Salmos 19 - Chayahuita (Shahui)

Yosë noya noya nininsoꞌ

Isonta canta Tapiri ocoirin

¹ Piꞌiroꞌtë nëꞌpëhuatëhuara, nani maꞌsha Yosëri acorinsopita niꞌnëhuaꞌ. Inapita yaꞌhuërin niꞌton, Yosë noya noya nininsoꞌ anitotërinpoaꞌ.

² Tahuërinta tahuëri capini, tashinta tashi capini nishaꞌhuitopiso pochin nicatonaꞌ, Yosë noya noya nininsoꞌ anitotërinpoaꞌ.

³ Nonpisoꞌ co natanëhuahuëꞌ. Topinan tanahuantárin.

⁴ Napoaponahuëꞌ, nisha nisha parti, inachachin anitotarin. Yaꞌipi isoroꞌpaquë nahuinin. Piꞌinta yaꞌhuëcaso marëꞌ inápaquë pëi pochin acotërin.

⁵ Nani tahuëri inasoꞌ, taꞌanaꞌpi pochin nisarin. Capa cancantaton iranën paꞌtërinso pochin nisarin. Saꞌanaꞌpi huëꞌërinso patoana quëran, pipirinso pochin ninin.

⁶ Pipirin quëran yaꞌnorahuaton, pomosoontarin. Ina quëran yaꞌconinꞌpaꞌ nohuaramarin. Co incari tëranta piꞌcatërinsoꞌ chaꞌëtërinhuëꞌ.

⁷ Sinioro pënëntërinsontaꞌ, noya noya. Anitotohuachinpoaꞌ, anoyacancantërinpoaꞌ. Shaꞌhuirinsopita noya natëhuachinaꞌ, apínapichin yonquipisopitantaꞌ, yonquínanhuan quëparitapi.

⁸ Nanamën quëran noꞌtëquën anitotërinpoaꞌ. Natëhuatëhuaꞌ, noya cancantarihuaꞌ. Camaitërinsopitasoꞌ, noyasáchin. Natëhuatëhuaꞌ, quënantërëso pochin cancantarihuaꞌ.

⁹ Sinioro tëꞌhuatatëhua natëhuatëhuaꞌ, co nëꞌhuëtërinso pochin nisarëhuahuëꞌ. Inapohuatëhuaꞌ, yaꞌhuëmiatarihuaꞌ. Shaꞌhuirinsopitasoꞌ, noꞌtëquënáchin. Yaꞌipi inapitasoꞌ, noyasáchin.

¹⁰ Oro paꞌton niꞌton, naꞌcon nohuantopi. Ina quëran paꞌton paꞌton Yosë shaꞌhuirinsoso niꞌton, naꞌcon naꞌcon nohuantahuaꞌ. Ninointa cashi cashin niꞌton, paꞌyatopi. Yosë shaꞌhuirinsosoꞌ, ina quëran cashi cashin niꞌton, naꞌcon naꞌcon paꞌyatahuaꞌ.

¹¹ Yosë shaꞌhuirinsopita yonquiatëhuaꞌ, niyátainpichin yaꞌhuëarihuaꞌ. Noya natëhuatëhuaꞌ, naꞌcon catahuarinpoaꞌ.

¹² Co noyahuëꞌ nipatoira, co quiyaora nitotëraihuëꞌ. Tëhuëtatëinquën oshahuanpiraihuëꞌ, co nitotëraihuëꞌ. Ina marëꞌ anaꞌintancoiso nipirinhuëꞌ, nichaꞌëcoi.

¹³ “Quiyaora noya nisarai,” topatoira, co natantochináchinhuëꞌ cancantarai. Piyapinëncoi niꞌtoi, ina pochin cancantohuatoi, inquitocoi. Inapotohuatancoi, co tëhuëcaꞌhuaiso yaꞌhuëtarincoihuëꞌ. Panca oshahuanaꞌhuaiso nipirinhuëꞌ, chaꞌësarai.

¹⁴ Quëmasoꞌ nani tahuëri niꞌsarancoi. Catahuacoi noyasáchin yonquiatoi, noyasáchin noin. Quëmasáchin Sinioro paꞌpoyatoncoi, nichaꞌërancoi.