Salmos 33 - Chayahuita (Shahui)

“Yosparinquën Sinioro,” itaton, chinotërinsoꞌ

¹ Noyasáchin ninaꞌpinquëma noya cancantocoꞌ. Yaꞌipi cancanëna quëran imapisopitari Sinioro chinotohuachinaꞌ, noya noya cantapi.

² Arpa piꞌniatoma Sinioro chinotocoꞌ. “Yosparinquën Sinioro,” taꞌtoma piꞌnicoꞌ. Shoncarin arpanta piꞌniatomaꞌ, cantanën cantacoꞌ.

³ Nasha canta ocoirahuatoma cantacoꞌ. Noya cantatomaꞌ, noyasha piꞌnicoꞌ.

⁴ Sinioro nanamënsoꞌ, noꞌtëquënáchin ninin. Noyasáchin maꞌsha acorin quëran co nisha nisha cancantërinsohuëꞌ, anitotërinpoaꞌ.

⁵ Noya coisë pochin noꞌtëquën yonquihuatëhuaꞌ, Sinioro nosoroarinpoaꞌ. Yaꞌipiroꞌpaquë ina nosororinpoaso niꞌnëhuaꞌ.

⁶ Sinioro camaitohuachina, piꞌiroꞌtë yaꞌnorin. Inaquë yaꞌhuërinsopitantaꞌ, nonin quëran chachin acorin.

⁷ Marënta pancaiꞌ nipirinhuëꞌ, yontonahuatë taparëso pochin itohua itohua acorin.

⁸ Yaꞌipiroꞌpaquë yaꞌhuëramasopita Sinioro noya nicatoma natëcoꞌ. Yaꞌipi nanpiramasopita noya nicatoma natëcoꞌ.

⁹ Ina nonin quëran nani maꞌsha yaꞌhuërin niꞌton, natëcoꞌ. Ina camaitërin quëran noyá acopinan quëparitërin. Napoaton noya nicatoma natëcoꞌ.

¹⁰ Nisha nisha piyapiroꞌsa maꞌpitaso nicacaisoꞌ yonquipi. Siniorori yaꞌcopihuachina, co yonquipiso nicaponahuëꞌ.

¹¹ Sinioro maꞌpitaso nicacasoꞌ yonquihuachina, ina tëhuënchinsoꞌ onpopionta yaꞌhuëapon.

¹² Sinioro piyapinënpitasoꞌ capa cancanchinaꞌ. Inari huayoninsopita napoꞌinaꞌ.

¹³ Siniorosoꞌ inápa quëran niꞌsárinpoaꞌ. Yaꞌipi piyapinpoa yaꞌhuërëhuaso niꞌninpoaꞌ.

¹⁴ Yaꞌhuërin quëran huarëꞌ inasoꞌ, isoroꞌpaquë yaꞌhuëpisopita noya niꞌsárin.

¹⁵ Inari cancanëna acotërin. Maꞌpitaso nisapisoꞌ, noya niꞌsárin.

¹⁶ Panca sontaroꞌsa huënton tërantaꞌ, co copirnonëna nichaꞌësarinhuëꞌ. Chiníquënoꞌsa nipirinahuë tërantaꞌ, co inaora chaꞌëcaiso nanitapihuëꞌ.

¹⁷ Cahuarioroꞌsasoꞌ, chiníquënoꞌsaꞌ. Napopirinahuë tërantaꞌ, co ina aipi yaꞌmitëatona chaꞌësapihuëꞌ.

¹⁸ Sinioro chinotopisopitaso nipirinhuëꞌ, inari aꞌpaimiatarin. Noya nicatona natëpisopitasoꞌ, inapotarin.

¹⁹ Chimirin quëran nichaꞌëcaso marëꞌ aꞌpaiarin. Tanaro tahuëriꞌsanta nipirinhuëꞌ, aꞌpaiaton catahuararin niꞌton, nanpiapi.

²⁰ Quiyasoꞌ Sinioroíchin chinotërai. ¡Ina paꞌpoyatoncoi catahuarincoi!

²¹ Ina yonquiatoi capa cancantërai. “Inasoꞌ, noyasáchin nicaton catahuararincoi,” taꞌtoi naporai.

²² ¡Quëmasáchin Sinioro ninaranquën niꞌton, nosorocoi! tënahuë.