Salmos 24 - Chayahuita (Shahui)

Noya noya copirno huaꞌanëntarinsoꞌ

¹ Yaꞌipi isoroꞌpasoꞌ, Siniorori huaꞌanëntërin. Yaꞌipi yaꞌhuërinsopitarë chachin huaꞌanëntërin.

² Ina nohuanton isoroꞌpaꞌ achinirinsopita yaꞌhuërin. Marëroꞌsaꞌ, iroꞌsaꞌ, inapita aipi noyá acorin.

^3-5 Sinioro motopinënquë: ¿Inta nanitërin nanpëcasoꞌ? ¡Co insonta topinan napoarinhuëꞌ! Noya noya chinotacaso pëinënquë, ¿Inta nanitërin yaꞌhuëmiatacasoꞌ? ¡co insonta topinan inaquë yaꞌhuëmiatarinhuëꞌ! Aꞌnaquën noyasáchin yonquiaton, noyasáchin ninin. Naporahuaton co mamanshi mosharinhuëꞌ. Yoscoarëꞌ topachinantaꞌ, noꞌtëquënáchin nonin. Ina pochin nininsoꞌ nanitërin Sinioro pëinënquë yaꞌhuëcasoꞌ. Ina pochin nininsosoꞌ, Siniorori catahuararin. Yosëri noya nicaton, nichaꞌësarin.

⁶ Ina pochin cancantohuatëhuaꞌ, Yosë nóya chinotarëhuaꞌ. Cacoponta ina pochin cancantaton ina chinotërin.

^7-10 Quirosarin ninano yaꞌcoanaroꞌsasoꞌ, iráca quëran huarëꞌ yaꞌhuërin. Noya noya copirno yayaꞌconpachina, yaꞌcoana aꞌpairoꞌsa camaiaponaꞌ: “¡Yaꞌcoanaroꞌsa noyá iꞌsoatocoꞌ! ¡Naporo huarëꞌ noya noya copirno yaꞌconarin!” itapi. “¿Inta isoso noya noya copirno?” topachinantaꞌ: “¡Isoso mini Sinioro! Israiroꞌsanpoa chinotërëhuasoꞌ. Chini chiníquën nanantaton, míso ahuëtërin. Inariáchin yaꞌipi maꞌsha yaꞌhuërinso huaꞌanëntërin,” tosarëhuaꞌ.