Salmos 148 - Chayahuita (Shahui)

Yaꞌipi acorinsopitari Sinioro paꞌyatopisoꞌ

¹ ¡Ma noyacha Sinioroso paya! ¡Inápaquë yaꞌhuëramasopita ina chinotocoꞌ! ¡Piꞌiroꞌtë quëran huarëꞌ ina paꞌyatocoꞌ!

² ¡Yaꞌipi Sinioro anquëninëpitari ina chinochinaꞌ! ¡Ina sontaronëna nipisopitantaꞌ, ina paꞌyachinaꞌ!

³ Piꞌi, yoqui, inapitanta ina chinochinaꞌ. Tayoraroꞌsa huënaráchin nipisopitantaꞌ, ina paꞌyachinaꞌ.

⁴ Ina inápa piꞌiroꞌtë nininsontaꞌ, ina chinochin. Piꞌiroꞌtë aipi iꞌ yaꞌhuërinsontaꞌ, ina paꞌyachin.

⁵ Yaꞌipi inapitari Sinioro chinochinaꞌ. Ina camaitërin quëran yaꞌipi inapita yaꞌhuëpi.

⁶ Inari yaꞌhuëmiatacaiso marëꞌ inapita acorin. Onpo yaꞌhuëcaisontaꞌ, inari acotëraꞌpiarin. Napoaton co onporonta tapiaponahuëꞌ.

⁷ Isoroꞌpaquë yaꞌhuëramasopitantaꞌ, Sinioro chinotocoꞌ. Yaꞌipi marë anpotërinsopita, inaquë panca maꞌsharoꞌsa yaꞌhuërinsoꞌ,

⁸ oꞌcoriꞌ, ocai anotërinsoꞌ, ocai tachitërinsoꞌ, noyahuan chitoroꞌ, Yosëri camaihuachina panca ihuan paꞌninsoꞌ,

⁹ motopiroꞌsaꞌ, motopiaꞌhuaroꞌsaꞌ, yaꞌipi nonararoꞌsaꞌ, huayo nararoꞌsaꞌ,

¹⁰ pëꞌtahuaroꞌsaꞌ, tanan maꞌsharoꞌsaꞌ, anpiantëhuanoꞌsaꞌ, niohuaratonaꞌpiroꞌsaꞌ,

¹¹ yaꞌipi copirnoroꞌsaꞌ, yaꞌipi piyapinënpita, huaꞌanoꞌsaꞌ, coisëroꞌsaꞌ,

¹² quëmapiꞌsaꞌ, sanapiꞌsaꞌ, huiꞌnapiꞌsaꞌ, mashoroꞌsaꞌ, huaꞌhuaroꞌsaꞌ, payaroꞌsaꞌ,

¹³ ¡yaꞌipinquëma canpitantaꞌ, Sinioro chinotocoꞌ! Inaíchin chini chiníquën nanantërin niꞌton, paꞌyatocoꞌ. Piꞌiroꞌtëꞌ, isoroꞌpaꞌ, inapitaso noyápiachin yaꞌnopi. Yosëso nipirinhuëꞌ, inapita quëran noya noya yaꞌnorin.

¹⁴ ¡Piyapinënpitanpoa chiníquën nanan quëtërinpoaꞌ! Yaꞌipi imarinsopitari chinochinaꞌ. Israiroꞌsanpoasoꞌ, cancantërinpoaꞌ. Ina piyapinënpoa ninëhuaꞌ. ¡Ma noyacha Sinioroso paya!