Salmos 150 - Chayahuita (Shahui)

Nisha nisha piꞌniatona Sinioro chinotacaso shaꞌhuirinsoꞌ

¹ ¡Ma noyacha Sinioroso paya! Siniorosoꞌ pëinënquë yaꞌhuëarin. Niyontonahuatëhuaꞌ, inaquë chinotahuaꞌ. Piꞌiroꞌtëquë acorinsopita nicatëhuaꞌ, chiníquën nanantërinsoꞌ yonquiaꞌahuaꞌ.

² Yaꞌipi nanitahuaton nani maꞌsha ninin. Ina marëꞌ paꞌyatahuaꞌ. Iráca quëran huarëꞌ yaꞌipi huaꞌanëntarin. Ina yonquiatëhuaꞌ: “Yosparinquën Sinioro,” itahuaꞌ.

³ Tronpitaroꞌsa pihuitëhuaꞌ, ina chinotahuaꞌ. Nisha nisha arparoꞌsa piꞌniatëhua cantahuaꞌ.

⁴ Pantiritanta piꞌniatëhuaꞌ, Sinioro marëꞌ nansaahuaꞌ. Nisha nisha pirinan, pihuitëhuaꞌ, ina paꞌyatahuaꞌ.

⁵ Pinca pinca taꞌtëhuaꞌ, Yosë yonquiaꞌahuaꞌ. Shari shari taꞌtëhuaꞌ, “Yosparinquën,” itahuaꞌ.

⁶ Yaꞌipi nanpirëhuasopita inasáchin chinotahuaꞌ. ¡Ma noyacha Sinioroso paya! itahuaꞌ.