Salmos 145 - Chayahuita (Shahui)

Yaꞌipi piyapinpoa Sinioro chinotacaso yaꞌhuërinsoꞌ

Isonta cantaꞌ, Tapiri ocoirin

^1-2 “¡Ma noyanquëncha quëmasoꞌ Sinioro paya!” Quëmaso copirnonëhuënquën. Chinotomiatáponquën. Nani tahuëri naporápo. Co onporonta copitosarahuëꞌ.

³ Siniorosoꞌ, chini chiníquën nanantërin. Inasáchin noya noya chinotahuaꞌ. Chiníquën nanantërinsoꞌ, co inquënpoa tëranta nitotarihuahuëꞌ.

^4-7 Huiꞌnahuëipitarëꞌcoi chachin, huiꞌnahuëipitanta huiꞌninarë chachin acoransopita yonquiatoi chinotápoinquën. Chiníquën nanantaton nani maꞌsha ninansoꞌ, shaꞌhuirápoi. Noya noya niꞌton, huënaráchin yaꞌnoransontaꞌ, shaꞌhuirápoi. Paꞌyapiro ninansopita shaꞌhuirápoi. Chiníquën nanantaton huëhuëpiro ninansopita shaꞌhuirápoi. Noya noya yaꞌnoranso shaꞌhuirápoi. Nosoromiatërancoisoꞌ yonquiatoi shaꞌhuirápoi. Noyasáchin ninansontaꞌ, chiníquën shaꞌhuirápoi. Naporaisoꞌ, co onporonta nishatapoihuëꞌ.

⁸ Siniorosoꞌ noyápiachin cancantërin. Aꞌnaroáchin yanosorotërin. Co aꞌnaroáchin noꞌhuitërinhuëꞌ. Naporahuaton nosoromiatërinpoaꞌ.

⁹ Inasoꞌ, yaꞌipi marëꞌ paꞌpi noya ninin. Yaꞌipi acorinsopita noya aꞌpairin.

¹⁰ Nani maꞌsha acoransopita Sinioro, chinochinën. Imarinënquënsopitantaꞌ, noya chinochinën.

¹¹ Noya noya huaꞌanëntëransoꞌ yonquiatonaꞌ, shaꞌhuiinaꞌ. Chini chiníquën nanantaton catahuatëransopitantaꞌ, shaꞌhuiinaꞌ.

¹² Yaꞌipi nanitaparansoꞌ, piyapiꞌsa nitochinaꞌ. Noya noya huaꞌanëntëransontaꞌ, nitochinaꞌ.

¹³ Quëma huaꞌanëntërancoisosoꞌ, yaꞌhuëmiatarin. Co onporonta quëmasoꞌ huaꞌan quëran pipiaranhuëꞌ.

¹⁴ Anotërinso pochin nipisopitasoꞌ, Siniorori achiniantarin. Sanpatopisopitantaꞌ, ahuaniantarin.

¹⁵ Quëmasáchin yaꞌipiya nëꞌpërinën. Tanasoi chachin cosharo quëtamaso marëꞌ napopi.

¹⁶ Quëmari nosoroaton quëtohuatana, yaꞌipiya quëran macatona caꞌpi.

¹⁷ Maꞌpitaso nipachina, Siniorosoꞌ noyasáchin ninin. Yaꞌipi nininsopita nosoroaton noya acorin.

¹⁸ Chinotërinsopitasoꞌ, yaꞌcarísha quëran natanin. Tëhuënchachin nohuantatona chinotopisopita, inapotërin.

¹⁹ Noya nicatona natëpisopitasoꞌ, Siniorori nohuantopisoꞌ acotërin. Catahuacaso marëꞌ nontohuachinara, natanaton nichaꞌësarin.

²⁰ Sinioro nosoropisopitasoꞌ, inari paꞌpoyararin. Co noyahuëꞌ nipisopitasoꞌ, ataꞌhuantarin.

²¹ Sinioro chinotato: “¡Ma noyacha inaso paya!” ichi. ¡Yaꞌipiya quëran Sinioro chinotahuaꞌ! ¡Ama onporonta copitahuasohuëꞌ!