Salmos 15 - Chayahuita (Shahui)

Onporahuatësona Yosë noya chinotacaso yaꞌhuërinsoꞌ

Isonta canta Tapiri ocoirin

¹ Sinioro quëmasoꞌ noya noyanquën. ¿Onporahuatoita noya nohuitatëinquën quëma huaꞌanëntëranquë nanitërai yaꞌhuëcaꞌhuaisoꞌ?

² Noya nipisopitaráchin nanitopi inaquë yaꞌhuëcaisoꞌ. Aꞌnapita noꞌtëquën yonquirapicaso yaꞌhuërin. Noꞌtën nanansáchin yonquiatëhuaꞌ, noꞌtëquënáchin nonacaso yaꞌhuërin.

³ Co pinotacaso yaꞌhuërinhuëꞌ. Co aꞌnapita maꞌsha onpotacaso yaꞌhuërinhuëꞌ.

⁴ Co noyahuëꞌ nipisopita co paꞌyatacaso yaꞌhuërinhuëꞌ. Yosë paꞌyatopisopitasoꞌ, noya niꞌcaso yaꞌhuërin. Maꞌsona nicacasoꞌ shaꞌhuihuatëhuaꞌ, co canapirëhuahuë tëranta ananicaso yaꞌhuërin.

⁵ Aꞌna piyapi coriqui aꞌnanpatëhuaꞌ, co manta ananpëcaso nohuantarihuahuëꞌ. Aꞌna piyapi co manta tëhuëpirinhuëꞌ anaꞌintacaso marëꞌ pahuërëhuachinënpoaꞌ, co maꞌpatarihuahuëꞌ. Inaporëhuasopitasoꞌ, co onporonta toꞌcoitërëso pochin nisarëhuahuëꞌ.