Salmos 32 - Chayahuita (Shahui)

Oshanën shaꞌhuitohuachina, Yosëri inquitërinsoꞌ

Isonta canta Tapiri ocoirin

¹ Insosona tëhuëaton oshahuanpirinhuëꞌ, Yosëri noyá inquitohuachina, tëhuënchachin capa cancanchin.

² Oshanënpoa Yosë shaꞌhuitohuatëra, inquitërinpoaꞌ. Inquitërinpoa niꞌton, inaso co piꞌpian tëranta ina yonquirinhuëꞌ.

³ Oshahuanpirahuëꞌ, co noꞌtëquën nonahuëꞌ: “Caso noyaco, co oshahuancohuëꞌ,” toconahuë. Napopirahuëꞌ, co sano cancantërahuëꞌ. Sëtoroꞌco chachin yaꞌhuëato, nonëhuënta sanpatëraꞌpiarin ninatanahuë.

⁴ Tahuëri tashirë chachin anaꞌintëranco niꞌton, quëquën pëꞌpëto quëparëso pochin ninatanahuë. Piꞌisahuachina pasto yanirinso pochin Co huachi manta chinirahuë ninatanahuë.

⁵ Naporoꞌ oshanëhuë shaꞌhuitëranquën. Co noyahuëꞌ ninahuësopita noꞌtëquën shaꞌhuitëranquën. Inapohuatora, yaꞌipi oshanëhuë Sinioro inquitëranco huachi.

⁶ Inapotëranco niꞌton, imarinënquënsopita nontaponën. Yacatahuatëranso tahuëriꞌsa nontaponën. Paquiitërinso pochin maꞌsha onpocaso tahuëri nanipon. Napopirinhuëꞌ, imarinënquënsopitaso sano cancantaponaꞌ.

⁷ Quëmaso Sinioro paꞌpoyarancoi. Huëhuëpiro ninin quëran yaꞌshopirancoi. Catahuarancoi niꞌton, canatohuatoi cantarápoi.

⁸ Sinioronënpoa naporin: “Carinquën catahuaranquën noꞌtëquën yonquicasoꞌ. Anitotaranquën maꞌsona nicacasoꞌ. Noyasha pënënatënquën, noya ira aꞌnorëso pochin nitaranquën.

⁹ Inapotohuatënquën, quëmasoꞌ natëco. Ama cahuario, mora, inapita pochin cancantëquësohuëꞌ. Inapitasoꞌ noninquë aꞌsonconotahuatëꞌ, huaꞌnanan acatëntërëꞌ. Inapotohuatëra, noya natëtopi huachi. Coꞌsoꞌ inapotohuatërahuëꞌ, co onporonta yaꞌyoraninpohuëꞌ,” tënin.

¹⁰ Inpioroꞌsasoꞌ, naꞌcon parisitaponaꞌ. Sinioro ninarëhuasopitaso nipirinhuëꞌ, canopiaꞌhua soꞌquëtërëso pochin nitatonpoaꞌ, nosoromiatërinpoaꞌ.

¹¹ Sinioro yonquiatoma capa cancantocoꞌ. Noya piyapitatoma aꞌnapita maꞌshanënanta noya niꞌpatamaꞌ, capa cancantatomaꞌ, “yai,” charácoꞌ.