Salmos 27 - Chayahuita (Shahui)

Sinioro aꞌpintatonco nichaꞌërincosoꞌ

Isonta canta Tapiri ocoirin

¹ Sinioro, quëmasoꞌ aꞌpintatonco nichaꞌëranco. ¡Co insonta tëꞌhuataꞌhuaso yaꞌhuërinhuëꞌ! Sinioro, quëmasoꞌ paꞌpoyaranco niꞌton, noya yaꞌhuëarahuë. ¡Co inso tëranta tëꞌhuatarahuëꞌ!

² Aꞌnaquën co noyahuëꞌ nipisopita, inimicotërinaco. Niyontonatonaꞌ, yaahuërinaco. Ahuëatonaco ataꞌhuantiinacoso yonquipi. Napoaponaraihuëꞌ, inahuasá iꞌparahuatona anotopiso pochin nisapi.

³ Sontaroꞌsa huënton tancapitopirinacohuë tërantaꞌ, co paꞌyanapohuëꞌ. Ahuëinacoso marëꞌ noya niacohuachinarantaꞌ, sano cancantarahuë.

⁴ Aꞌnaíchin maꞌsha Sinioro natainquën acotoco. Ina paꞌpi nohuantato napoarahuë. Quëma pëinënquë quëtoco yaꞌhuëꞌi. Inaquë yaꞌhuëato chinotaꞌinquën. Noyápiachin ninansoꞌ, niꞌsaꞌi.

⁵ Parisitacaso tahuëri canquihuachin, quëma Sinioro paꞌpoyaponco. Pëinënquë chachin poꞌorëso pochin nitaranco. Inaquë noya noyaso naꞌpirai.

⁶ Naporoꞌ inimicoroꞌsa co huachi nanitapaponacohuëꞌ. Ina quëran maꞌsharoꞌsa quëcato, pëinënquë quëma marëꞌ tëpato, ahuiquitarahuë. Capa cancantato, “yai,” charápo. Nisha nisha cantanën cantato chinotaranquën.

⁷ Quëma Sinioro nontaranquën niꞌton, natanco. Nosorochináchin nontaranquën niꞌton, catahuaco.

⁸ “Nontoco catahuainquën,” itarancoso pochin cancantërahuë. Napoaton nontaranquën Sinioro.

⁹ Ama naꞌpitatë pochin nitocosohuëꞌ. Ama noꞌhuitonco aꞌpacosohuëꞌ. Catahuancoso marëꞌ quëmasáchin chinotëranquën. Aꞌpohuatanco, co insonta paꞌpoyaponcohuëꞌ. Quëmasáchin Yosënëhuënquën niꞌton, nichaꞌëranco.

¹⁰ Tatahuë, mamahuë, inapita aꞌpopirinacohuë tërantaꞌ, quëmasoꞌ Sinioro masahuatonco catahuararanco.

¹¹ Inimiconëhuëpita maꞌsha yaonpotërinaco. Napoaton Sinioro maꞌsona nicaꞌhuasoꞌ anitotoco. Aꞌninquëchin anitotoco chaꞌëi.

¹² Ama canainacoso marëhuëꞌ paꞌpoyaco. Nonpinapitonaco, yaaparisitërinaco.

¹³ Yaaparisitopirinacohuëꞌ, Sinioro nosorancosoꞌ niantararahuë. Isoroꞌpaquë nanpisoco chachin niantararahuë.

¹⁴ Napoaton chiníquën cancantato: “¡Siniorosoꞌ onpopionta catahuararinco! Chiníquën cancantato inasáchin ninarahuë. ¡Tëhuënchachin Sinioro catahuarinco!” tënahuë.