Salmos 16 - Chayahuita (Shahui)

Yosë nosoroatonpoa aꞌpairinpoasoꞌ

Tapi Yosë nontërinsoꞌ

¹ “Yosë noya aꞌpairinco,” taꞌto imaranquën Sinioro. Napoaton noya aꞌpaico.

² Quëmasáchin chinotëranquën. Co nohuitëranquënhuëꞌ naporini, co noya cancanchitohuëꞌ.

³ Aꞌnaquën yaꞌhuëhuanoꞌsasoꞌ, mamanshiráchin moshapi. “Inapitasoꞌ chiníquën nanantopi,” taꞌtonaꞌ, imapi.

⁴ Mamanshiráchin paꞌyatatonaꞌ, aꞌna maꞌpatërachinpi. Inapita marëꞌ maꞌsha tëparahuatonaꞌ, huënaiꞌ aꞌpatopi. Caso co piꞌpisha tëranta inapita pochin cancantarahuëꞌ.

⁵ Quëmasáchin Sinioro nohuantëranquën. Catahuamiatëranco niꞌton, nóya cancantarahuë. Noya aꞌpaiatonco niꞌsáranco.

⁶ Quëma nohuanton nóya yaꞌhuërahuë. Catahuaranco niꞌton, nóya cancantërahuë.

⁷ Yonquiransopita anitotëranco. Ina marëꞌ noya cancantato chinotëranquën. Tashirë chachin yonquihuatënquën, aꞌchintaranco noya nicaꞌhuaso marëꞌ.

⁸ Nani tahuëri quëmasoꞌ caꞌtanaranco. Inchinanëhuë quëran yaꞌhuëaran niꞌton, co anotatë pochin nisarahuë.

⁹ Napoaton caso capa cancantërahuë. Co chiminaꞌhuaso tëranta tëꞌhuatërahuëꞌ.

¹⁰ Quëmasáchin Sinioro natëranquën niꞌton, co nohuantaranhuëꞌ nonëhuë chanatacasoꞌ. Huaꞌyanëhuëntaꞌ, co chimipiroꞌsa yaꞌhuërinquë tëꞌyataranhuëꞌ.

¹¹ Onporahuatosoꞌ nanpimiataꞌhuasoꞌ, quëma aꞌchintaranco. Nani tahuëri catahuaranco niꞌton, noya cancantarahuë. Quëmaquëꞌpaꞌ nipato, capa cancantomiatarahuë.