Salmos 22 - Chayahuita (Shahui)

Parisitopirinhuëꞌ, Yosëri noya acoantarinsoꞌ

Isonta canta Tapiri ocoirin

¹ Quëmaso Yosënëhuënquën nipiranhuëꞌ, ¿onpoatonta patëranco? ¡Huëcaton nichaꞌëco huachi! Co napion ancatato nontaranquënsoꞌ natanaton, ¡catahuaco huachi!

² Tahuëri tashirë chachin nontápiranquënhuëꞌ, co aꞌpanirancohuëꞌ. ¡Inapoato co manta sano cancantërahuëꞌ!

³ Quëmaso napoaponahuëꞌ, noyasáchin ninan. Yaꞌipi israiroꞌsacoi huaꞌanëntërancoi. Napoaton yaꞌipicoi chinotërainquën.

⁴ Iráca shimashonëhuëpita natërinën. “Catahuarinpoa mini,” topiso marëꞌ nichaꞌëran.

⁵ Chiníquën nontohuachinën nichaꞌëran. Quëma ninarinën niꞌton, co atapananhuëꞌ.

⁶ Caso nipirinhuëꞌ, co piyapi pochin niꞌninacohuëꞌ. Chaꞌcho pochin nicatonaco tëhuarinaco. Naꞌa piyapiꞌsa co quëꞌyarinacohuëꞌ.

⁷ Naꞌhuëpona pochin nocanatonaco tëhuarinaco. Tanshitatonaco, aquinotërinaco.

⁸ Napoatonaꞌ: “ ‘Yosë natërahuë niꞌton, catahuaponco,’ tënin niꞌquëhuarëꞌ, inari nichaꞌëin. Nosororin niꞌquëhuarëꞌ, nichaꞌëin,” topi nonatonaꞌ.

⁹ Noꞌhuitonaco napopirinahuëꞌ, noꞌtëquën mini nosororanco. Quëma nohuanton huaꞌhuatërahuë. Quëma nohuanton mamahuë, iporahuatonco ashoꞌshorinco.

¹⁰ Coꞌhuara huaꞌhuachátërasocohuëꞌ, aꞌpairanco. Yoꞌnanquë nicasoco quëran huarëꞌ quëmasoꞌ acoranco chinotaꞌhuanquënso marëꞌ.

¹¹ Ama naniantocosohuëꞌ. Nani maꞌsha onpopirahuëꞌ, co insonta catahuarincohuëꞌ.

¹² Toro noꞌhuitëraya pochin inimicoroꞌsa tancapitërinaco. Pasan parti tororoꞌsasoꞌ, chiníquënoꞌsaꞌ. Ina pochin nicatona yaminsërinaco.

¹³ Paꞌpinisoꞌ përaantahuaton maꞌsha manin. Inapochachin inimicoroꞌsantaꞌ, noꞌhuimiatahuatonaco pashitaꞌparinaco.

¹⁴ Iꞌsha nëꞌhuëiꞌ nipachina, oporëꞌ. Inapochachin cantaꞌ, co huachi nohuantërinacohuëꞌ. Yaꞌipi nansënëhuëpita niaꞌpo niaꞌpo toconin ninatanahuë. Paꞌnansoꞌ pënquë soquirin. Inapochachin canta cancantato, co huachi chiníquën cancantërahuëꞌ.

¹⁵ Sënan aꞌpëhuatëra yanirin. Ina pochachin cantaꞌ, yanirahuëso pochin nicato co huachi chinirahuëꞌ. Paꞌpi yamoroto yaniconopirarahuë ninatanahuë. Chiminpatëra, amocan taranëꞌ. Inapochinachin canta nisarahuë.

¹⁶ Huëntonën niꞌnirasoꞌ, tancapitahuatona maꞌsha mapi. Inapochachin cantaꞌ, inimicoroꞌsa nitërinaco. Imirahuë, nantëhuë, inapita oquitërinaco.

¹⁷ Nansënëhuëpita pichichináchin pasháporin. Parisitasoco inimicoroꞌsaso niꞌsárinaco.

¹⁸ Aꞌmorahuësoꞌ, nicanapiso pochin nicatonaꞌ, aꞌnaya aꞌnaya mapi.

¹⁹ Napotopirinacohuëꞌ, quëmasoꞌ Sinioro achiniaranco. Ama patocosohuëꞌ. ¡Aꞌnaroáchin huëꞌsahuaton catahuaco!

²⁰ Sahuëniquë tëparëso pochin yanitërinaco. Nichaꞌëco ama inapochinacosohuëꞌ. Niꞌnira pochin cancantatona yatëpapirinacohuëꞌ, ¡paꞌpoyaco!

²¹ Paꞌpiniroꞌsasoꞌ, nahuëantahuatonpo yamaninpoꞌ. Tanan ohuacaroꞌsanta pomonën quëran yatëparinpoꞌ. Inapita pochin inimicoroꞌsa yanitopirinacohuëꞌ, ¡nichaꞌëco!

²² Inapotohuatanco, imarinquënsopita achinicancanarahuë. Niyontonaiquë chinotatënquën: “Yosparinquën,” itarainquën.

²³ Sinioro imarëhuasopita inasáchin chinotahuaꞌ. ¡Cacopo shinpitanpoa inasáchin paꞌyatahuaꞌ! ¡Yaꞌipi israiroꞌsanpoa inapoaꞌahuaꞌ!

²⁴ Popriyaroꞌsa parisitohuachinara, Siniorosoꞌ co topinan niꞌsárinhuëꞌ. Co naꞌpitatë pochin nicaton, tananpitaponhuëꞌ. Co napion ancatatona nontohuachinara, natanahuaton catahuararin.

²⁵ Naporinso marëꞌ ina chinotato: “Notohuaroꞌ imarinënquënsopita niyontonpiquë, chinotaranquën. Noꞌtëquën nonaton catahuatëranso marëꞌ napotaranquën. Maꞌsona nicaꞌhuasoꞌ shaꞌhuitëranquënsopita, chinotërinënsopita niꞌtonënquë ananiarahuë,” itarahuë.

²⁶ Aꞌnaquëmantaꞌ, aꞌnapita aparisitápirinënquëmahuëꞌ, noyá natëaquë huarëꞌ coshatoco huachi. Sinioro yoniramasopita huaꞌqui tahuëri nicatomaꞌ, ina chinotocoꞌ.

²⁷ Nisha nisha piyapinquëma nisha nisha nacionquë yaꞌhuëramaꞌ. Yaꞌipi parti yaꞌhuëramasopita huëcapairahuatomaꞌ, ina chinotocoꞌ. ¡Isonahuatoma chinotocoꞌ!

^28-29 Sinioro mini yaꞌipi nacionoꞌsa huaꞌanëntërin niꞌton, isonahuatona chinochinaꞌ. Yaꞌipi maꞌhuanoꞌsaꞌ, yaꞌipi nanpipisopita, inapitari chinochinaꞌ. Ina nohuanton nanpirapi niꞌton, inapochinaꞌ.

³⁰ Cá quëran pipipisopita Sinioro chinotáponaꞌ. Ina naporinsopita chiminai huarëꞌ shaꞌhuiponaꞌ.

³¹ Aꞌna tahuëri huaꞌhuatopisopita, Yosë noꞌtëquënáchin nininsoꞌ shaꞌhuitaponaꞌ. Nani maꞌsha nininsopitantaꞌ, anitotaponaꞌ.