Salmos 34 - Chayahuita (Shahui)

Siniorori aꞌpairinsoꞌ yonquiaton cantarinsoꞌ

Isonta canta Tapiri ocoirin

¹ Apira apira Sinioro chinotarahuë. Ina chinotaꞌhuasoꞌ, co onporonta tananpitapohuëꞌ.

² Sinioro imato: “¡Ma noyacha ninahuë paya!” tënahuë. Sano piyapiroꞌsa natanpachinara, capa cancanchinaꞌ.

³ Huëco napopináchin Sinioro chinotahuaꞌ. Chini chiníquën nanantërinso marëꞌ inapotahuaꞌ.

⁴ Maꞌsha onpoato Sinioro chinotërahuë. Paꞌpi paꞌyanpirahuëꞌ, ina nichaꞌërinco huachi.

⁵ Sinioroíchin nëꞌpëhuatëhuaꞌ, capa cancantarihuaꞌ. Co onporonta topinan quëran ina ninarihuahuëꞌ.

⁶ Saꞌahuaya pochin cancantato, chiníquën Sinioro nontërahuë. Inasoꞌ, nani maꞌsha onporahuë quëran nichaꞌërinco.

⁷ Sinioro noya nicatë natëhuatëra, anquëninën tahuirapitatonpoa paꞌpoyararinpoaꞌ.

⁸ Siniorosoꞌ nóya. Tënitoma nitotoco canpitantaꞌ. Ina natëtona chinotopisopitasoꞌ, ¡tëhuënchachin capa cancanchinaꞌ!

⁹ Sinioroáchin cancantëramasopitasoꞌ, ina noya nicatoma natëcoꞌ. Ina noya nicatona natëpisopitasoꞌ, nani maꞌsha noya nininsoꞌ yaꞌhuëtapi.

¹⁰ Paꞌpiniaꞌhuaroꞌsanta cosharo pahuantopi. Pahuantohuachinara, tana natanpi. Sinioroíchin yonihuatëhuasoꞌ, nani maꞌsha noya nininsoꞌ co onporo pahuantarinpoahuëꞌ.

¹¹ Huëco huaꞌhuaroꞌsa aꞌchinchinquëmaꞌ, natancoꞌ. Sinioro noya nicatë natëcasoꞌ aꞌchintaranquëmaꞌ.

^12-13 ¿Huaꞌqui tahuëri nicatomaꞌ, noya yaꞌhuëcaso nohuantërama ti? Napohuachinsoꞌ, noyasáchin nonacamaso yaꞌhuërin. Ama onporo tëranta nonpinquësohuëꞌ.

¹⁴ Co noyahuëꞌ ninansopita aꞌporahuaton, noyasáchin niquë huachi. Naporahuaton sano yaꞌhuëcamaso cancantëquëꞌ. Sano yaꞌhuëaton ina pochin yaꞌhuëquëꞌ.

¹⁵ Aꞌnapita maꞌshanëna noya nicatonaꞌ, co sëꞌhuahuachinahuëꞌ, Siniorori noya aꞌpaiarin. Maꞌsha onpoatona nontohuachinara, noya natanaton catahuararin.

¹⁶ Co noyahuëꞌ nipisopitaso nipirinhuëꞌ, Siniorori co noyahuëꞌ niꞌnin. Ataꞌhuantohuachin, co incari tëranta inapita yonquiarinhuëꞌ.

¹⁷ Noya nipisopita maꞌsha onpoatona Sinioro nontohuachinara, noya natanin. Inapoaton nani maꞌsha onpopi quëran nichaꞌësarin.

¹⁸ Oshanëna marëꞌ co napion sëtohuachinara, yaꞌcarísha Siniorori huaniparin. Oshanëna yonquiatona naꞌnëhuachinara, Siniorori nichaꞌësarin.

¹⁹ Noyasáchin nipisopitantaꞌ, nisha nisha maꞌsha onpopi. Napopirinahuëꞌ, nani maꞌsha onpopi quëran Siniorori nichaꞌësarin.

²⁰ Yaꞌipi nansëquën quëran huarëꞌ Siniorori aꞌpairarin. Co aꞌnaya tëranta nipantapihuëꞌ.

²¹ Co noyahuëꞌ nipisopitaso nipirinhuëꞌ, co noyahuëꞌ nipisoari chachin tëpapon. Noya nipisopita co quëꞌyahuachinarahuëꞌ, anaꞌintacaso yaꞌhuërin.

²² Piyapinënpitasoꞌ, Siniorori nichaꞌësarin. ¡Inasáchin chinotopisopitasoꞌ, co onporonta anaꞌintacaso yaꞌhuëaponhuëꞌ!