piyapiroꞌsaso nipirinhuëꞌ, iso noꞌpaꞌ huaꞌanëntaponaꞌ. Naporahuatonaꞌ, sano cancantapi huachi.

12 Inpioroꞌsasoꞌ, noya nipisopita maꞌsha yaonpotopi. Napoatona co tënorochináchinhuëꞌ niꞌpi.

13 Napopirinahuëꞌ, Siniororisoꞌ inapita yonquiaton tëhuarin. Anaꞌintacaso tahuëri nani naniarin niꞌton, naporin.

14 Inpioroꞌsasoꞌ, sahuëni, pëꞌchinan, inapita quihuípi. Saꞌahuaroꞌsaꞌ, sano piyapiroꞌsaꞌ, noya piyapiroꞌsaꞌ, inapita tëpacaiso marëꞌ inapita ohuarapi.

15 Sahuëninën quëran yatëpatopirinhuëꞌ, inaorasaꞌ nisha chiminapon. Pëꞌchinanëontaꞌ, nopantapon.

16 Aꞌnaquën inpioroꞌsa niponaraihuëꞌ, notohuaroꞌ maꞌhuanpi. Noya piyapisoꞌ piꞌpian yaꞌhuëtaponahuëꞌ, noya noya ninin.

17 Inpioroꞌsasoꞌ, Siniorori ataꞌhuantapon. Noya piyapiroꞌsaso nipirinhuëꞌ, achiniapon.

18 Noꞌtëquën imapisopitasoꞌ, Siniorori aꞌpaiarin. Inari ahuaꞌanëntërinsontaꞌ, yaꞌhuëmiatapon.

19 Parisitacaso tahuëri canquihuachin, co tapanaponahuëꞌ. Tanaro tahuëriꞌsanta nipirinhuëꞌ, natëaquë huarëꞌ coshataponaꞌ.

20 Pasto yanipachina aꞌnaroáchin huëyarin. Inapochachin inpioroꞌsasoꞌ, Yosëri anaꞌintapon. Sinioro inimicotopisopitasoꞌ, conai yanquëërinso pochin nicaponaꞌ.

21 Inpioroꞌsaso maꞌsha aꞌnantaponaraihuëꞌ, co yapahuërëtopihuëꞌ. Noya piyapiꞌsasoꞌ, nosoroatona aꞌnantopi.

22 Siniorori catahuarinsopitasoꞌ, iso noꞌpaꞌ huaꞌanëntaponaꞌ. Inari co noyahuë yonquirapiton noꞌhuirinsopitasoꞌ, taꞌhuantaponaꞌ.

23 Piyapi noya nisahuachina, Siniorori chachin achiniarin noya noya nicacaso marëꞌ.

24 Anotërëso pochin nipirinhuë tërantaꞌ, co inaquëranchin quëparitarinhuëꞌ. Siniorori imirin quëran sëꞌquëatë pochin nitarin niꞌton, huaniantapon.

25 Iráca canta huiꞌnapico nipirahuëꞌ, iporasoꞌ mashotërahuë huachi. Mashotopirahuë, noya nipisopitaso co onporonta nosoro yaꞌhuëtárinso niꞌchinahuëꞌ. Co huiꞌnina tëranta maꞌshari pahuantërinhuë niꞌton, co nata natantë́rantapihuëꞌ.

26 Nani tahuëri piyapiꞌsa nosoroaton maꞌsha aꞌnanin. Huiꞌninpitanta noya niꞌtonaꞌ, noya catahuatapi.

27 Co noyahuëꞌ ninansopita aꞌporahuaton noyasáchin niquëꞌ. Ina pochin nipatan yaꞌhuëmiataran.

28 Siniorosoꞌ, noyasáchin nipisopita paꞌyatërin. Imamiatërinsopita co onporonta aꞌpoarinhuëꞌ. Noya aꞌpairápon. Inpioroꞌsa shinpitaso nipirinhuëꞌ, ataꞌhuantapon.

29 Noya nipisopitasoꞌ, iso noꞌpaꞌ huaꞌanëntaponaꞌ. Naporahuatonaꞌ, inaquë yaꞌhuëmiataponaꞌ.

30 Noya nipisopitasoꞌ, yonquínahuan nonpi. Noya coisë pochin noꞌtëquën nonpi.

31 Cancanëna quëran Yosë aꞌchininsoꞌ, yonquirápi. Napoaton co toꞌcoitërëso pochin nisapihuëꞌ.

32 Co noyahuëꞌ nipisopitasoꞌ, noya nipisopita poꞌoana quëran nëhuëpi. “Tëpachinaꞌi,” taꞌtona napopi.

33 Napopirinahuëꞌ, Siniorori yaꞌcopiarin co masapihuëꞌ. Anaꞌintacaiso marëꞌ coisëquë quëpahuachinarantaꞌ, ina nohuanton coisëri noya aꞌpapon.

34 Quëmanta Sinioro natëton ina ninaquëꞌ. Inapohuatan Sinioro noya acoarinquën. Inari chachin iso noꞌpaꞌ huaꞌanëntacaso marëꞌ quëtarinquën. Inpioroꞌsa ataꞌhuantërinsoꞌ, quëmaora yaꞌpiran quëran chachin niꞌsaran.

35 Aꞌnaquën inpioroꞌsa noya yaꞌhuëatonaꞌ, aꞌnapita nocanpi. Nara panca taꞌahuaninso pochin noya noyatopi.

36 Napoaponaraihuëꞌ, naꞌhuërinso pochin nicatonaꞌ, capa nisapi huachi. Inapita yonquiato yonípirahuëꞌ, co huachi quënanahuëꞌ.

37 Noya nicaton noꞌtëquënáchin imarinsoꞌ, niꞌquëꞌ. Inasoꞌ co paꞌyan paꞌyan tëcatonhuëꞌ, sano cancantapon.

38 Co natantochináchinhuëꞌ cancantopisopitasoꞌ, taꞌhuantomiataponaꞌ. Co noyahuëꞌ nipisopitasoꞌ, taꞌhuantacaisoꞌ cantiipon.

39 Noya nipisopitasoꞌ Siniorori catahuararin. Maꞌsha onpoatona co napion ancantohuachinaꞌ, inari paꞌpoyapon.

40 Siniorori catahuararin taꞌacasoꞌ. Inpioroꞌsari maꞌsha yaonpotërin quëran taꞌacasoꞌ catahuapon. Paꞌpoyacaso marëꞌ ina nontopi niꞌton, nichaꞌësarin.

© 2011, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ